Surat News: આજના ડિજિટલ યુગમાં સોશિયલ મીડિયા અને ડેટિંગ એપ્સનો ક્રેઝ વધ્યો છે, પરંતુ તેની સાથે-સાથે ડિજિટલ ક્રાઈમ અને છેતરપિંડીના કિસ્સાઓ પણ ચિંતાજનક રીતે વધી રહ્યા છે. સુરતમાં લવ જેહાદ અને આર્થિક ઠગાઈનો એક ચોંકાવનારો કિસ્સો સામે આવ્યો છે, જેમાં સોશિયલ મીડિયા અને ડેટિંગ એપના માધ્યમથી એક યુવતીને પ્રેમજાળમાં ફસાવી, પોતાની સાચી ઓળખ છુપાવીને દુષ્કર્મ આચરવામાં આવ્યું હતું. એટલું જ નહીં, યુવતી પાસેથી લાખો રૂપિયા પડાવીને ફરાર થઈ ગયેલા આરોપીને વેસુ પોલીસે ગણતરીના દિવસોમાં રાજકોટથી દબોચી લીધો છે.
ઓળખ છુપાવી પ્રેમજાળમાં ફસાવી
મળતી માહિતી મુજબ, આરોપીએ સોશિયલ મીડિયા અને ડેટિંગ એપ પર પોતાની ખોટી ઓળખ ઊભી કરી હતી. તેણે પીડિત યુવતીને પોતે હિન્દુ અને અવિવાહિત હોવાનું જૂઠું જણાવ્યું હતું. આ નકલી પ્રોફાઈલ અને મીઠી-મીઠી વાતોના સહારે તેણે યુવતી સાથે મિત્રતા કેળવી અને ધીમે-ધીમે તેને પ્રેમજાળમાં ફસાવી દીધી હતી.
લગ્નની લાલચ આપી શારીરિક શોષણ અને ₹3.50 લાખની ઠગાઈ
યુવતીનો વિશ્વાસ જીત્યા બાદ આરોપી તેને લગ્નની લાલચ આપવા લાગ્યો હતો. આ દરમિયાન તે પીડિતાને સુરત અને દ્વારકાની વિવિધ હોટલોમાં લઈ ગયો હતો, જ્યાં તેણે યુવતીની મરજી વિરુદ્ધ અનેકવાર શારીરિક શોષણ (દુષ્કર્મ) કર્યું હોવાનો આક્ષેપ છે. આ ગાળા દરમિયાન, આરોપીએ પોતાની કથિત આર્થિક તંગી કે અન્ય વિવિધ બહાના હેઠળ પીડિત યુવતી પાસેથી કટકે-કટકે આશરે ₹3.50 લાખ જેટલી રકમ પણ પડાવી લીધી હતી.
સાચો ચહેરો સામે આવતા યુવતીના પગ નીચેથી જમીન સરકી ગઈ
રૂપિયા પડાવ્યા બાદ આરોપી અચાનક યુવતીથી અંતર બનાવવા લાગ્યો અને ફરાર થઈ ગયો. જ્યારે યુવતીએ આ બાબતે તપાસ કરી ત્યારે તેના હોશ ઊડી ગયા હતા. યુવતીને જાણ થઈ કે જે વ્યક્તિને તે હિન્દુ અને અવિવાહિત સમજીને પ્રેમ કરતી હતી, તે હકીકતમાં મુસ્લિમ છે. એટલું જ નહીં, તે અગાઉથી પરિણીત છે અને બે બાળકોનો પિતા પણ છે. પોતાની સાથે થયેલા આ ભયાનક વિશ્વાસઘાત બાદ પીડિતાએ હિંમત ભેગી કરીને સમગ્ર મામલાની ફરિયાદ પોલીસ મથકે નોંધાવી હતી.
ગુજરાતમાં ભાજપના 'સરપ્રાઈઝ' સિલેક્શન પાછળનું શું છે મોટું રાજકીય ગણિત : જાણો કોણ છે આ 4 નવા ચહેરા
વેસુ પોલીસે રાજકોટથી આરોપીને દબોચ્યો
યુવતીની ફરિયાદના આધારે સુરતના વેસુ પોલીસ સ્ટેશનમાં આરોપી વિરુદ્ધ બળાત્કાર (દુષ્કર્મ), છેતરપિંડી અને ધાર્મિક ઓળખ છુપાવવા સહિતની વિવિધ કડક કલમો હેઠળ ગુનો દાખલ કરવામાં આવ્યો હતો. મામલાની ગંભીરતાને જોતા પોલીસે તાત્કાલિક એક્શન લીધા હતા. વેસુ પોલીસની ટીમે ટેક્નિકલ સર્વેલન્સ અને ખાનગી બાતમીદારોના નેટવર્કનો ઉપયોગ કરીને આરોપીનું લોકેશન ટ્રેસ કર્યું હતું. પોલીસને ચોક્કસ માહિતી મળી હતી કે આરોપી હાલ રાજકોટમાં છુપાયેલો છે. જેના આધારે પોલીસે તાબડતોડ રાજકોટમાં દરોડો પાડીને આરોપીની ધરપકડ કરી લીધી છે. હાલ પોલીસ આરોપીને સુરત લાવીને તેની આકરી પૂછપરછ કરી રહી છે અને આ ગુનામાં અન્ય કોઈની સંડોવણી છે કે કેમ તે દિશામાં વધુ તપાસ હાથ ધરી છે.
પોલીસની અપીલ
સોશિયલ મીડિયા કે ડેટિંગ એપ્સ પર અજાણી વ્યક્તિઓ સાથે મિત્રતા કરતા પહેલા તેમની ઓળખની સંપૂર્ણ ખાતરી કરી લેવી હિતાવહ છે, જેથી આવા ભેજાબાજોના શિકાર બનવાથી બચી શકાય.
