સુરત માટે આજની રાત ભારે : રાતે ઘરેથી બહાર ના નીકળવા નાગરિકોને તંત્રની અપીલ, જાણો એવું તો શું થવાનું છે કે વ્યાપી ગયો છે ફફડાટ

સુરત: હવામાન વિભાગ દ્વારા સુરત શહેર અને જિલ્લામાં આગામી કલાકોમાં ભારેથી અતિ ભારે વરસાદની આગાહી કરવામાં આવતા સમગ્ર તંત્ર એલર્ટ મોડ પર આવી ગયું છે. ખાસ કરીને આજે મોડી રાત્રે વરસાદની તીવ્રતા નોંધપાત્ર રીતે વધવાની સંભાવના વ્યક્ત કરવામાં આવી છે. આ પરિસ્થિતિને ધ્યાનમાં રાખીને સુરત મહાનગરપાલિકા અને જિલ્લા ડિઝાસ્ટર મેનેજમેન્ટ વિભાગે નાગરિકોને અત્યંત જરૂરી કામ સિવાય રાત્રિના સમયે ઘરેથી બહાર ન નીકળવાની અપીલ કરી છે. તંત્રના જણાવ્યા મુજબ, રાત્રે અંદાજે 11 વાગ્યાથી લઈને વહેલી સવારે 4 વાગ્યા સુધી અતિ ભારે વરસાદ વરસી શકે છે. સતત વરસાદને કારણે શહેરના નીચાણવાળા વિસ્તારોમાં પાણી ભરાવા, રસ્તાઓ પર જળબંબાકાર સ્થિતિ સર્જાવા અને વાહનવ્યવહાર પ્રભાવિત થવાની શક્યતા નકારી શકાય તેમ નથી. તેથી નાગરિકોને સાવચેતી રાખવા અને બિનજરૂરી મુસાફરી ટાળવા અનુરોધ કરવામાં આવ્યો છે.

ડિઝાસ્ટર વિભાગે વધારી તૈયારીઓ, તમામ એજન્સીઓ સ્ટેન્ડબાય

ભારે વરસાદની આગાહીને પગલે સુરત મહાનગરપાલિકા, જિલ્લા વહીવટી તંત્ર, ફાયર વિભાગ, પોલીસ, NDRF અને SDRFની ટીમોને સ્ટેન્ડબાય પર રાખવામાં આવી છે. નીચાણવાળા અને સંવેદનશીલ વિસ્તારો પર સતત નજર રાખવામાં આવી રહી છે. જ્યાં પાણી ભરાવાની શક્યતા વધુ છે ત્યાં આગોતરા રાહત અને બચાવની વ્યવસ્થા ગોઠવવામાં આવી છે, જેથી જરૂર પડ્યે લોકોને તાત્કાલિક સુરક્ષિત સ્થળે ખસેડી શકાય.

કંટ્રોલ રૂમને પણ 24 કલાક કાર્યરત રાખવામાં આવ્યો છે અને વિવિધ વિભાગો વચ્ચે સતત સંકલન જળવાઈ રહે તે માટે ખાસ સૂચનાઓ આપવામાં આવી છે. કોઈપણ ઇમરજન્સી સ્થિતિમાં ત્વરિત પ્રતિસાદ મળી રહે તે માટે જરૂરી મશીનરી અને માનવબળ તૈયાર રાખવામાં આવ્યું છે.

વેપારીઓ અને ઉદ્યોગકારોમાં પણ ચિંતા, આગોતરા સુરક્ષા પગલાં શરૂ

ભારે વરસાદની આગાહીને પગલે શહેરના વેપારીઓ અને ઉદ્યોગકારોએ પણ આગોતરી તૈયારીઓ શરૂ કરી દીધી છે. ખાસ કરીને પોદ્દાર આર્કેડ, ટેક્સટાઇલ માર્કેટ અને ડાયમંડ માર્કેટમાં વેપારીઓ કિંમતી માલસામાનને સુરક્ષિત સ્થળે ખસેડી રહ્યા છે. અનેક દુકાનોમાં સામાનને પ્લાસ્ટિકથી ઢાંકવામાં આવ્યો છે અને વરસાદ દરમિયાન નુકસાન ન થાય તે માટે ખાસ વ્યવસ્થા કરવામાં આવી રહી છે. ટેક્સટાઇલ અને ડાયમંડ માર્કેટના વેપારીઓને શક્ય હોય ત્યાં સુધી વહેલા ધંધો સમેટી કર્મચારીઓને સુરક્ષિત રીતે ઘરે મોકલવાની પણ અપીલ કરવામાં આવી છે. ઘણા વેપારીઓએ આખી રાત માર્કેટમાં રહી દેખરેખ રાખવાનો નિર્ણય કર્યો છે.

નાગરિકોને સાવચેતી રાખવા ખાસ સૂચનાઓ

તંત્રે લોકોને પાણી ભરાયેલા રસ્તાઓ પરથી પસાર ન થવા, વીજળીના થાંભલા અને ખુલ્લા વાયરથી દૂર રહેવા, નાળા કે ખાડી નજીક ન જવા તેમજ બાળકોને બહાર ન મોકલવાની અપીલ કરી છે. ભારે વરસાદ દરમિયાન કોઈપણ પ્રકારની અફવાઓ પર વિશ્વાસ ન કરવા અને માત્ર સત્તાવાર માહિતી પર જ આધાર રાખવા પણ સૂચના આપવામાં આવી છે.

આ પણ વાંચો: સુરતમાં અગાઉના કડવા અનુભવ બાદ પોદ્દાર આર્કેડના વેપારીઓ એલર્ટ : ભારે વરસાદની આગાહીને પગલે કિંમતી મોબાઇલ અને ઇલેક્ટ્રોનિક્સનો સામાન સુરક્ષિત સ્થળે ખસેડાયો

દરેક અપડેટ પર તંત્રની નજર

હવામાન વિભાગની આગામી આગાહી અને વરસાદની વાસ્તવિક સ્થિતિ પર તંત્ર સતત નજર રાખી રહ્યું છે. જો પરિસ્થિતિ વધુ ગંભીર બનશે તો જરૂરિયાત મુજબ વધુ રાહત અને બચાવ પગલાં લેવામાં આવશે. અધિકારીઓએ સ્પષ્ટ કર્યું છે કે નાગરિકોની સુરક્ષા સર્વોચ્ચ પ્રાથમિકતા છે અને દરેક વિભાગને 24 કલાક એલર્ટ મોડમાં રાખવામાં આવ્યો છે.