એશિયા કપ 2025 ક્રિકેટ ટુર્નામેન્ટ 9 સપ્ટેમ્બરથી 28 સપ્ટેમ્બર સુધી સંયુક્ત આરબ અમીરાત (UAE) ના બે શહેરો અબુ ધાબી અને દુબઈમાં રમાશે. એશિયા કપ 2025 T20 ફોર્મેટમાં હોવાથી, રોહિત શર્મા અને વિરાટ કોહલી આ ટુર્નામેન્ટનો ભાગ રહેશે નહીં. 2024 માં વર્લ્ડ કપ જીત્યા બાદ કોહલી અને રોહિતે T20 આંતરરાષ્ટ્રીય ક્રિકેટમાંથી નિવૃત્તિ લીધી હતી. એશિયા કપ માટે ભારતીય ટીમની જાહેરાત હજુ સુધી કરવામાં આવી નથી. ઓગસ્ટના ત્રીજા અઠવાડિયામાં ટીમની જાહેરાત થઈ શકે છે. આ વખતે ભારતીય પસંદગીકારોએ ટીમની પસંદગી માટે ખૂબ વિચાર કરવો પડશે. પસંદગીકારોએ ઓપનિંગ કોમ્બિનેશનને લઈને સૌથી વધુ મહેનત કરવી પડશે. એશિયા કપમાં ઓપનિંગ સ્લોટ માટે કયા ખેલાડીઓના નામ ફાઇનલ થાય છે તે જોવું પડશે. ઓપનિંગ સ્લોટ માટે પાંચ ખેલાડીઓ રેસમાં હોવાનું કહેવાય છે, જેમાંથી બે નામ ફાઇનલ થઈ શકે છે. જ્યારે એકને રિઝર્વ ઓપનર તરીકે ટીમમાં પસંદ કરવામાં આવી શકે છે.
અભિષેક શર્માઃ
આ યુવા બેટ્સમેને ટી-20 ક્રિકેટમાં ખૂબ જ ઓછા સમયમાં પોતાની ઓળખ બનાવી છે. અભિષેક ICC T20 બેટિંગ રેન્કિંગમાં ટોપ પર છે. અભિષેક તેની વિસ્ફોટક બેટિંગ માટે જાણીતો છે, પરંતુ તે બોલ સાથે પણ ઉપયોગી સાબિત થઈ શકે છે. અભિષેકની પસંદગી નિશ્ચિત લાગે છે. અભિષેકે ભારત માટે 17 T20 આંતરરાષ્ટ્રીય મેચોમાં 535 રન બનાવ્યા, જેમાં બે શતક અને બે અર્ધ શતકનો સમાવેશ થાય છે.
યશસ્વી જયસ્વાલઃ
આ ડાબા હાથના બેટ્સમેને ઈંગ્લેન્ડ પ્રવાસ પર ટેસ્ટ ક્રિકેટમાં શાનદાર પ્રદર્શન કર્યું હતું અને બે સદી ફટકારી હતી. ઉપરાંત, તે ઇન્ડિયન પ્રીમિયર લીગ (IPL) 2025માં રાજસ્થાન રોયલ્સ (RR) માટે શાનદાર ફોર્મમાં હતો. અભિષેક શર્માની જેમ યશસ્વી પણ તેની વિસ્ફોટક બેટિંગ માટે જાણીતો છે. યશસ્વીએ તેની છેલ્લી T20 આંતરરાષ્ટ્રીય મેચ જુલાઈ 2024માં રમી હતી, પરંતુ તે આ ટૂર્નામેન્ટ માટે ટીમમાં પરત આવી શકે છે. યશસ્વીએ ભારત માટે 23 T20 મેચોમાં 723 રન બનાવ્યા, જેમાં 1 શતક અને 5 અર્ધ શતકનો સમાવેશ થાય છે.
સંજુ સેમસન:
સંજુ સેમસનએ T20 આંતરરાષ્ટ્રીય મેચોમાં ઓપનર તરીકે ત્રણ શતક ફટકાર્યા છે. તે આક્રમક બેટિંગ અને વિકેટકીપિંગ બંનેમાં ભારત માટે સારો વિકલ્પ બની શકે છે. સારી વાત એ છે કે સંજુ સેમસન એક વિકેટકીપર છે, જે પસંદગી માટે તેના દાવાને મજબૂત બનાવે છે. સંજુએ ભારત માટે અત્યાર સુધી 42 T20 આંતરરાષ્ટ્રીય મેચમાં 861 રન બનાવ્યા છે.
શુભમન ગિલ:
ઇંગ્લેન્ડ સામેની ટેસ્ટ શ્રેણીમાં શુભમન ગિલના પ્રદર્શનને ધ્યાનમાં લેતા, એશિયા કપ માટે તેને અવગણવું મુશ્કેલ બનશે. શુભમન ગિલ છેલ્લે જુલાઈ 2024 માં ભારત માટે T20 મેચ રમી હતી. શુભમન વ્હાઇટ બોલ ક્રિકેટમાં ઓપનિંગ કરી રહ્યો છે, તેથી તેને એશિયા કપ માટે ઓપનર તરીકે ટીમમાં જગ્યા મળી શકે છે. શુભમને 21 T20 આંતરરાષ્ટ્રીય મેચોમાં 578 રન બનાવ્યા છે, જેમાં 1 શતક અને 3 અર્ધ શતકનો સમાવેશ થાય છે.
સાઈ સુદર્શનઃ
ડાબોડી બેટ્સમેન સાઈ સુદર્શન પણ પ્રબળ દાવેદાર છે. સુદર્શને ઇન્ડિયન પ્રીમિયર લીગ (IPL) 2025 માં સૌથી વધુ 759 રન બનાવ્યા હતા. જોકે, સુદર્શનને અત્યાર સુધીમાં ભારત માટે માત્ર એક જ T20 મેચમાં ભાગ લેવાની તક મળી છે, જે ગયા વર્ષે જુલાઈમાં ઝિમ્બાબ્વે સામે રમાઈ હતી. જોકે, સુદર્શનની તે મેચમાં બેટિંગ આવી ન હતી.
તમને જણાવી કે, એશિયા કપ 2025 માં કુલ 8 ટીમો ભાગ લઇ રહી છે, જેને બે ગ્રુપમાં વહેંચવામાં આવી છે. ભારતને પાકિસ્તાન, યુએઈ અને ઓમાનની સાથે ગ્રુપ Aમાં રાખવામાં આવ્યું છે. જ્યારે ગ્રુપ B માં શ્રીલંકા, હોંગકોંગ, બાંગ્લાદેશ અને અફઘાનિસ્તાન છે. બંને ગ્રૂપમાંથી ટોચની બે ટીમ સુપર 4 સ્ટેજમાં પ્રવેશ કરશે. ત્યારબાદ સુપર 4 તબક્કામાં ટોચ પર રહેનારી બે ટીમો વચ્ચે 28 સપ્ટેમ્બરે ફાઈનલ મેચ યોજાશે.
