ગરમીની રજાઓમાં રોડ ટ્રિપ પર જવાનું પ્લાન લગભગ દરેકને ગમે છે. પરિવાર કે મિત્રો સાથે લાંબી ડ્રાઇવ એક યાદગાર અનુભવ બની શકે છે, પરંતુ ઉંચા તાપમાનમાં તમારી કાર માટે આ સફર પડકારજનક બની શકે છે. જો સમયસર તૈયારી ન કરવામાં આવે તો રસ્તામાં કાર ખરાબ થવાથી આખી ટ્રિપ બગડી શકે છે. તેથી, સફર શરૂ કરતા પહેલા કેટલીક મહત્વપૂર્ણ ચેકલિસ્ટ ફોલો કરવી ખૂબ જ જરૂરી છે.
1. કૂલન્ટ અને એન્જિન ઓઇલ, કારનું હાર્ટ સુરક્ષિત રાખો
ગરમીમાં કારના એન્જિનને ઠંડું રાખવું સૌથી મહત્વપૂર્ણ છે. અહીં કૂલન્ટ મુખ્ય ભૂમિકા ભજવે છે. જો કૂલન્ટનું લેવલ ઓછું હોય તો એન્જિન ઓવરહિટ થઈ શકે છે અને કાર રસ્તામાં બંધ પડી શકે છે.
તે સાથે એન્જિન ઓઇલ પણ એટલું જ મહત્વનું છે. જૂનું અથવા ઓછું ઓઇલ એન્જિનના પાર્ટ્સમાં ઘર્ષણ વધારી શકે છે, જેના કારણે તાપમાન વધે છે અને એન્જિનને નુકસાન થઈ શકે છે. ટ્રિપ પહેલા ઓઇલ લેવલ ચેક કરો અને જરૂર પડે તો બદલી દો.
2. ટાયર અને એર પ્રેશર, સલામતી માટે જરૂરી
ગરમીમાં ટાયરની અંદર હવા ફેલાય છે, જેના કારણે ટાયર ફાટવાનો જોખમ વધી જાય છે. આથી હંમેશા યોગ્ય એર પ્રેશર જાળવવું જરૂરી છે.
આ ઉપરાંત:
ટાયર વધારે ઘસાઈ ગયા છે કે નહીં તે ચેક કરો
ક્યાંક કટ અથવા ક્રેક તો નથી?
સ્પેર ટાયર તૈયાર રાખો
જો ટાયર જૂના થઈ ગયા હોય, તો ટ્રિપ પહેલા બદલાવવો વધુ સલામત છે.
3. બેટરી ચેક સ્ટાર્ટિંગ સમસ્યાથી બચો
ગરમીમાં કારની બેટરી પર પણ અસર પડે છે. વધારે તાપમાન બેટરીના લિક્વિડને ઘટાડે છે, જેના કારણે કાર સ્ટાર્ટ થવામાં મુશ્કેલી આવી શકે છે.
ટ્રિપ પહેલા:
બેટરીનું હેલ્થ ચેક કરાવો
ટર્મિનલ સાફ છે કે નહીં જુઓ
જો બેટરી જૂની હોય તો બદલવા વિચાર કરો
4. AC પર ખાસ ધ્યાન આરામદાયક સફર માટે
ગરમીમાં કારનો AC સૌથી મહત્વપૂર્ણ ભાગ બની જાય છે. જો AC યોગ્ય રીતે કામ નહીં કરે તો આખી મુસાફરી અસહ્ય બની શકે છે.
ટ્રિપ પહેલા ખાતરી કરો કે:
AC સારી કૂલિંગ આપે છે
ગેસ લેવલ પૂરતું છે
ફિલ્ટર સાફ છે
જો કૂલિંગ ઓછી લાગે તો સર્વિસ કરાવી લો.
5. જરૂરી ડોક્યુમેન્ટ્સ, કાયદાકીય મુશ્કેલીથી બચો
ઘણા લોકો કારની ટેકનિકલ તૈયારી કરે છે પરંતુ ડોક્યુમેન્ટ્સ ભૂલી જાય છે. ટ્રિપ દરમિયાન આ મોટી સમસ્યા બની શકે છે.
હંમેશા સાથે રાખો:
રજીસ્ટ્રેશન સર્ટિફિકેટ (RC)
ઇન્શ્યોરન્સ પેપર્સ
PUC સર્ટિફિકેટ
ડ્રાઇવિંગ લાયસન્સ
આ નાના પગલાં તમને મોટા ઝંઝટથી બચાવી શકે છે.
