શિયાળાની કડકડતી ઠંડીમાં ગરમ પાણીથી ન્હાવું કોને ન ગમે? તે શરીરને આરામ આપે છે અને ઠંડીમાં રાહત આપે છે. પરંતુ જ્યારે વાત વાળની આવે છે, ત્યારે આ જ ગરમ પાણી તમારા વાળના સ્વાસ્થ્ય માટે દુશ્મન બની શકે છે. આજની વ્યસ્ત જીવનશૈલીમાં લોકો વાળની સંભાળ માટે હજારો રૂપિયા ખર્ચીને મોંઘા તેલ, શેમ્પૂ અને હેર સ્પા કરાવે છે, પરંતુ તેમના વાળમાં કોઈ સુધારો નથી થતો. કારણ? તેમની એક સામાન્ય ભૂલ – વાળ ધોવા માટે પાણીના તાપમાનનું ધ્યાન ન રાખવું. શિયાળામાં ઘણા લોકો ગરમ પાણીથી વાળ ધોવાની આદતને કારણે વાળ શુષ્ક થઈ જાય છે, તૂટવા લાગે છે અને સ્કેલ્પમાં તકલીફ વધે છે. તો સવાલ થાય છે કે શિયાળામાં વાળ ધોવા માટે ગરમ પાણી, ઠંડું પાણી કે હૂંફાળું પાણી કયું સૌથી યોગ્ય છે? આવો જાણીએ...
વાળ પર ગરમ પાણીની અસર: ફાયદા અને નુકસાન
ગરમ પાણી તૈલી સ્કેલ્પવાળા લોકો માટે ફાયદાકારક હોઈ શકે છે, કારણ કે તે વાળના પડને ખોલીને ગંદકી અને વધારાનું તેલ સાફ કરે છે. પરંતુ અતિશય ગરમ પાણીનો વારંવાર ઉપયોગ સ્કેલ્પના કુદરતી તેલને છીનવી લે છે, જેનાથી વાળ શુષ્ક અને નબળા થઈ જાય છે. આનાથી વાળ તૂટવા, ફ્રીઝ વધવા અને હેર ફોલની સમસ્યા વધી શકે છે. શિયાળામાં આ સમસ્યા વધુ વકરે છે, કારણ કે ઠંડીમાં વાળ પહેલેથી જ શુષ્ક હોય છે.
ઠંડા પાણીથી વાળ ધોવાના ફાયદા: ચમક અને મજબૂતી વધે છે
ઠંડું પાણી વાળના ક્યુટિકલ્સને બંધ કરે છે, જેનાથી ભેજ અંદર જળવાઈ રહે છે. આનાથી વાળ સ્મૂધ, ચમકદાર અને ઓછા ફ્રીઝી દેખાય છે. તે શુષ્ક અને ડેમેજ વાળ માટે ખાસ કરીને ફાયદાકારક છે. આ સિવાય ઠંડું પાણી સ્કેલ્પમાં બ્લડ સર્ક્યુલેશન વધારવામાં મદદ કરે છે, જે વાળની ગ્રોથ માટે સારું માનવામાં આવે છે.
સ્કેલ્પ માટે કયું પાણી વધુ સારું છે?
જે લોકોનો સ્કેલ્પ નબળો હોય એવા લોકોએ ગરમ પાણીથી બચવું જોઈએ, કારણ કે તેનાથી બળતરા, ખંજવાળ અને એક્ઝિમા જેવી સમસ્યાઓ થઈ શકે છે. ઠંડું અથવા હૂંફાળું પાણી સ્કેલ્પને આરામ આપે છે અને સોજો ઘટાડે છે. પાણીનું તાપમાન સ્કેલ્પના કુદરતી તેલને જાળવી રાખે તેવું હોવું જોઈએ.
એક્સપર્ટની સલાહ: વાળ ધોવાની સાચી રીત
એક્સપર્ટ અનુસાર, વાળ ધોવાની સાચી રીતની વાત કરીએ તો, હૂંફાળું પાણી મોટાભાગના લોકો માટે શ્રેષ્ઠ વિકલ્પ છે. તે ભેજ છીનવી લીધા વિના સ્કેલ્પને સાફ કરે છે. જો તમે ઈચ્છો તો, છેલ્લે વાળને ઠંડા કે હૂંફાળા પાણીથી એકવાર ફરી ધોઈ શકો છો. પાણીનું યોગ્ય તાપમાન અપનાવીને તમે લાંબા સમય સુધી તમારા વાળને સ્વસ્થ, મુલાયમ અને મજબૂત રાખી શકો છો. તમારા વાળના પ્રકાર અને સ્કેલ્પની સ્થિતિ અનુસાર આ સલાહ અમલમાં મૂકો અને જો સમસ્યા વધે તો ડોક્ટરની સલાહ લો.
