વક્ફ કાયદા પર અંતરિમ રોક લગાવવાનું હતું સુપ્રિમ કોર્ટ : જાણો કેમ ટાળ્યો નિર્ણય

સુપ્રીમ કોર્ટમાં બુધવારે (16 એપ્રિલ, 2025) વકફ એક્ટ પર દાખલ કરાયેલી ડઝનબંધ અરજીઓની સુનાવણી કરવામાં આવી હતી. ચીફ જસ્ટિસ સંજીવ ખન્ના, જસ્ટિસ સંજય કુમાર અને કેવી વિશ્વનાથનની બેન્ચે આ કેસની સુનાવણી કરી હતી. કોર્ટે આ મામલે કોઈ આદેશ કે નિર્દેશ આપ્યો નથી. કોર્ટે કેન્દ્ર સરકાર પાસેથી કેટલીક કલમો પર સ્પષ્ટતા માંગી છે. હવે આ કેસની ફરી સુનાવણી ગુરુવારે (17 એપ્રિલ) બપોરે 2 વાગ્યે થશે.

કોર્ટ ત્રણ જોગવાઈઓને સસ્પેન્ડ કરવાની હતી

વકફ સુધારા કાયદાને પડકારતી અરજીઓ પર સુનાવણી કરતી વખતે સુપ્રીમ કોર્ટે વિરોધ પ્રદર્શન દરમિયાન ફાટી નીકળેલી હિંસા અંગે ચિંતા વ્યક્ત કરી હતી. કેન્દ્રને એ પણ પૂછ્યું કે શું મુસ્લિમોને હિન્દુ ધાર્મિક બોર્ડમાં સામેલ કરવામાં આવશે? સુનાવણીના અંતે ચીફ જસ્ટિસની બેન્ચે આ કાયદા અંગે ત્રણ મુદ્દા ઉઠાવ્યા હતા. કોર્ટ આ ત્રણ જોગવાઈઓને સ્થગિત કરવાનો વચગાળાનો આદેશ પસાર કરવાની હતી, પરંતુ સોલિસિટર જનરલ તુષાર મહેતાએ કોર્ટ પાસે સમય માંગ્યો હતો.

ચીફ જસ્ટિસની ખંડપીઠે કહ્યું, "કોઈપણ મિલકત જે વપરાશકર્તા દ્વારા વકફ તરીકે જાહેર કરવામાં આવી છે અથવા કોર્ટ દ્વારા જાહેર કરવામાં આવી છે, તેને સૂચિત કરવામાં આવશે નહીં. બીજું, કલેક્ટર કાર્યવાહી ચાલુ રાખી શકે છે, પરંતુ જોગવાઈ લાગુ થશે નહીં. ત્રીજું, વકફ બોર્ડમાં એક્સ-ઓફિશિયો સભ્યો સિવાય માત્ર મુસ્લિમ સભ્યો હોવા જોઈએ." કોર્ટે આ ત્રણ જોગવાઈ સામે વાંધો ઉઠાવ્યો હતો.

કેન્દ્રે 2 અઠવાડિયાનો સમય માંગ્યો હતો

આ પછી કેન્દ્ર સરકાર વતી હાજર થયેલા એસજી તુષાર મહેતાએ જવાબ દાખલ કરવા માટે 2 અઠવાડિયાનો સમય માંગ્યો હતો. તેમણે કહ્યું કે જો કોર્ટ ઈચ્છે તો આ કેસની દરરોજ સુનાવણી કરી શકે છે. જસ્ટિસ ખન્નાએ કહ્યું કે સામાન્ય રીતે અમે આવા વચગાળાના આદેશો પસાર કરતા નથી, પરંતુ આ એક અપવાદ છે. તેમણે કહ્યું કે આ કેસની સુનાવણી છથી આઠ મહિના સુધી ચાલી શકે છે. આના પર કેન્દ્રએ વચગાળાના આદેશ સામે વાંધો ઉઠાવ્યો અને વધુ સમયની માંગણી કરી.

કોર્ટે કહ્યું કે તે તેમનો કેસ રજૂ કરવા માટે અડધો કલાક વધુ સમય આપવા તૈયાર છે, પરંતુ થોડી ચર્ચા પછી કેસ મોકૂફ રાખવામાં આવ્યો કારણ કે ત્યાં સુધીમાં 4 વાગ્યાનો સમય થઈ ગયો હતો. સુપ્રીમ કોર્ટે વારંવાર સ્પષ્ટ કર્યું છે કે તે વિધાનસભાના અધિકારક્ષેત્રનું અતિક્રમણ નહીં કરે.