Sreelekha Mitra PM Modi Poster Controversy: પશ્ચિમ બંગાળની જાણીતી અભિનેત્રી શ્રીલેખા મિત્રા એક વિદ્યાર્થી વિરોધ પ્રદર્શન દરમિયાન થયેલી ઘટનાને લઈને કાનૂની અને રાજકીય વિવાદમાં સપડાઈ છે. સોશિયલ મીડિયા પર વાયરલ થયેલી એક તસવીરમાં તેઓ પ્રધાનમંત્રી નરેન્દ્ર મોદીનું કથિત વાંધાજનક કેરિકેચર ધરાવતું પોસ્ટર હાથમાં પકડેલા જોવા મળતા ભાજપના નેતાઓએ તેમના વિરુદ્ધ ફરિયાદ નોંધાવી છે. આ ઘટનાએ માત્ર પશ્ચિમ બંગાળ જ નહીં પરંતુ દેશભરમાં રાજકીય ચર્ચા જગાવી છે. મીડિયા અહેવાલો મુજબ, 24 જુલાઈએ કોલકાતામાં સીલદાહથી ધર્મતલા સુધી યોજાયેલી વિદ્યાર્થી રેલી દરમિયાન શ્રીલેખા મિત્રા પણ પ્રદર્શનમાં જોડાયા હતા. આ દરમિયાન લેવામાં આવેલી એક તસવીર સોશિયલ મીડિયા પર વાયરલ થઈ હતી, જેમાં તેઓ કથિત રીતે પ્રધાનમંત્રી નરેન્દ્ર મોદીનું અપમાનજનક કેરિકેચર ધરાવતું પોસ્ટર પકડેલા દેખાય છે. આ તસવીર સામે આવ્યા બાદ ભાજપના નેતાઓએ અભિનેત્રી સામે કાયદાકીય કાર્યવાહી કરવાની માંગ ઉઠાવી છે.
ભાજપની મહિલા નેતાએ નોંધાવી ફરિયાદ
અહેવાલો અનુસાર, ભાજપની મહિલા નેતા કેયા ઘોષે આનંદપુર પોલીસ સ્ટેશનમાં શ્રીલેખા મિત્રા વિરુદ્ધ લેખિત ફરિયાદ નોંધાવી છે. ઉપરાંત વિધાનનગર સાયબર ક્રાઈમ પોલીસ સ્ટેશન સહિત અન્ય કેટલાક વિસ્તારોમાં પણ ફરિયાદો કરવામાં આવી હોવાનું જણાવવામાં આવ્યું છે.
ફરિયાદમાં આરોપ લગાવવામાં આવ્યો છે કે, વિદ્યાર્થી રેલી દરમિયાન શ્રીલેખા મિત્રાએ પ્રધાનમંત્રી નરેન્દ્ર મોદીનું કથિત અપમાનજનક કેરિકેચર ધરાવતું પોસ્ટર જાહેરમાં પ્રદર્શિત કર્યું હતું, જેનાથી જાહેર ભાવનાઓને ઠેસ પહોંચી શકે છે.
ફરિયાદમાં શું કરવામાં આવ્યો છે દાવો?
કેયા ઘોષ દ્વારા કરવામાં આવેલી ફરિયાદમાં જણાવાયું છે કે, ભારતનું બંધારણ શાંતિપૂર્ણ વિરોધનો અધિકાર આપે છે, પરંતુ આ અધિકારની પણ કાનૂની મર્યાદાઓ છે. ફરિયાદમાં એવો દાવો કરવામાં આવ્યો છે કે, રાજકીય વિરોધના નામે કોઈ વ્યક્તિ અથવા જાહેર પદ પર રહેલા વ્યક્તિનું અપમાનજનક પ્રદર્શન કરવું યોગ્ય નથી. ભાજપે આ સમગ્ર ઘટનાને ગંભીર ગણાવી અભિનેત્રી સામે યોગ્ય કાયદાકીય કાર્યવાહી કરવાની માંગ કરી છે.
આ પણ વાંચો: લોકસભામાં પેપર લીક બિલ પર હોબાળો યથાવત : સ્પીકરે સાંજે 5 વાગ્યા સુધી સહમતિ માટે આપ્યો સમય
હજુ FIR નહીં, માત્ર ફરિયાદ નોંધાઈ
મીડિયા અહેવાલો અનુસાર, પોલીસે વિવિધ ફરિયાદો સ્વીકારી છે, પરંતુ આ સમાચાર લખાય ત્યાં સુધી સત્તાવાર રીતે FIR નોંધાઈ હોવાનું પુષ્ટિ થયું નથી. સમગ્ર મામલે પોલીસ તરફથી વધુ તપાસ ચાલી રહી હોવાનું જાણવા મળે છે. આથી, અભિનેત્રી સામે હાલમાં ફરિયાદ નોંધાયાની માહિતી સામે આવી છે, જ્યારે કાયદાકીય કાર્યવાહી અંગે અંતિમ નિર્ણય તપાસ બાદ લેવામાં આવી શકે છે.
શ્રીલેખા મિત્રાની સ્પષ્ટતા
વિવાદ બાદ શ્રીલેખા મિત્રાએ પોતાની સ્પષ્ટતા આપતાં કહ્યું કે, તેમનો પ્રધાનમંત્રી નરેન્દ્ર મોદીનું અપમાન કરવાનો કોઈ ઈરાદો નહોતો. તેમણે જણાવ્યું કે, તેઓ વિદ્યાર્થી આંદોલનમાં જોડાવા માટે રસ્તા પર ઉતર્યા હતા. તે દરમિયાન ભીડમાં કોઈ વ્યક્તિએ તેમના હાથમાં પોસ્ટર આપ્યું હતું. તેમણે દાવો કર્યો કે, તે સમયે તેઓએ વાંચવાના ચશ્મા પહેર્યા નહોતા, જેના કારણે પોસ્ટર પર શું છપાયેલું હતું તે તેઓ સ્પષ્ટ રીતે જોઈ શક્યા નહોતા.
"હું ભાજપ વિરોધી હોઈ શકું, દેશ વિરોધી નહીં"
શ્રીલેખા મિત્રાએ સોશિયલ મીડિયા પર વાયરલ થયેલી તસવીર અંગે પણ પ્રતિક્રિયા આપી હતી. તેમણે જણાવ્યું કે,તેઓ ભાજપની નીતિઓનો વિરોધ કરી શકે છે, પરંતુ તેમને "રાષ્ટ્ર વિરોધી" કહેવું યોગ્ય નથી. તેમણે એવો પણ દાવો કર્યો કે, પોસ્ટર સાથે તેમણે જાણીજોઈને ફોટો પડાવ્યો હતો એવી વાત સંપૂર્ણપણે ખોટી છે. તેમના જણાવ્યા મુજબ, તે સમયે પોલીસ લાઠીચાર્જની સ્થિતિ હોવાથી તેમણે ઉતાવળમાં પોસ્ટર હાથમાં લીધું હતું અને ત્યારબાદ તસવીર લેવામાં આવી હતી.
આ પણ વાંચો: E20 જનતા પાર્ટી શું છે? : લાખો લોકો કેમ જોડાઈ રહ્યા છે આ ડિજિટલ અભિયાનમાં, જાણો સંપૂર્ણ માહિતી
ભાજપે ધરપકડની કરી માંગ
ભાજપની નેતા કેયા ઘોષે અભિનેત્રીની સ્પષ્ટતા સ્વીકારવાનો ઇનકાર કરતાં કહ્યું કે, પ્રધાનમંત્રીનું જે રીતે પોસ્ટરમાં પ્રદર્શન કરવામાં આવ્યું હતું તે સ્વીકાર્ય નથી. તેમણે અભિનેત્રી સામે કડક કાયદાકીય કાર્યવાહી કરવાની માંગ કરી છે અને જણાવ્યું છે કે જો યોગ્ય કાર્યવાહી નહીં થાય તો તેઓ કોર્ટનો દરવાજો ખખડાવશે.
રાજકીય અને કાયદાકીય ચર્ચાનો વિષય બન્યો મામલો
શ્રીલેખા મિત્રા પશ્ચિમ બંગાળની જાણીતી અભિનેત્રી છે અને તેઓ અગાઉ પણ વિવિધ સામાજિક તથા રાજકીય મુદ્દાઓ પર ખુલ્લેઆમ પોતાના અભિપ્રાયો વ્યક્ત કરતા રહ્યા છે. ટોલીવુડમાં નેપોટિઝમ, પક્ષપાત અને રાજકીય દખલગીરી જેવા મુદ્દાઓ પર તેઓ અનેક વખત નિવેદનો આપી ચૂક્યા છે. હાલ આ સમગ્ર મામલે એક તરફ ભાજપે અભિનેત્રી સામે ગંભીર આક્ષેપો કર્યા છે, જ્યારે બીજી તરફ શ્રીલેખા મિત્રાએ તમામ આરોપોને નકારી પોતાનો પક્ષ રજૂ કર્યો છે. ફરિયાદો નોંધાઈ હોવા છતાં સત્તાવાર FIR અને તપાસની પ્રક્રિયા અંગે પોલીસ તરફથી અંતિમ માહિતીની રાહ જોવામાં આવી રહી છે.
