Free Aadhaar Email Update: આધાર કાર્ડ આજે દેશના લગભગ દરેક નાગરિક માટે સૌથી મહત્વપૂર્ણ ઓળખ દસ્તાવેજ બની ગયું છે. બેંકિંગથી લઈને સરકારી યોજનાઓ, મોબાઈલ સિમ, પાસપોર્ટ અને અનેક સેવાઓ માટે આધાર અનિવાર્ય બની ગયો છે. આવી સ્થિતિમાં આધાર સાથે જોડાયેલી માહિતી અપડેટ અને સચોટ રાખવી પણ એટલી જ જરૂરી બની જાય છે. ખાસ કરીને મોબાઈલ નંબર અને ઈમેલ આઈડી જેવી વિગતો સમયસર અપડેટ હોય તો આધાર સંબંધિત મહત્વપૂર્ણ સૂચનાઓ સરળતાથી પ્રાપ્ત થઈ શકે છે. આ જ જરૂરિયાતને ધ્યાનમાં રાખીને યુનિક આઈડેન્ટિફિકેશન ઓથોરિટી ઓફ ઈન્ડિયા (UIDAI)એ કરોડો આધાર ધારકોને મોટી રાહત આપતો નિર્ણય જાહેર કર્યો છે. UIDAIના નવા નિર્ણય મુજબ, 1 જુલાઈ 2026થી 31 ડિસેમ્બર 2026 સુધી આધાર કાર્ડમાં ઈમેલ આઈડી અપડેટ અથવા બદલવાની સેવા સંપૂર્ણપણે મફત રહેશે. હાલ આ સેવા માટે લોકોને 75 રૂપિયા (GST સહિત) ચૂકવવા પડે છે.
માત્ર આધાર મોબાઈલ એપ દ્વારા જ મળશે મફત સેવાનો લાભ
UIDAI દ્વારા જાહેર કરવામાં આવેલી સૂચના અનુસાર, આ છૂટ માત્ર ‘આધાર મોબાઈલ એપ’ મારફતે કરવામાં આવતા ઈમેલ અપડેટ માટે જ લાગુ પડશે. જો કોઈ વ્યક્તિ અન્ય માધ્યમથી ઈમેલ અપડેટ કરાવશે તો તેને નિયમિત ફી ચૂકવવી પડશે. અધિકારીઓનું માનવું છે કે, આ નિર્ણયથી વધુમાં વધુ લોકો આધાર મોબાઈલ એપનો ઉપયોગ કરશે અને પોતાની વિગતો સમયસર અપડેટ રાખવા પ્રોત્સાહિત થશે. UIDAI દ્વારા તાજેતરમાં લોન્ચ કરાયેલી આ મોબાઈલ એપ આધાર સંબંધિત અનેક સેવાઓને વધુ સરળ અને સુરક્ષિત બનાવવા માટે તૈયાર કરવામાં આવી છે.
આધાર સાથે ઈમેલ લિંક રાખવાથી શું ફાયદા થાય?
આધાર કાર્ડ સાથે ઈમેલ આઈડી જોડાયેલું હોવું અનેક રીતે લાભદાયી છે. ઈમેલ લિંક હોવાને કારણે UIDAI દ્વારા મોકલવામાં આવતી તમામ મહત્વપૂર્ણ સૂચનાઓ સીધી તમારા ઈનબોક્સમાં પ્રાપ્ત થાય છે. જો કોઈ વ્યક્તિ તમારા આધારનો અનધિકૃત ઉપયોગ કરવાનો પ્રયાસ કરે અથવા કોઈ શંકાસ્પદ પ્રવૃત્તિ નોંધાય તો તેની જાણ પણ ઈમેલ દ્વારા થઈ શકે છે. ઉપરાંત, ભવિષ્યમાં આધાર નંબર અથવા એનરોલમેન્ટ આઈડી સંબંધિત માહિતી ફરી મેળવવાની જરૂર પડે ત્યારે પણ ઈમેલ ખૂબ ઉપયોગી સાબિત થાય છે.
આ પણ વાંચો: સરકારની ગેરંટીવાળી યોજના! : એક વખત રોકાણ, પછી દર મહિને નિશ્ચિત આવક
આધાર મોબાઈલ એપમાં કઈ-કઈ સેવાઓ ઉપલબ્ધ છે?
UIDAIની આધાર મોબાઈલ એપમાં હાલમાં અનેક મહત્વપૂર્ણ સેવાઓ ઉપલબ્ધ કરાવવામાં આવી છે. જેમાં મોબાઈલ નંબર અપડેટ, સરનામું અપડેટ, બાયોમેટ્રિક લોક અને અનલોક, ઓથેન્ટિકેશન હિસ્ટ્રી ચેક, e-Aadhaar ડાઉનલોડ, આધાર વેરિફાયેબલ ક્રેડેન્શિયલ શેરિંગ અને અરજીની સ્થિતિ ટ્રેક કરવાની સુવિધાનો સમાવેશ થાય છે. આ એપનો ઉપયોગ કરવા માટે સ્માર્ટફોનમાં Android 9.0 અથવા તેથી ઉપરનું વર્ઝન અથવા iOS 16.0 અથવા તેથી ઉપરનું વર્ઝન હોવું જરૂરી છે. સાથે ઈન્ટરનેટ કનેક્ટિવિટી પણ જરૂરી રહેશે.
તમારો ઈમેલ આધાર સાથે જોડાયેલો છે કે નહીં? આ રીતે કરો વેરિફિકેશન
જો તમે જાણવા માંગતા હોવ કે તમારો ઈમેલ આઈડી આધાર સાથે જોડાયેલો છે કે નહીં, તો UIDAIની સત્તાવાર વેબસાઇટ પર જઈ સરળતાથી તેની ચકાસણી કરી શકો છો. સૌ પ્રથમ UIDAIની વેબસાઇટ પર જઈ ‘My Aadhaar’ વિભાગમાં જવું પડશે. ત્યારબાદ ‘Verify Email/Mobile Number’ વિકલ્પ પસંદ કરીને ‘Verify Email Address’ પર ક્લિક કરવું રહેશે. પછી આધાર નંબર, ઈમેલ આઈડી અને કેપ્ચા દાખલ કરીને સબમિટ કરવું પડશે. ત્યારબાદ તમારા ઈમેલ પર OTP આવશે. OTP દાખલ કરીને પ્રક્રિયા પૂર્ણ કરતાં જ ‘Aadhaar Authentication Successful’નો સંદેશ મળશે, જે દર્શાવશે કે તમારો ઈમેલ સફળતાપૂર્વક વેરિફાય થઈ ગયો છે.
આ પણ વાંચો: PF Account Balance કેવી રીતે ચેક કરવું? : જાણો EPFOની સરળ પ્રક્રિયા
6 મહિના માટે મળશે વિશેષ રાહત
UIDAIનો આ નિર્ણય ખાસ કરીને એવા લોકો માટે ફાયદાકારક બનશે જેઓ લાંબા સમયથી પોતાની આધાર વિગતો અપડેટ કરાવવા ઈચ્છતા હતા. 1 જુલાઈથી 31 ડિસેમ્બર 2026 સુધી ચાલનારી આ વિશેષ છૂટ દરમિયાન કરોડો લોકો કોઈપણ ફી ચૂકવ્યા વગર પોતાના આધાર સાથે ઈમેલ આઈડી અપડેટ કરી શકશે. આ સમયગાળા બાદ UIDAI ફરીથી આ સેવાના ચાર્જ અંગે નિર્ણય લઈ શકે છે. તેથી આધાર ધારકો માટે આગામી 6 મહિના પોતાની માહિતી અપડેટ કરવાની શ્રેષ્ઠ તક ગણાઈ રહી છે.
