સલમાનનો જીવ જોખમમાં... સુરક્ષામાં ચૂક બાદ ફરી વધારાઈ સુરક્ષા : એપાર્ટમેન્ટમાં પ્રવેશતા પહેલા કરવામાં આવશે તપાસ

બોલિવૂડ સુપરસ્ટાર સલમાન ખાનની સુરક્ષા માટે કડક સુરક્ષા વ્યવસ્થા ગોઠવવામાં આવી હોવા છતાં આ અઠવાડિયાના સોમવાર અને મંગળવારે તેમના બાંદ્રા સ્થિત નિવાસસ્થાનમાં ઘૂસવાના અલગ-અલગ પ્રયાસો બદલ બે લોકોની ધરપકડ કરવામાં આવી હતી. આ ઘટનાઓએ ફરી એકવાર અભિનેતાની સલામતી અંગે ગંભીર ચિંતાઓ ઉભી કરી છે. ફિલ્મ અભિનેતા સલમાન ખાનના ઘરે સુરક્ષા વધુ વધારવામાં આવશે. પ્રવેશ માટે ઓળખ જરૂરી રહેશે. મુંબઈ પોલીસ સુરક્ષા પ્રોટોકોલ વધુ વધારવાનું વિચારી રહી છે.

સુરક્ષા વધારવામાં આવી
પોલીસ સૂત્રો પાસેથી મળેલી માહિતી અનુસાર, ગેલેક્સી એપાર્ટમેન્ટમાં ગેરકાયદેસર પ્રવેશ અટકાવવા માટે પોલીસ હવે સુરક્ષાને ધ્યાનમાં રાખીને કેટલાક નિયમો બનાવશે. જેમાં પ્રવેશતા લોકોની ઓળખ અને તેમને ક્યાં જવાનું છે તે સ્થળ પણ જરૂરી રહેશે. ફિલ્મ અભિનેતા સલમાન ખાનના ઘરમાં ઘૂસણખોરીની અનેક ઘટનાઓને ધ્યાનમાં રાખીને મુંબઈ પોલીસ ઘર અને ગેલેક્સી એપાર્ટમેન્ટની આસપાસના મુલાકાતીઓ માટે કેટલાક નિયમો નક્કી કરવાનું વિચારી રહી છે.

નિયમો નક્કી કરવામાં આવશે
તમને જણાવી દઈએ કે હાલમાં ફિલ્મ અભિનેતા સલમાન ખાનને Y પ્લસ કેટેગરીની સુરક્ષા આપવામાં આવી છે. પરંતુ ઘણી વખત એવું બન્યું છે કે સુરક્ષા ગાર્ડને ખોટું બોલીને અથવા અન્ય કોઈ રીતે કોઈ ગેલેક્સી એપાર્ટમેન્ટમાં પ્રવેશવાનો પ્રયાસ કરે છે. આ જ કારણ છે કે મુંબઈ પોલીસ હવે કેટલાક નિયમો બનાવવાની યોજના બનાવી રહી છે જેથી કોઈ પણ વ્યક્તિ ગેલેક્સી એપાર્ટમેન્ટમાં ગેરકાયદેસર રીતે પ્રવેશ ન કરી શકે.

બે દિવસમાં બે ઘટનાઓ
પહેલી ઘટનામાં 22 મેના રોજ સવારે 3:30 વાગ્યે ઈશા છાબરા નામની 32 વર્ષીય મહિલા સલમાન ખાનના મકાનની સુરક્ષા તોડવામાં સફળ રહી. અહેવાલ મુજબ, તે લિફ્ટ વિસ્તારમાં પહોંચી અને અભિનેતાના ઘરનો ડોરબેલ વગાડ્યો જ્યારે અભિનેતા અંદર હાજર હતા. આ ખતરનાક ઉલ્લંઘન બાદ પોલીસે તાત્કાલિક કાર્યવાહી કરી અને આપેલી માહિતી મુજબ બાંદ્રા પોલીસે તેની ધરપકડ કરી છે.

પોલીસ સૂત્રોના જણાવ્યા અનુસાર, ઈશા છાબરા અને અન્ય એક શંકાસ્પદ જિતેન્દ્ર કુમાર સિંહ એકબીજાને ઓળખતા નથી. ઈશાને 23 મે, 2025 સુધી પોલીસ કસ્ટડીમાં મોકલી દેવામાં આવી છે, અને આજે કોર્ટમાં રજૂ કરવામાં આવશે. 20 મેના રોજ સાંજે એક અલગ ઘટનામાં, 23 વર્ષીય જીતેન્દ્ર કુમાર સિંહ નામના વ્યક્તિએ ગેલેક્સી એપાર્ટમેન્ટમાં ઘૂસવાનો પ્રયાસ કર્યો, જ્યાં સલમાન ખાન રહે છે. પોલીસે જણાવ્યું હતું કે છત્તીસગઢનો વતની જીતેન્દ્ર બિલ્ડિંગમાં રહેતા એક વ્યક્તિના વાહન પાછળ છુપાઈને પરિસરમાં પ્રવેશવાનો પ્રયાસ કરી રહ્યો હતો. સુરક્ષા કર્મચારીઓએ તેને પકડી લીધો અને તેની સામે BNS ની કલમ 329(1) હેઠળ કેસ નોંધવામાં આવ્યો. બાંદ્રા પોલીસ બંને ઘટનાઓની સક્રિય તપાસ કરી રહી છે.