ગાવસ્કરે દેખાડ્યું દરિયા દિલ! : 'જરૂરિયાતમંદ' વિનોદ કાંબલી માટે સુનીલ ગાવસ્કરે કરી મોટી મદદની જાહેરાત

Sunil Gavaskar Vinod Kambli: લાંબા સમયથી સ્વાસ્થ્ય સમસ્યાઓ સામે ઝઝૂમી રહેલા ભારતના ભૂતપૂર્વ ક્રિકેટર વિનોદ કાંબલીને તેમના મુશ્કેલ સમયમાં મહાન સુનીલ ગાવસ્કરની મદદ મળી છે. આ સહાય ગાવસ્કરના CHAMPS ફાઉન્ડેશન દ્વારા આપવામાં આવશે. આ અંતર્ગત હવે તેને દર મહિને 30 હજાર રૂપિયા આપવામાં આવશે. આ સિવાય તેમને આખા વર્ષ માટે મેડિકલ ખર્ચ માટે અલગથી 30,000 રૂપિયા પણ મળશે.

ગયા વર્ષે હોસ્પિટલમાં દાખલ કરવામાં આવ્યા હતા કાંબલી
ગયા વર્ષે ડિસેમ્બરમાં યુરિનરી ઈન્ફેક્શન અને ખેંચાણની ફરિયાદ બાદ કાંબલીને હોસ્પિટલમાં દાખલ કરવામાં આવ્યો હતો. 1 જાન્યુઆરીએ ડિસ્ચાર્જ થયા પહેલા તેમને થાણેની એક હોસ્પિટલમાં બે અઠવાડિયા માટે દાખલ કરવામાં આવ્યો હતો. કાંબલીએ છેલ્લા કેટલાક વર્ષોમાં સ્વાસ્થ્ય સંબંધિત અનેક પડકારોનો સામનો કર્યો છે. તેમણે તેના મિત્ર સચિન તેંડુલકરની મદદથી 2013માં બે હાર્ટ સર્જરી પણ કરાવી હતી.

કાંબલીને ડિસેમ્બરમાં મળ્યા હતા ગાવસ્કર
અમે તમને જણાવી દઈએ કે ગાવસ્કરે ડિસેમ્બર 2024માં મુંબઈના શિવાજી પાર્ક ખાતે દિગ્ગજ કોચ રમાકાંત આચરેકરના સ્મારકના ઉદ્ઘાટન વખતે કાંબલીને મદદ કરવાની પ્રતિજ્ઞા લીધી હતી. ત્યારબાદ ગાવસ્કર અને કાંબલી એકબીજાને મળ્યા હતા. આ રીતે હવે આ મહાન ભારતીય બેટ્સમેને આખરે પોતાનું વચન પૂરું કર્યું છે.

કાંબલીની પત્નીએ કર્યો હતો મોટો ખુલાસો
જાન્યુઆરીની શરૂઆતમાં કાંબલીની પત્ની એન્ડ્રીયા હેવિટે ખુલાસો કર્યો હતો કે તેમણે 2023માં છૂટાછેડા માટે અરજી કરી હતી પરંતુ તેમના પતિની 'લાચાર સ્થિતિ' જોઈને તેને પાછો ખેંચી લેવાનો નિર્ણય કર્યો હતો. સ્વતંત્ર પત્રકાર સૂર્યાંશી પાંડે દ્વારા આયોજિત પોડકાસ્ટ દરમિયાન એન્ડ્રીયાએ ખુલાસો કર્યો હતો કે તેઓ પહેલા કાંબલીને છોડી દેવાનું વિચાર્યું હતું, પરંતુ પછીથી તેમની તબિયતને કારણે તેમનો નિર્ણય બદલ્યો હતો.