દિલ્હીની હોટેલમાં આગ બાદ સુરત ફાયર વિભાગ એક્શનમાં : શહેરભરની હોટેલ-રેસ્ટોરન્ટમાં કરાઈ તપાસ

દિલ્હીમાં હોટેલમાં સર્જાયેલી આગની ગંભીર ઘટના બાદ સુરત ફાયર વિભાગ સતર્ક બની ગયું છે. શહેરમાં કોઈપણ પ્રકારની આગજન્ય દુર્ઘટના ન બને અને જાહેર સ્થળોએ ફાયર સેફ્ટીના નિયમોનું પાલન થાય તે માટે ફાયર વિભાગ દ્વારા વિશેષ ચકાસણી અભિયાન શરૂ કરવામાં આવ્યું છે. આ અભિયાન હેઠળ શહેરની વિવિધ હોટેલો, રેસ્ટોરન્ટો અને કોમર્શિયલ એકમોમાં આકસ્મિક તપાસ હાથ ધરવામાં આવી રહી છે.

ફાયર વિભાગની ટીમો દ્વારા સ્થળ પર પહોંચી ફાયર સેફ્ટીના સાધનો કાર્યરત છે કે નહીં, ફાયર એલાર્મ સિસ્ટમ યોગ્ય રીતે કામ કરે છે કે નહીં તેમજ ઇમરજન્સી એક્ઝિટ અને ફાયર ફાઈટિંગ સાધનોની ઉપલબ્ધતા અંગે સઘન તપાસ કરવામાં આવી રહી છે. ખાસ કરીને વધુ ભીડભાડ ધરાવતા અને સાંકડા પ્રવેશ-નિર્ગમન માર્ગો ધરાવતા સ્થળો પર વિશેષ ધ્યાન આપવામાં આવી રહ્યું છે.

હોટેલ અને રેસ્ટોરન્ટ સંચાલકોમાં દોડધામ

ફાયર વિભાગની આકસ્મિક તપાસના પગલે શહેરના હોટેલ અને રેસ્ટોરન્ટ સંચાલકોમાં દોડધામ જોવા મળી રહી છે. અનેક સ્થળોએ ફાયર સેફ્ટી સંબંધિત દસ્તાવેજો, એનઓસી અને સાધનોની સ્થિતિ અંગે તપાસ કરવામાં આવી રહી છે. અધિકારીઓ દ્વારા સ્થળ પર જ જરૂરી સૂચનાઓ પણ આપવામાં આવી રહી છે.

ફાયર વિભાગના સૂત્રોના જણાવ્યા અનુસાર, જ્યાં ફાયર સેફ્ટીના નિયમોનું પાલન કરવામાં ખામી જોવા મળશે અથવા જરૂરી સુરક્ષા સાધનો ઉપલબ્ધ નહીં હોય ત્યાં કાયદેસરની કાર્યવાહી કરવામાં આવશે. આ ઉપરાંત ગંભીર બેદરકારી સામે દંડાત્મક પગલાં પણ લેવામાં આવી શકે છે.

આ પણ વાંચો: દિલ્હી બાદ બિહારમાં પણ અગ્નિકાંડ! : હોસ્પિટલના ICUમાં અચાનક આગથી હાહાકાર! 3 મોત, અનેક ઘાયલ

આગ જેવી દુર્ઘટનાઓ અટકાવવા ખાસ અભિયાન

દિલ્હીમાં બનેલી દુર્ઘટનાએ દેશભરના ફાયર તંત્રને વધુ સતર્ક બનાવ્યા છે. સુરત ફાયર વિભાગ પણ હવે આગ જેવી દુર્ઘટનાઓને રોકવા માટે પૂર્વ સાવચેતીના ભાગરૂપે વિવિધ જાહેર સ્થળોની ચકાસણી કરી રહ્યું છે. વિભાગનું માનવું છે કે સમયસરની તપાસ અને નિયમોના કડક અમલથી મોટી જાનહાનિ અને નુકસાન અટકાવી શકાય છે. ફાયર વિભાગે હોટેલ અને રેસ્ટોરન્ટ સંચાલકોને ફાયર સેફ્ટી અંગે સંપૂર્ણ તકેદારી રાખવા, નિયમિત મેન્ટેનન્સ કરવા અને કર્મચારીઓને ઇમરજન્સી પરિસ્થિતિમાં કામ લાગે તેવી તાલીમ આપવા પણ અપીલ કરી છે.

આ પણ વાંચો: હૈદરાબાદના હેલ્મેટ માર્કેટમાં અચાનક ભભૂકી ઉઠી ભીષણ આગ! : ધુમાડાથી બજારમાં અફરાતફરી, 7 સાત ફાયર એન્જિન તૈનાત

સુરક્ષા પ્રત્યે બેદરકારી સહન નહીં

અધિકારીઓએ સ્પષ્ટ કર્યું છે કે જાહેર સુરક્ષા સાથે કોઈ પણ પ્રકારનો ચેડાં સહન કરવામાં આવશે નહીં. આગની ઘટના સમયે લોકોને સુરક્ષિત રીતે બહાર કાઢી શકાય તે માટે જરૂરી તમામ વ્યવસ્થાઓ કાર્યરત હોવી ફરજિયાત છે. આગામી દિવસોમાં પણ શહેરભરમાં આ પ્રકારની તપાસ સતત ચાલુ રહેશે.