સોનમ વાંગચુક સમાપ્ત કરી શકે છે અનશન : પત્નીએ મુકી શરત, જાણો લેટેસ્ટ અપડેટ

શિક્ષણ વ્યવસ્થામાં સુધારા અને નીટ પરીક્ષા સહિતના વિવિધ મુદ્દાઓને લઈને દિલ્હીના જંતર-મંતર પર અનશન પર બેઠેલા જાણીતા શિક્ષણવિદ અને પર્યાવરણ કાર્યકર સોનમ વાંગચુકના અનશનને લઈને મહત્વપૂર્ણ અપડેટ સામે આવ્યું છે. હાલ સફદરજંગ હોસ્પિટલમાં સારવાર હેઠળ રહેલા વાંગચુક આવતીકાલે પોતાનું અનશન સમાપ્ત કરી શકે છે, પરંતુ તેની માટે તેમની પત્ની ગીતાંજલી આંગ્મોએ રાજકીય પક્ષોના નેતાઓ સમક્ષ એક મહત્વપૂર્ણ શરત મૂકી છે.

રાજકીય પક્ષો તરફથી ખાતરી મળશે તો અનશન સમાપ્ત થશે

નીટ પરીક્ષા અને શિક્ષણમાં જવાબદારી સહિતના મુદ્દાઓને લઈને લાંબા સમયથી અનશન કરી રહેલા સોનમ વાંગચુકની પત્ની ગીતાંજલી આંગ્મોએ જણાવ્યું કે જો વિવિધ રાજકીય પક્ષોના નેતાઓ સોનમ વાંગચુકને મળી સંસદના આગામી મોનસૂન સત્ર દરમિયાન શિક્ષણમાં જવાબદારી અને સુધારાના મુદ્દાઓ ઉઠાવવાની સ્પષ્ટ ખાતરી આપે તો સોનમ વાંગચુક આવતીકાલે પોતાનું અનશન સમાપ્ત કરવા તૈયાર છે. તેમણે જણાવ્યું કે આંદોલનનો મુખ્ય હેતુ કોઈ રાજકીય લાભ મેળવવાનો નહીં પરંતુ શિક્ષણ વ્યવસ્થામાં પારદર્શિતા અને જવાબદારી સુનિશ્ચિત કરવાનો છે.

દિલ્હી હાઈકોર્ટમાં થયેલી સુનાવણી બાદ સફદરજંગ હોસ્પિટલમાં પતિની મુલાકાત લઈને જંતર-મંતર પર પરત ફરેલી ગીતાંજલી આંગ્મોએ જણાવ્યું કે સોનમ વાંગચુકની તબિયત હાલ સ્થિર છે. તેમણે હાઈકોર્ટમાં તેમને ખાનગી હોસ્પિટલમાં ખસેડવાની માંગણી કરી હતી, પરંતુ તેમાં સફળતા મળી નથી. તેમ છતાં તેઓ હાલ નિષ્ણાત ડોક્ટરોની દેખરેખ હેઠળ સારવાર મેળવી રહ્યા છે.

સંસદ માર્ચને સંપૂર્ણ શાંતિપૂર્ણ રાખવાની અપીલ

જંતર-મંતર પર ઉપસ્થિત સમર્થકોને સંબોધતા ગીતાંજલી આંગ્મોએ સોનમ વાંગચુકનો સંદેશ પણ વાંચીને સંભળાવ્યો. તેમણે જણાવ્યું કે સોનમે તમામ સમર્થકો અને આંદોલનકારીઓને અપીલ કરી છે કે આવતીકાલે યોજાનાર સંસદ માર્ચ સંપૂર્ણ શાંતિપૂર્ણ રહે અને કોઈપણ વ્યક્તિ અથવા સંગઠન આ આંદોલનનો ખોટો ઉપયોગ ન કરે. તેમણે ભારપૂર્વક કહ્યું કે આ સમગ્ર અભિયાનનો ઉદ્દેશ માત્ર શિક્ષણ સંબંધિત મુદ્દાઓ પર સરકારનું ધ્યાન દોરવાનો છે અને તે હંમેશા અહિંસક અને લોકશાહી પદ્ધતિથી જ આગળ વધવું જોઈએ.

સોનમ વાંગચુક છેલ્લા કેટલાક દિવસોથી સતત અનશન પર હોવાથી તેમના સ્વાસ્થ્ય અંગે પણ ચિંતા વ્યક્ત થઈ રહી છે. આ કારણસર તેમને સફદરજંગ હોસ્પિટલમાં દાખલ કરવામાં આવ્યા છે, જ્યાં તેમની સતત દેખરેખ રાખવામાં આવી રહી છે.

ડોક્ટરોએ સ્વાસ્થ્ય અંગે આપી માહિતી

સફદરજંગ હોસ્પિટલના મેડિસિન વિભાગના વડા ડૉ. પ્રો. મનીષા ઠાકુરે સોનમ વાંગચુકની તબિયત અંગે માહિતી આપતાં જણાવ્યું કે તેઓ હાલ VMMC અને સફદરજંગ હોસ્પિટલમાં દાખલ છે અને ગઈકાલથી તેમની સ્થિતિ પર સતત નજર રાખવામાં આવી રહી છે. તેમના જણાવ્યા મુજબ હાલ વાંગચુકના તમામ મહત્વના હેલ્થ પેરામીટર્સ સ્થિર છે અને ગઈકાલની સરખામણીએ બ્લડ પેરામીટર્સમાં થોડો સુધારો પણ નોંધાયો છે.

ડૉ. ઠાકુરે વધુમાં જણાવ્યું કે લાંબા સમય સુધી ઉપવાસ કરવાથી શરીર પર ગંભીર અસર પડી શકે છે. તેથી સોનમ વાંગચુકને 24 કલાક સતત મેડિકલ મોનિટરિંગ હેઠળ રાખવામાં આવ્યા છે જેથી કોઈપણ પ્રકારની જટિલતા સમયસર ઓળખી શકાય અને તરત જ સારવાર શરૂ કરી શકાય.

તેમણે જણાવ્યું કે સોનમ વાંગચુકની સારવાર માટે મલ્ટી-ડિસિપ્લિનરી ટીમ કાર્યરત છે, જેમાં AIIMS દિલ્હી અને VMMC-સફદરજંગ હોસ્પિટલના વિવિધ નિષ્ણાત ડોક્ટરો સામેલ છે. તમામ નિષ્ણાતોનું માનવું છે કે લાંબા સમય સુધી ચાલેલા અનશનને કારણે તેમની સતત તબીબી દેખરેખ અત્યંત જરૂરી છે. શરીર પર પડતા તણાવ અને સંભવિત જટિલતાઓને ધ્યાનમાં રાખીને નિયમિત તપાસ કરવામાં આવી રહી છે જેથી કોઈપણ ગંભીર સ્થિતિ સર્જાય તે પહેલાં યોગ્ય સારવાર આપી શકાય.

આ સમગ્ર ઘટનાક્રમ હવે રાજકીય પક્ષોના આગામી પગલાં પર નિર્ભર છે. જો વિવિધ પક્ષો શિક્ષણમાં જવાબદારી અને સુધારાના મુદ્દે સંસદમાં ચર્ચા કરવાની ખાતરી આપે છે તો સોનમ વાંગચુક આવતીકાલે પોતાનું અનશન સમાપ્ત કરી શકે છે. બીજી તરફ સંસદ માર્ચને લઈને પણ તેમની શાંતિપૂર્ણ અપીલને મહત્વપૂર્ણ માનવામાં આવી રહી છે, કારણ કે આંદોલનને સંપૂર્ણપણે અહિંસક રાખવા પર તેઓ સતત ભાર મૂકી રહ્યા છે.