Sultan Box Office Collection: સલમાન ખાનના ફિલ્મી કરિયરમાં ઘણી બ્લોકબસ્ટર ફિલ્મો આવી છે, પરંતુ કેટલીક ફિલ્મો એવી હોય છે જે માત્ર કમાણી જ નહીં, પરંતુ સ્ટારડમને પણ નવી ઊંચાઈ પર પહોંચાડી દે છે. એવી જ એક ફિલ્મ હતી 'સુલ્તાન', જેણે સલમાન ખાનને માત્ર ભારતીય બોક્સ ઓફિસના નહીં, પરંતુ પાકિસ્તાનના બોક્સ ઓફિસના પણ 'સુલ્તાન' બનાવી દીધા હતા. 6 જુલાઈ, 2016ના રોજ ઈદના અવસરે રિલીઝ થયેલી આ ફિલ્મે રિલીઝ થતાં જ સિનેમાઘરોમાં ધૂમ મચાવી દીધી હતી. સલમાન ખાન અને અનુષ્કા શર્માની જોડી, કુસ્તીની પૃષ્ઠભૂમિ, લાગણીઓથી ભરેલી કહાની અને જબરદસ્ત સંગીતના કારણે ફિલ્મે દર્શકોના દિલ જીતી લીધા હતા. આજે પણ 'સુલ્તાન' સલમાન ખાનના કરિયરની સૌથી યાદગાર અને સફળ ફિલ્મોમાંની એક માનવામાં આવે છે.
સલમાન ખાનની કારકિર્દીની સૌથી મોટી હિટ્સમાં સામેલ
નિર્દેશક અલી અબ્બાસ ઝફરની સ્પોર્ટ્સ ડ્રામા ફિલ્મ 'સુલ્તાન'માં સલમાન ખાને હરિયાણાના નાના શહેરના પહેલવાન સુલ્તાન અલી ખાનનું પાત્ર ભજવ્યું હતું. ફિલ્મમાં તેની પ્રેમકથા, સંઘર્ષ, સપનાઓ અને કમબેકની કહાની દર્શાવવામાં આવી હતી. ફિલ્મમાં અનુષ્કા શર્માએ અરફાનું પાત્ર નિભાવ્યું હતું, જે પોતે પણ કુસ્તીબાજ છે. બંને કલાકારોની ઓનસ્ક્રીન કેમિસ્ટ્રીને દર્શકો દ્વારા ભારે પસંદ કરવામાં આવી હતી. સલમાન ખાનનો ટ્રાન્સફોર્મેશન, એક્શન દ્રશ્યો અને ભાવનાત્મક સંવાદોએ ફિલ્મને વધુ પ્રભાવશાળી બનાવી હતી.
માત્ર 90 કરોડના ખર્ચે બની અને 623 કરોડ કમાયા
અહેવાલો મુજબ, 'સુલ્તાન'નું કુલ બજેટ આશરે 90 કરોડ રૂપિયા હતું. જોકે ફિલ્મે વિશ્વભરમાં આશરે 623.33 કરોડ રૂપિયાની કમાણી કરીને બોક્સ ઓફિસ પર ઈતિહાસ રચ્યો હતો. ભારતમાં ફિલ્મે અંદાજે 421 કરોડ રૂપિયાની નેટ કમાણી નોંધાવી હતી, જ્યારે વિદેશી બજારોમાં પણ ફિલ્મે શાનદાર પ્રદર્શન કર્યું હતું. ખાસ કરીને પાકિસ્તાનમાં ફિલ્મે જબરદસ્ત સફળતા મેળવી હતી. ઈદના તહેવાર દરમિયાન રિલીઝ થયેલી આ ફિલ્મે પ્રથમ દિવસે લગભગ 3.5 કરોડ પાકિસ્તાની રૂપિયા અને બીજા દિવસે 4.1 કરોડ પાકિસ્તાની રૂપિયાની કમાણી કરી હતી. સમગ્ર રન દરમિયાન ફિલ્મે પાકિસ્તાનમાં અંદાજે 30 કરોડ રૂપિયાનો બિઝનેસ કર્યો હોવાનું માનવામાં આવે છે.
સંગીતે પણ ફિલ્મને બનાવી સુપરહિટ
ફિલ્મની સફળતામાં માત્ર સલમાન ખાન અને અનુષ્કા શર્માની જોડી જ નહીં પરંતુ સંગીતનું પણ વિશેષ યોગદાન રહ્યું હતું. વિશાલ-શેખર દ્વારા સંગીતબદ્ધ કરવામાં આવેલા ગીતો દર્શકોની પ્લેલિસ્ટમાં લાંબા સમય સુધી રાજ કરતા રહ્યા હતા. ફિલ્મના 'જગ ઘૂમેયા', 'સુલ્તાન' અને 'તુમ્હી હો બંદગી' જેવા ગીતોએ લોકપ્રિયતાના નવા રેકોર્ડ બનાવ્યા હતા. ફિલ્મને ચીન સહિતના અન્ય આંતરરાષ્ટ્રીય બજારોમાં પણ સારો પ્રતિસાદ મળ્યો હતો.
સલમાન ખાન માટે બન્યો માઈલસ્ટોન
'બજરંગી ભાઈજાન' બાદ 'સુલ્તાન' સલમાન ખાનના કરિયરની વધુ એક મેગા બ્લોકબસ્ટર ફિલ્મ સાબિત થઈ હતી. એટલું જ નહીં, સલમાન ખાનની આ સતત દસમી ફિલ્મ હતી જેણે 100 કરોડ ક્લબમાં સ્થાન મેળવ્યું હતું. આ પહેલા દબંગ, રેડી, બોડીગાર્ડ, એક થા ટાઈગર, દબંગ 2, જય હો, કિક, બજરંગી ભાઈજાન અને પ્રેમ રતન ધન પાયો જેવી ફિલ્મો પણ 100 કરોડથી વધુ કમાણી કરી ચૂકી હતી. 'સુલ્તાન'એ સલમાન ખાનને માત્ર બોક્સ ઓફિસના સુપરસ્ટાર તરીકે જ નહીં, પરંતુ મજબૂત અભિનેતા તરીકે પણ સ્થાપિત કરવામાં મહત્વની ભૂમિકા ભજવી હતી.
આ પણ વાંચો: "શરમ આવવી જોઈએ, ગુનો કોઈ રીતે યોગ્ય નથી" : કેતન અગ્રવાલ કેસમાં સિયા ગોયલના બચાવ પર ભડકી સુચિત્રા કૃષ્ણમૂર્તિ
સંજય દત્તને ઓફર થયો હતો મહત્વનો રોલ
ઘણા ઓછા લોકોને ખબર હશે કે ફિલ્મમાં ટ્રેનર ફતેહ સિંહનું પાત્ર સૌપ્રથમ સંજય દત્તને ઓફર કરવામાં આવ્યું હતું. પરંતુ તે સમય દરમિયાન સંજય દત્ત કાનૂની પ્રક્રિયાઓમાં વ્યસ્ત હોવાથી તેઓ આ ફિલ્મનો ભાગ બની શક્યા નહોતા. ત્યારબાદ આ મહત્વપૂર્ણ પાત્ર અભિનેતા રણદીપ હુડ્ડાએ નિભાવ્યું હતું, જેને પણ દર્શકો તરફથી ખૂબ પ્રશંસા મળી હતી. આ ફિલ્મને IMDb પર પણ 7.1/10ની રેટિંગ પ્રાપ્ત થઈ હતી, જે દર્શાવે છે કે માત્ર દર્શકો જ નહીં પરંતુ સમીક્ષકોએ પણ ફિલ્મને સારો પ્રતિસાદ આપ્યો હતો.
