Stock Market Today: ભારતીય શેરબજારમાં આજે મિશ્ર વલણ જોવા મળી રહ્યું છે. સપ્તાહના પ્રથમ કારોબારી દિવસે સેન્સેક્સ અને નિફ્ટી સપાટ સ્તરે ટ્રેડ કરી રહ્યા છે. બજારના શરૂઆતી કારોબારમાં તેજી બાદ હાલમાં તે ફરી સપાટ સ્તરે આવી ગયા છે. આજના સત્રમાં આઈટી સેક્ટરના શેર્સમાં જોરદાર ખરીદી જોવા મળી રહી છે. સોમવારના કારોબારમાં ભારતીય શેરબજારે શરૂઆતમાં સકારાત્મક વલણ દર્શાવ્યું હતું, પરંતુ થોડા સમય બાદ નફાવસૂલી અને સેક્ટરલ દબાણને કારણે મુખ્ય સૂચકાંકો સપાટ સ્તરે આવી ગયા હતા. સેન્સેક્સ અને નિફ્ટી બંનેમાં મિશ્ર ટ્રેન્ડ જોવા મળ્યો, જેમાં IT શેરોએ બજારને ટેકો આપ્યો જ્યારે FMCG, ઓટો અને હેલ્થકેર સેક્ટરમાં વેચવાલીનું દબાણ જોવા મળ્યું. બજાર ખુલતાં સેન્સેક્સ 500 પોઈન્ટ સુધી મજબૂત બન્યો હતો અને નિફ્ટી 23,600ની સપાટી પાર કરી હતી. જોકે દિવસ આગળ વધતાં બંને સૂચકાંકોની તેજી ઓછી થઈ ગઈ. બજારમાં કુલ 1,796 શેરોમાં વધારો જ્યારે 1,753 શેરોમાં ઘટાડો નોંધાયો હતો, જે રોકાણકારોની સાવચેત વૃત્તિ દર્શાવે છે.
IT શેરોમાં તેજી, FMCG અને ઓટો શેરોમાં દબાણ
નિફ્ટીમાં ઇન્ટરગ્લોબ એવિએશન, એશિયન પેઇન્ટ્સ, ટેક મહિન્દ્રા, TCS અને ઇન્ફોસિસ જેવા શેરોમાં ખરીદી જોવા મળી હતી. બીજી તરફ HUL, NTPC, મહિન્દ્રા એન્ડ મહિન્દ્રા, અદાણી એન્ટરપ્રાઇઝિસ અને શ્રીરામ ફાઇનાન્સ જેવા શેરો દબાણ હેઠળ રહ્યા હતા. BSE IT ઇન્ડેક્સમાં 3 ટકાથી વધુનો ઉછાળો નોંધાયો હતો. ઇન્ફોસિસ, પર્સિસ્ટન્ટ સિસ્ટમ્સ, ટેક મહિન્દ્રા અને કોફોર્જ જેવા શેરોમાં મજબૂત ખરીદી જોવા મળી હતી. બીજી તરફ FMCG ઇન્ડેક્સ સતત ત્રીજા દિવસે નબળો રહ્યો હતો.
ઈનોક્સ વિન્ડના નફામાં 51%નો ઘટાડો, શેરમાં ભારે વેચવાલી
ઈનોક્સ વિન્ડના ચોથા ત્રિમાસિક પરિણામો બજારની અપેક્ષા મુજબ ન આવતા કંપનીના શેરમાં ભારે ઘટાડો નોંધાયો હતો. કંપનીનો નફો વર્ષ દરમિયાન 51 ટકા ઘટીને રૂ. 91.3 કરોડ રહ્યો હતો, જ્યારે આવકમાં પણ થોડો ઘટાડો નોંધાયો હતો. પરિણામ બાદ શેરમાં 7 ટકા કરતાં વધુનો ઘટાડો જોવા મળ્યો હતો.
ઓલેક્ટ્રા ગ્રીનટેક અને લ્યુમેક્સ ઓટો ટેક્નોલોજીમાં તેજી
ઓલેક્ટ્રા ગ્રીનટેકના નફામાં 164 ટકાનો જબરદસ્ત ઉછાળો નોંધાતા કંપનીનો શેર 6 ટકા કરતાં વધુ વધ્યો હતો. કંપનીની આવકમાં પણ 43 ટકાથી વધુનો વધારો નોંધાયો હતો.
લ્યુમેક્સ ઓટો ટેક્નોલોજીના પરિણામો પણ મજબૂત રહ્યા હતા. કંપનીનો નફો 51 ટકા વધીને રૂ. 88 કરોડ થયો હતો જ્યારે આવકમાં 25 ટકાનો વધારો નોંધાયો હતો. પરિણામ બાદ શેરમાં 3 ટકા જેટલી તેજી જોવા મળી હતી.
NMDC અને NMDC સ્ટીલના પરિણામોથી રોકાણકારોમાં ઉત્સાહ
NMDCએ ચોથા ત્રિમાસિક ગાળામાં 36 ટકા નફો વૃદ્ધિ સાથે રૂ. 2,017 કરોડનો નફો નોંધાવ્યો હતો. કંપનીની આવકમાં પણ 62 ટકા જેટલો વધારો થયો હતો. બીજી તરફ NMDC સ્ટીલના શેરોએ 52 સપ્તાહની નવી ઊંચી સપાટી સ્પર્શી હતી. કંપનીના શેરમાં લગભગ 15 ટકાનો ઉછાળો નોંધાયો હતો, જેના કારણે રોકાણકારોમાં ઉત્સાહ જોવા મળ્યો હતો.
ગુજરાત ગેસનો નફો 11 ગણો વધ્યો છતાં શેરમાં ઘટાડો
ગુજરાત ગેસે ચોથા ત્રિમાસિક ગાળામાં 11 ગણો નફો નોંધાવ્યો હતો. કંપનીનો નફો રૂ. 351 કરોડ સુધી પહોંચ્યો હતો. જોકે આવકમાં ઘટાડો અને અન્ય પરિબળોને કારણે શેરમાં લગભગ 3 ટકાનો ઘટાડો નોંધાયો હતો. મહિન્દ્રા એન્ડ મહિન્દ્રાએ મે મહિનામાં કુલ વાહન વેચાણમાં 20 ટકાનો વધારો નોંધાવ્યો હતો. કંપનીએ કુલ 99,636 વાહનોનું વેચાણ કર્યું હતું. જોકે શેરબજારમાં ઓટો સેક્ટર પર દબાણને કારણે કંપનીનો શેર ઘટાડા સાથે કારોબાર કરતો જોવા મળ્યો હતો. હ્યુન્ડાઈ મોટર ઈન્ડિયા અને એસ્કોર્ટ્સ કુબોટાએ પણ મે મહિનાના વેચાણમાં વૃદ્ધિ નોંધાવી હતી. હ્યુન્ડાઈએ કુલ 61,137 યુનિટનું વેચાણ કર્યું હતું જ્યારે એસ્કોર્ટ્સ કુબોટાના ટ્રેક્ટર વેચાણમાં 19 ટકાનો વધારો નોંધાયો હતો.
નિષ્ણાતો શું કહે છે?
જિયોજિત ઈન્વેસ્ટમેન્ટ્સના ચીફ ઈન્વેસ્ટમેન્ટ સ્ટ્રેટેજિસ્ટ વી.કે. વિજયકુમારના જણાવ્યા અનુસાર મધ્ય પૂર્વમાં ચાલી રહેલી અનિશ્ચિતતા અને કાચા તેલના વધતા ભાવને કારણે બજાર હાલમાં મર્યાદિત દાયરામાં રહી શકે છે. તેમ છતાં મિડકેપ અને સ્મોલકેપ કંપનીઓના સારા પરિણામો બજારને ટેકો આપી રહ્યા છે. તેમણે જણાવ્યું હતું કે આગામી 5 જૂનની RBIની મોનેટરી પોલિસી અને મે મહિનાના ઓટો વેચાણના આંકડા બજારની દિશા નક્કી કરવામાં મહત્વની ભૂમિકા ભજવશે.
રોકાણકારો માટે શું મહત્વનું?
હાલના સંજોગોમાં નિફ્ટી માટે 23,500ની સપાટી મહત્વપૂર્ણ સપોર્ટ માનવામાં આવી રહી છે. જો આ સ્તર જળવાઈ રહેશે તો બજારમાં સ્થિરતા જોવા મળી શકે છે. બીજી તરફ 23,800થી 24,000ની સપાટી પાર થતાં તેજીનો નવો તબક્કો શરૂ થઈ શકે છે.n રોકાણકારો માટે હાલ કંપનીઓના પરિણામો, RBIની નીતિ અને વૈશ્વિક બજારના સંકેતો પર નજર રાખવી જરૂરી બની છે.
