સોનિયા ગાંધીની તબિયત લથડી : સર ગંગારામ હોસ્પિટલમાં દાખલ

ગુરુવાર (20 ફેબ્રુઆરી, 2025)ના રોજ કોંગ્રેસ નેતા સોનિયા ગાંધીની તબિયત અચાનક બગડી ગઈ હતી, ત્યારબાદ તેમને સર ગંગારામ હોસ્પિટલમાં દાખલ કરવામાં આવ્યા હતા. સમાચાર એજન્સી પીટીઆઈના જણાવ્યા અનુસાર હાલમાં તેમની હાલત સ્થિર છે. ડોકટરોની એક ટીમ તેમની દેખરેખ રાખી રહી છે અને આજે તેમને હોસ્પિટલમાંથી રજા આપવામાં આવે તેવી શક્યતા છે. ડિસેમ્બર 2024માં સોનિયા ગાંધી 78 વર્ષના થયા.

ડૉક્ટરે ચિંતા ન કરવા જણાવ્યું
સર ગંગારામ હોસ્પિટલના મેનેજમેન્ટે કહ્યું, "તેમને પેટ સંબંધિત કોઈ સમસ્યાને કારણે દાખલ કરવામાં આવ્યા હતા. તેમની નિયમિત તપાસ કરવામાં આવી હતી, જોકે, કોઈ મોટી ચિંતા નથી અને શુક્રવારે સવાર સુધીમાં તેમને હોસ્પિટલમાંથી રજા આપવામાં આવે તેવી શક્યતા છે. તેઓ ડૉ. સમીરન નંદીની દેખરેખ હેઠળ છે.

ગત વર્ષે સપ્ટેમ્બરમાં પણ થયા હતા ભર્તી

ખરાબ સ્વાસ્થ્યને કારણે, સોનિયા ગાંધી ડિસેમ્બર 2024માં કર્ણાટકના બેલગાવીમાં યોજાયેલી કોંગ્રેસ વર્કિંગ કમિટી (CWC)ની બેઠકમાં હાજર નહોતા રહ્યાં. સપ્ટેમ્બર 2024માં સોનિયા ગાંધીને ખરાબ સ્વાસ્થ્યને કારણે સર ગંગારામ હોસ્પિટલમાં દાખલ કરવામાં આવ્યા હતા. તેમને હળવો તાવ હતો. માર્ચ 2024માં સોનિયા ગાંધીને ખરાબ સ્વાસ્થ્યને કારણે સર ગંગારામ હોસ્પિટલમાં દાખલ કરવામાં આવ્યા હતા. જો કે, એક દિવસ પછી, એક તબીબી બુલેટિન બહાર પાડવામાં આવ્યું હતું જેમાં કહેવામાં આવ્યું હતું કે તેઓ સંપૂર્ણપણે સ્વસ્થ છે.

સોનિયા ગાંધી છેલ્લે 13 ફેબ્રુઆરી, 2025ના રોજ સંસદના બજેટ સત્ર દરમિયાન રાજ્યસભામાં જાહેરમાં જોવા મળ્યા હતા. તેમણે અનેક માગણીઓ કરી હતી. રાષ્ટ્રપતિના સંબોધન પર તેમના નિવેદનને લઈને ઘણી રાજકીય ગરમાવો પણ આવ્યો હતો. કોંગ્રેસ સંસદીય પક્ષના વડા સોનિયા ગાંધીએ 15 જાન્યુઆરી, 2025ના રોજ પક્ષના નવા મુખ્યાલય ઈન્દિરા ભવનનું ઉદ્ઘાટન કર્યું હતું. આ ભવનનું નિર્માણ સોનિયા ગાંધીના પક્ષના અધ્યક્ષ તરીકેના કાર્યકાળ દરમિયાન શરૂ કરવામાં આવ્યું હતું.