CM Bhupendra Patel Public Hearing Program: મુખ્યમંત્રી ભૂપેન્દ્ર પટેલની અધ્યક્ષતામાં ડિસેમ્બર-2025નો રાજ્ય સ્વાગત ઓનલાઈન જનફરિયાદ નિવારણ કાર્યક્રમ બુધવારે તા. 24 ડિસેમ્બરે યોજાશે. આ કાર્યક્રમમાં મુખ્યમંત્રી સ્વયં ઉપસ્થિત રહીને નાગરિકોની રજૂઆતો અને ફરિયાદોને સાંભળીને તાત્કાલિક નિવારણના નિર્દેશો આપશે. વડાપ્રધાન નરેન્દ્ર મોદીની પ્રેરણાથી વર્ષ 2003માં શરૂ થયેલો આ અનોખો સ્વાગત (SWAGAT - State Wide Attention on Grievances by Application of Technology) કાર્યક્રમ ગુજરાતના સુશાસનનું પ્રતીક બની ચૂક્યો છે. આ કાર્યક્રમ અંતર્ગત દર મહિનાના ચોથા ગુરુવારે રાજ્ય કક્ષાનો સ્વાગત કાર્યક્રમ યોજાય છે, જેમાં નાગરિકો પોતાની સમસ્યાઓ સીધી મુખ્યમંત્રી સમક્ષ રજૂ કરી શકે છે.
નાતાલની રજા કારણે સ્વાગત કાર્યક્રમ એક દિવસ અગાઉ યોજાશે
આ વખતે ડિસેમ્બર મહિનાનો ચોથો ગુરુવાર તા. 25 ડિસેમ્બરે નાતાલની જાહેર રજા હોવાથી રાજ્ય સ્વાગતને એક દિવસ અગાઉ બુધવારે તા. 24 ડિસેમ્બરે યોજવાનો નિર્ણય લેવામાં આવ્યો છે. મુખ્યમંત્રીના જનસંપર્ક એકમ દ્વારા જારી કરવામાં આવેલી વિગતો અનુસાર, આ કાર્યક્રમમાં નાગરિકો પોતાની રજૂઆતો રૂબરૂ કરવા માટે તા. 24 ડિસેમ્બરે સવારે 8 થી 11 વાગ્યા દરમિયાન સ્વર્ણિમ સંકુલ-2, ગાંધીનગર ખાતે આવી શકશે. બપોર પછી મુખ્યમંત્રી ભૂપેન્દ્ર પટેલ વીડિયો કોન્ફરન્સિંગ દ્વારા જિલ્લા અને તાલુકા કક્ષાના અધિકારીઓ સાથે જોડાઈને રજૂઆતોનું નિવારણ કરશે. આ કાર્યક્રમમાં રાજ્યભરમાંથી આવતી ફરિયાદોનું ઓનલાઈન ટ્રેકિંગ થાય છે અને તેનું ત્વરિત નિરાકરણ આવે છે. સ્વાગત કાર્યક્રમ ગુજરાતમાં સારા શાસનનું ઉત્તમ ઉદાહરણ છે. આના દ્વારા ગામથી લઈને રાજ્ય કક્ષા સુધીની ફરિયાદોનું નિવારણ થાય છે.
ગુજરાતમાં પારદર્શક અને જવાબદાર શાસનને વધુ મજબૂત
અગાઉના કાર્યક્રમોમાં મુખ્યમંત્રીએ જમીન, દબાણ, વીજળી, પાણી, આરોગ્ય અને અન્ય વિભાગો સંબંધિત સમસ્યાઓના ત્વરિત નિરાકરણ માટે અધિકારીઓને સ્પષ્ટ સૂચનાઓ આપી છે. આ કાર્યક્રમથી નાગરિકોને સરકાર સાથે સીધો સંવાદ કરવાની તક મળે છે અને તેમની સમસ્યાઓનું ઝડપી નિવારણ થાય છે. આ વખતના કાર્યક્રમમાં પણ મુખ્યમંત્રી ભૂપેન્દ્ર પટેલ પોઝિટિવ અભિગમ સાથે નાગરિકોની વાત સાંભળીને યોગ્ય કાર્યવાહીના નિર્દેશો આપશે. રાજ્ય સરકારના આ પ્રયાસથી ગુજરાતમાં પારદર્શક અને જવાબદાર શાસનની વધુ મજબૂતી મળી છે. નાગરિકોને અપીલ કરવામાં આવી છે કે તેઓ પોતાની સમસ્યાઓ રજૂ કરીને આ કાર્યક્રમનો લાભ લે.
