'તો હું અનશન ખતમ કરી દઈશ...' : ઉપવાસ તોડવા તૈયાર સોનમ વાંગચુક, પણ પહેલા દેશ સામે મૂકી આ એક શરત

Sonam Wangchuk Hunger Strike: દિલ્હીના જંતર-મંતર ખાતે છેલ્લા 20 દિવસથી ચાલી રહેલી સોનમ વાંગચુકની ભૂખ હડતાળ હવે નિર્ણાયક તબક્કામાં પહોંચી છે. સતત ઉપવાસને કારણે તેમનું સ્વાસ્થ્ય નબળું પડ્યું હોવા છતાં તેઓ પોતાના આંદોલનમાંથી પીછેહઠ કરવા તૈયાર નથી. જોકે, દેશભરમાંથી મળી રહેલી ચિંતા અને સમર્થન વચ્ચે વાંગચુકે હવે પોતાના ઉપવાસને લઈને મહત્વપૂર્ણ જાહેરાત કરી છે. સામાજિક કાર્યકર્તા સોનમ વાંગચુકે સ્પષ્ટ કર્યું છે કે, તેઓ કોઈપણ પરિસ્થિતિમાં આંદોલન અધવચ્ચે છોડવા માંગતા નથી, પરંતુ જો 20 જુલાઈના રોજ યોજાનારી સંસદ માર્ચને જનતાનો વ્યાપક ટેકો મળશે અને આંદોલનને મજબૂત સંદેશ મળશે, તો તેઓ પોતાના ઉપવાસનો અંત લાવવા તૈયાર છે. તેમનું આ નિવેદન સોશિયલ મીડિયા પર ઝડપથી વાયરલ થઈ રહ્યું છે.

NEET પેપર લીક અને શિક્ષણ મંત્રીના રાજીનામાની માંગ સાથે આંદોલન

સોનમ વાંગચુક હાલ દિલ્હીના જંતર-મંતર ખાતે નીટ (NEET) પેપર લીક મુદ્દે વિરોધ પ્રદર્શન કરી રહ્યા છે. તેઓ પરીક્ષા વ્યવસ્થામાં પારદર્શિતા લાવવા તેમજ કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની માંગ સાથે આંદોલન ચલાવી રહ્યા છે. તેમના કહેવા મુજબ, દેશના લાખો વિદ્યાર્થીઓના ભવિષ્ય સાથે થયેલી છેતરપિંડી સામે અવાજ ઉઠાવવો જરૂરી છે. આંદોલનનો હેતુ માત્ર એક વ્યક્તિ સામે વિરોધ કરવાનો નહીં પરંતુ સમગ્ર શિક્ષણ વ્યવસ્થામાં જવાબદારી નક્કી કરવાનો છે.

20 દિવસમાં 9 કિલો વજન ઘટ્યું, છતાં મનોબળ અડગ

લાંબા સમયથી ચાલતા ઉપવાસની સીધી અસર સોનમ વાંગચુકના સ્વાસ્થ્ય પર પડી છે. છેલ્લા 20 દિવસમાં તેમનું લગભગ 9 કિલો વજન ઘટ્યું હોવાનું જાણવા મળ્યું છે. ડૉક્ટરો સતત તેમના સ્વાસ્થ્ય પર નજર રાખી રહ્યા છે. વિડિયો સંદેશમાં વાંગચુકે જણાવ્યું કે, હજારો લોકો તેમને ઉપવાસ સમાપ્ત કરવાની અપીલ કરી રહ્યા છે. તેમણે કહ્યું, "મેડિકલ તપાસમાં શરીર નબળું પડ્યું હોવાનું સામે આવ્યું છે, પરંતુ હાલ સ્થિતિ એટલી ગંભીર નથી કે આગામી થોડા દિવસોમાં જીવનું જોખમ ઊભું થાય."

તેમણે ઉમેર્યું કે, "લોકો મારા સ્વાસ્થ્ય માટે ચિંતિત છે, પરંતુ જે વિદ્યાર્થીઓએ પેપર લીકના કારણે જીવ ગુમાવ્યા અથવા માનસિક તણાવ સહન કર્યો, તેમની પીડા પણ એટલી જ મહત્વપૂર્ણ છે. મારા સ્વાસ્થ્ય કરતાં દેશના યુવાનોનું ભવિષ્ય વધારે અગત્યનું છે."

આ પણ વાંચો: ગેસ સિલિન્ડરની નવી ટેક્નોલોજી આવી : હવે નહીં થાય LPGનો બગાડ, જાણો LOT સિલિન્ડરના મોટા ફાયદા

જનતા સામે મૂકી ખાસ શરત

સોનમ વાંગચુકે લોકોની લાગણીને ધ્યાનમાં રાખીને ઉપવાસ સમાપ્ત કરવાનો એક 'મધ્યમ માર્ગ' સૂચવ્યો છે. તેમણે દેશભરના લોકોને 20 જુલાઈએ યોજાનારી સંસદ માર્ચમાં મોટી સંખ્યામાં જોડાવા અપીલ કરી છે. તેમણે કહ્યું કે, લોકો માત્ર સોશિયલ મીડિયા પર સંદેશ મોકલવાથી નહીં, પરંતુ મેદાનમાં આવીને આંદોલનને સમર્થન આપે. તેમણે લોકોને મિસ્ડ કોલ દ્વારા પણ પોતાની હાજરી નોંધાવવા અનુરોધ કર્યો છે.

'માતાઓ આંદોલનની આગેવાની કરે'

વિડિયો સંદેશમાં સોનમ વાંગચુકે ખાસ કરીને મહિલાઓ અને માતાઓને સંસદ માર્ચમાં જોડાવાની અપીલ કરી છે. તેમણે કહ્યું, "માતાના દિલમાં બાળકો માટે જે પ્રેમ હોય છે, તે સૌથી નિઃસ્વાર્થ હોય છે. હું ઈચ્છું છું કે માતાઓ આ સંસદ માર્ચનું નેતૃત્વ કરે, જેથી દેશના ભવિષ્ય માટે એક મજબૂત સંદેશ જઈ શકે."

'માર્ચ સફળ થશે તો હું ઉપવાસ તોડી દઈશ'

સોનમ વાંગચુકે પોતાના સંદેશમાં સ્પષ્ટ શબ્દોમાં કહ્યું કે જો 20 જુલાઈની સંસદ માર્ચ સફળ રહેશે અને આ મુદ્દો યોગ્ય સ્તરે પહોંચશે તો તેઓ રાહતનો શ્વાસ લેશે અને પોતાનો ઉપવાસ સમાપ્ત કરશે. તેમણે કહ્યું, "જો હું આ સમયે લડત અધૂરી છોડીને ઉપવાસ સમાપ્ત કરી દઉં તો સરકારને એવો સંદેશ જશે કે લોકો થોડા દિવસ પછી શાંત થઈ જાય છે. હું એવું થવા દેવા માંગતો નથી. આ લડાઈ દેશના ભવિષ્ય માટે છે." વાંગચુકનું આ નિવેદન સોશિયલ મીડિયા પર ઝડપથી વાયરલ થઈ રહ્યું છે અને અનેક લોકો તેમના સમર્થનમાં આગળ આવી રહ્યા છે. બીજી તરફ, તેમના સ્વાસ્થ્યને લઈને ચિંતા પણ સતત વધી રહી છે.