લગ્નના માત્ર એક મહિનામાં જ નવવિવાહિતાની હત્યા! : ઘરમાંથી જ મળ્યો દફનાવેલો મૃતદેહ, પતિના એક ફોનથી ખુલ્યું હચમચાવી દેનારું રહસ્ય!

Siddharthnagar Murder Case: ઉત્તર પ્રદેશના સિદ્ધાર્થનગર જિલ્લામાંથી એક હચમચાવી દેનારો મામલો સામે આવ્યો છે. અહીં લગ્નના માત્ર એક મહિનામાં જ એક નવવિવાહિતાની હત્યા કરી તેના મૃતદેહને ઘરના રૂમમાં દફનાવી દેવામાં આવ્યો હોવાનો આરોપ છે. મૃતકના પરિવારની ફરિયાદ બાદ પોલીસે મૃતદેહ બહાર કાઢી પોસ્ટમોર્ટમ માટે મોકલી આપ્યો છે અને સમગ્ર મામલે તપાસ શરૂ કરી છે.

પતિએ સાસુને ફોન કરીને આપી હત્યાની જાણ

પોલીસના જણાવ્યા મુજબ, મૃતકની માતાનો આરોપ છે કે તેના જમાઈએ ફોન કરીને કહ્યું હતું કે, 'તમારી દીકરીની હત્યા કરીને તેને ઘરમાં જ દફનાવી દીધી છે.' આ વાત સાંભળતા જ મૃતકની માતાએ તાત્કાલિક પોલીસનો સંપર્ક કર્યો અને સમગ્ર ઘટનાની જાણ કરી. ફરિયાદ મળતાં જ પોલીસની ટીમ સ્થળ પર પહોંચી હતી. મેજિસ્ટ્રેટની હાજરીમાં ઘરના એક રૂમમાં ખોદકામ કરાવી મૃતદેહ બહાર કાઢવામાં આવ્યો અને પોસ્ટમોર્ટમ માટે મોકલવામાં આવ્યો.

1 જૂને થયા હતા લગ્ન

માહિતી અનુસાર, સંત કબીરનગર જિલ્લાના દશહવા ગામની રહેવાસી મુફીદુન્નિશાના લગ્ન 1 જૂન, 2026ના રોજ સિદ્ધાર્થનગર જિલ્લાના ચકમઝારી ગામના રહેવાસી શમશેર અહમદ સાથે મુસ્લિમ રીતિ-રિવાજ મુજબ થયા હતા.

પરિવારનો આરોપ છે કે લગ્ન બાદથી જ સાસરિયાઓ એક લાખ રૂપિયાના દહેજની માંગ કરી યુવતીને સતત માનસિક અને શારીરિક રીતે હેરાન કરતા હતા.

દહેજ માટે મારપીટ બાદ હત્યાનો આરોપ

મૃતકના પરિવારનો દાવો છે કે દહેજની માંગ પૂર્ણ ન થતાં યુવતી સાથે વારંવાર મારપીટ કરવામાં આવતી હતી. અંતે તેની હત્યા કરીને પુરાવા છુપાવવાના પ્રયાસરૂપે મૃતદેહને ઘરના અંદર જ દફનાવી દેવામાં આવ્યો.

આ ઘટનાએ સમગ્ર વિસ્તારમાં ચકચાર મચાવી દીધી છે.

આ પણ વાંચો: જજની ખુરશી પર કાળો જાદુ! : CCTV સામે આવતા 65 વર્ષની મહિલાની ધરપકડ, શું છે આખો કેસ?

પોલીસે ત્રણ આરોપીઓને કસ્ટડીમાં લીધા

આ મામલે પોલીસ અધિકારીએ જણાવ્યું કે મૃતકની માતાની ફરિયાદના આધારે દહેજ હત્યા સહિત સંબંધિત કલમો હેઠળ કેસ નોંધવામાં આવ્યો છે.

પોલીસે શમશેર અહમદ, હબીબુલ્લા અને ખુશબૂનિશાને કસ્ટડીમાં લઈને પૂછપરછ શરૂ કરી છે. સાથે જ કેસમાં અન્ય કોઈની સંડોવણી છે કે નહીં તે દિશામાં પણ તપાસ ચાલી રહી છે.

પોસ્ટમોર્ટમ રિપોર્ટ અને ફોરેન્સિક તપાસના આધારે આગળની કાયદેસરની કાર્યવાહી કરવામાં આવશે.

દહેજ પ્રથા સામે ફરી ઉઠ્યા પ્રશ્નો

આ ઘટના ફરી એકવાર સમાજમાં દહેજ જેવી કુપ્રથા સામે ગંભીર પ્રશ્નો ઊભા કરે છે. લગ્ન બાદ મહિલાઓ પર થતા અત્યાચાર અને દહેજ માટેના ગુનાઓને રોકવા માટે કડક કાનૂની કાર્યવાહી અને સામાજિક જાગૃતિ બંને જરૂરી હોવાનું નિષ્ણાતો માને છે.