Tata Sierra EV : ભારતીય ઓટોમોબાઈલ માર્કેટમાં ટાટા મોટર્સ ફરી એકવાર ઈતિહાસ દોહરાવવા જઈ રહી છે. 90 ના દાયકાની સૌથી લોકપ્રિય SUV 'ટાટા સીએરા' હવે નવા અવતારમાં ઇલેક્ટ્રિક પાવર સાથે પરત આવી રહી છે. હાલમાં જ પુણેમાં ટેસ્ટિંગ દરમિયાન જોવા મળેલી આ કાર મે 2026 ના અંત સુધીમાં ભારતીય રસ્તાઓ પર દોડતી જોવા મળી શકે છે. આ માત્ર એક કાર નથી, પરંતુ ટાટાની લક્ઝરી અને મોડર્ન ટેકનોલોજીનું કોમ્બિનેશન છે.
આકર્ષક અને આધુનિક ડિઝાઇન
ટાટા સીએરા EV ની સૌથી મોટી ખાસિયત તેની ડિઝાઇન છે. કંપનીએ તેના જૂના આઇકોનિક લુકને જાળવી રાખીને તેને મોડર્ન ટચ આપ્યો છે. આ SUV માં પાછળના ભાગમાં સિગ્નેચર 'રેપરાઉન્ડ ગ્લાસ' આપવામાં આવ્યો છે, જે તેને અન્ય તમામ SUV કરતાં અલગ પાડે છે. આ વિશાળ કાચને કારણે કારની અંદર બેઠેલા પેસેન્જર્સને બહારનો નજારો ખૂબ જ સરસ દેખાય છે અને કેબિન એકદમ હવાદાર લાગે છે. આગળના ભાગમાં સ્લીક LED DRL બાર અને પાછળના ભાગમાં કનેક્ટેડ ટેલ-લેમ્પ્સ તેને પ્રીમિયમ લુક આપે છે.
પ્રીમિયમ 'લાઉન્જ' ઇન્ટિરિયર અને હાઇ-ટેક ફીચર્સ
કારની અંદર પગ મૂકતા જ તમને કોઈ ફાઇવ-સ્ટાર લાઉન્જમાં હોવાનો અહેસાસ થશે. ટાટા આમાં 'ટ્રિપલ સ્ક્રીન' સેટઅપ આપી રહ્યું છે, જેમાં 12.3-ઇંચની બે મોટી સ્ક્રીન અને એક 10-ઇંચનું ડિજિટલ ક્લસ્ટર સામેલ છે. ખાસ કરીને જે લોકો ડ્રાઇવર પાસે ગાડી ચલાવડાવવાનું પસંદ કરે છે, તેમના માટે '4-સીટર લાઉન્જ' વેરિઅન્ટ લોન્ચ કરવામાં આવશે. જેમાં પાછળની સીટોને સોફાની જેમ રિક્લાઇન (નમાવી) શકાશે. આ ઉપરાંત પેનોરેમિક સનરૂફ, વેન્ટિલેટેડ સીટ્સ અને 360-ડિગ્રી કેમેરા જેવા ફીચર્સ મુસાફરીને વધુ આરામદાયક બનાવશે.
દમદાર પરફોર્મન્સ અને 600 કિમીની રેન્જ
ટેકનિકલ રીતે આ SUV ટાટાના નવા 'Acti.ev' પ્લેટફોર્મ પર આધારિત છે. આમાં ગ્રાહકોને બે બેટરી પેક મળી શકે છે. 55kWh બેટરી જે મધ્યમ રેન્જ માટે હશે અને 65kWh બેટરી જે લાંબી મુસાફરી માટે હશે. કંપનીનો દાવો છે કે, તે એકવાર ફૂલ ચાર્જ કરવા પર 600 કિમી સુધીની રેન્જ આપી શકે છે, જ્યારે વાસ્તવિક સ્થિતિમાં તે 400-450 કિમી આરામથી ચાલશે. વધુ પાવર માટે આમાં ઓલ-વ્હીલ-ડ્રાઇવ (AWD) સિસ્ટમ પણ હશે, જેથી તમે તેને પહાડી કે ખરાબ રસ્તાઓ પર પણ સરળતાથી ચલાવી શકશો.
સુરક્ષા અને મોડર્ન ટેકનોલોજી
ટાટા તેની સેફટી માટે જાણીતું છે અને સીએરા EV માં પણ લેવલ 2+ ADAS (એડવાન્સ્ડ ડ્રાઈવર આસિસ્ટન્સ સિસ્ટમ) જેવી ટેકનોલોજી હશે. આ ઉપરાંત, આમાં V2L (Vehicle-to-Load) અને V2V (Vehicle-to-Vehicle) ચાર્જિંગની સુવિધા પણ હશે, જેનો અર્થ છે કે તમે તમારી કારની બેટરીથી અન્ય ઇલેક્ટ્રિક ડિવાઇસ અથવા બીજી ઇલેક્ટ્રિક કારને પણ ચાર્જ કરી શકશો.
