Siri Will Not Work as Girlfriend: આર્ટિફિશિયલ ઇન્ટેલિજન્સના યુગમાં લોકો હવે AI ચેટબોટ્સ સાથે માત્ર માહિતી મેળવવા પૂરતા મર્યાદિત રહ્યા નથી, પરંતુ કેટલાક યુઝર્સ તેમની સાથે ભાવનાત્મક જોડાણ પણ બનાવવા લાગ્યા છે. બજારમાં અનેક AI પ્લેટફોર્મ એવા પણ ઉપલબ્ધ છે જે વર્ચ્યુઅલ ગર્લફ્રેન્ડ, બોયફ્રેન્ડ અથવા ડિજિટલ કમ્પેનિયન તરીકે સેવા આપે છે. પરંતુ એપલે સ્પષ્ટ શબ્દોમાં કહી દીધું છે કે તેનું વોઈસ આસિસ્ટન્ટ સિરી આ દિશામાં આગળ વધવાનું નથી. એપલના સોફ્ટવેર ચીફ ક્રેગ ફેડરિગીએ તાજેતરમાં જણાવ્યું કે સિરીનો મુખ્ય હેતુ યુઝર્સને રોજિંદા જીવનમાં મદદ કરવાનો છે, તેમની સાથે રોમેન્ટિક સંબંધો બાંધવાનો નહીં. WWDC 2026 બાદ સિરીના નવા AI સંસ્કરણને લઈને ચાલી રહેલી ચર્ચાઓ વચ્ચે કંપનીએ પોતાના અભિગમને સ્પષ્ટ કરીને AI ક્ષેત્રમાં પોતાની અલગ ઓળખ દર્શાવી છે.
'સિરીને આમાં જરાય રસ નથી': ક્રેગ ફેડરિગી
એક ઇન્ટરવ્યુ દરમિયાન જ્યારે એપલના સોફ્ટવેર ચીફ ક્રેગ ફેડરિગીને પૂછવામાં આવ્યું કે શું ભવિષ્યમાં યુઝર્સ સિરીને પોતાની AI ગર્લફ્રેન્ડ અથવા બોયફ્રેન્ડ તરીકે ઉપયોગ કરી શકશે, ત્યારે તેમણે આ વિચારને સંપૂર્ણપણે નકારી કાઢ્યો હતો. ફેડરિગીએ હળવા અંદાજમાં કહ્યું, "સિરી તમને કહેવા માંગે છે કે હું અહીં તે કામ માટે નથી. હું તમારી મદદ કરવા માટે છું, તમારા કાર્યો સરળ બનાવવા માટે છું અને દુનિયા વિશે વધુ માહિતી મેળવવામાં સહાય કરવા માટે છું. રોમેન્ટિક સંબંધો માટે સિરીને બિલકુલ રસ નથી." તેમણે ઉમેર્યું કે એપલનો અભિગમ અન્ય AI ચેટબોટ્સથી અલગ છે, કારણ કે કેટલીક કંપનીઓ યુઝર્સ સાથે ભાવનાત્મક જોડાણ ઉભું કરવાની દિશામાં કામ કરી રહી છે.
iOS 27 સાથે વધુ સ્માર્ટ બનશે સિરી
એપલ આગામી iOS 27 અપડેટ સાથે સિરીને વધુ બુદ્ધિશાળી અને વ્યક્તિગત અનુભવ આપવાના પ્રયાસમાં છે. કંપનીનું કહેવું છે કે નવી પેઢીની સિરી વધુ કુદરતી રીતે વાતચીત કરી શકશે અને યુઝર્સની જરૂરિયાતોને વધુ સારી રીતે સમજી શકશે. એપલના માર્કેટિંગ ચીફ ગ્રેગ જોસ્વિયાકે જણાવ્યું કે કંપની માત્ર AIનો ટ્રેન્ડ અનુસરવા માટે ટેક્નોલોજી વિકસાવી રહી નથી, પરંતુ તેનો હેતુ એ છે કે AI ફીચર્સ રોજિંદા જીવનનો સહજ ભાગ બની જાય. તેમણે કહ્યું, "અમે એવું AI બનાવવા માગીએ છીએ જેને ઉપયોગ કરવા માટે લોકોને કોઈ વિશેષ ટેક્નિકલ જ્ઞાન અથવા પ્રોમ્પ્ટિંગની કુશળતા ન હોવી જોઈએ."
આ પણ વાંચો: Instagram પર લાખો ફોલોઅર્સ વગર પણ ₹50,000 કમાઈ શકાય? : જાણો સ્માર્ટ લોકોનું સિક્રેટ
એપલ માટે પ્રાઇવસી સૌથી મોટી પ્રાથમિકતા
એપલ લાંબા સમયથી પ્રાઇવસી કેન્દ્રિત ટેક્નોલોજી માટે જાણીતી કંપની રહી છે અને AI ક્ષેત્રમાં પણ કંપની આ જ સિદ્ધાંતને અનુસરી રહી છે. ક્રેગ ફેડરિગીએ જણાવ્યું કે, એપલ અન્ય ઘણી કંપનીઓની જેમ યુઝર્સનો વ્યક્તિગત ડેટા ખુલ્લેઆમ ક્લાઉડ પર સંગ્રહિત કરતી નથી. સિરી મોટાભાગની માહિતી યુઝરના પોતાના ડિવાઇસ પર જ પ્રોસેસ કરે છે, જેના કારણે ડેટાની સુરક્ષા વધુ મજબૂત બને છે. કંપનીનું માનવું છે કે, AIની પ્રગતિ સાથે યુઝર્સની ગોપનીયતા જાળવવી એટલી જ મહત્વપૂર્ણ છે જેટલી નવી સુવિધાઓ આપવી.
AI કમ્પેનિયન ટ્રેન્ડથી દૂર રહેવાનો એપલનો નિર્ણય
તાજેતરના સમયમાં અનેક AI પ્લેટફોર્મ યુઝર્સને વર્ચ્યુઅલ મિત્રતા અને ભાવનાત્મક સહયોગ આપવાનો દાવો કરી રહ્યા છે. પરંતુ એપલનો સ્પષ્ટ સંદેશ છે કે સિરી માત્ર એક કાર્યક્ષમ ડિજિટલ આસિસ્ટન્ટ તરીકે જ કામ કરશે. કંપનીનો ફોકસ એવા AI પર છે જે યુઝર્સને કામ પૂર્ણ કરવામાં, માહિતી શોધવામાં અને ડિજિટલ જીવનને વધુ સરળ બનાવવામાં મદદ કરે, પરંતુ માનવીય સંબંધોનું સ્થાન લેવાનો પ્રયાસ ન કરે.
