Shreyas Iyer Comeback: ભારતીય ક્રિકેટ ટીમના મિડલ ઓર્ડર બેટ્સમેન શ્રેયસ અય્યરે વિજય હજારે ટ્રોફીમાં ધમાકેદાર કમબેક કર્યું છે. હિમાચલ પ્રદેશ સામેની મેચમાં તેમણે માત્ર 53 બોલમાં 82 રનની શાનદાર ઇનિંગ રમી, જેમાં 10 ચોક્કા અને 3 છગ્ગા સામેલ હતા. આ ઇનિંગ એટલી ખાસ છે કારણ કે શ્રેયસ ગંભીર ઇજાના કારણે લગભગ ત્રણ મહિના બાદ પ્રતિસ્પર્ધાત્મક ક્રિકેટમાં કમબેક કરી રહ્યા હતા. તેમની આ ઇનિંગએ માત્ર ફોર્મ જ નહીં પરંતુ ફિટનેસ પણ સાબિત કરી દીધી છે.
હિમાચલ પ્રદેશ સામે શ્રેયસ અય્યરે 82 રનની શાનદાર પારી રમી
વિજય હજારે ટ્રોફી 2025-26ના છઠ્ઠા રાઉન્ડમાં જયપુરમાં હિમાચલ પ્રદેશ સામે મુંબઈની ટીમે પ્રથમ બેટિંગ કરી હતી. ધુમ્મસને કારણે મેચમાં વિલંબ થયો અને મેચ 33 ઓવરની કરવામાં આવી. શ્રેયસ અય્યરે આક્રમક બેટિંગ કરી 53 બોલમાં 82 રન બનાવ્યા. તે શતક તરફ આગળ વધી રહ્યા હતા પરંતુ કુશલ પાલની બોલ પર અમનપ્રીતને કેચ આઉટ થઈ ગયા. આ ઇનિંગમાં તેમણે 58 રન માત્ર બાઉન્ડ્રીઝથી બનાવ્યા, જે તેમની શાનદાર ટાઇમિંગ અને ફોર્મ દર્શાવે છે.
શ્રેયસ અય્યરે મુશ્કેલીમાં ટીમને સંભાળી
શ્રેયસ અય્યરની 82 રનની ઇનિંગની સૌથી મોટી ખાસિયત એ હતી કે તેમણે મુશ્કેલીના સમયે રન બનાવ્યા. મુંબઈએ શરૂઆતમાં જ બે વિકેટ ગુમાવી દીધી હતી. યશસ્વી જયસ્વાલ 15 રન અને સરફરાઝ ખાન 21 રન બનાવીને આઉટ થયા. ત્યાર બાદ શ્રેયસે મુશીર ખાન સાથે મળીને મહત્વની પાર્ટનરશીપ કરી. શરૂઆતમાં તેમણે ધીમી બેટિંગ કરી, પ્રથમ 18 બોલમાં માત્ર 8 રન બનાવ્યા, પરંતુ એકવાર સેટ થયા પછી ચારેબાજુ શોટ્સ માર્યા. તેમણે મયંક ડાગર, કુશલ પાલ અને અભિષેક કુમાર જેવા બોલરોને આડેધડ માર્યા. 20 ડોટ બોલ રમવા છતાં દર ચોથા બોલ પર બાઉન્ડ્રી મારવી એ તેમની ક્લાસ દર્શાવે છે.
શ્રેયસ અય્યરે ફિટનેસ ટેસ્ટ પાસ કર્યો
શ્રેયસ અય્યર માટે આ મેચ માત્ર મેચ નહીં પરંતુ ફિટનેસ ટેસ્ટ હતી. તેઓ ન્યૂઝીલેન્ડ સામેની વનડે સિરીઝ માટે ટીમમાં પસંદ થયા છે, પરંતુ મેચ ફિટનેસના આધારે જ તેઓ રમી શકશે. BCCI એ તેમને વિજય હજારે ટ્રોફીની આ મેચ રમીને ફિટનેસ સાબિત કરવા કહ્યું હતું અને હવે તેમણે ફિટનેસ સાથે ફોર્મ પણ સાબિત કરી દીધી છે. વિજય હજારે ટ્રોફીમાં શ્રેયસનો રેકોર્ડ શાનદાર છે. 60થી વધુની એવરેજ, 1900થી વધુ રન, 7 સદી અને 8 અર્ધસદી.
