પાક.માં સરકારી કર્મચારીઓના પગાર માટે રૂપિયા નથી અને : સાંસદોના પગારમાં 138%નો વધારો

પાકિસ્તાન ગરીબ દેશ છે તેમા કોઈ બે મત નથી પરંતુ હાલ તે મોટા આર્થિક સંકટનો સામનો કરી રહ્યું છે, પરંતુ આ દરમિયાન મંગળવારે પાકિસ્તાનમાં એક મહત્વપૂર્ણ નિર્ણય લેવામાં આવ્યો, જેમાં પાકિસ્તાની સાંસદોના પગારમાં 138%નો મોટો વધારો કરવામાં આવ્યો. હવે સાંસદોનો પગાર 2,18,000 પાકિસ્તાની રૂપિયાથી વધારીને 5,19,000 રૂપિયા કરવામાં આવ્યો છે, જે ભારતીય ચલણમાં લગભગ 1.62 લાખ રૂપિયા છે.

પાકિસ્તાન મુસ્લિમ લીગ-નવાઝ (પીએમએલ-એન)ના સાંસદ રોમિના ખુર્શીદ આલમે સંસદ સભ્યોના પગાર અને ભથ્થાં બિલ 2025 રજૂ કર્યું, જે પ્રચંડ બહુમતી સાથે પસાર થયું હતું.
આ બિલથી સાંસદોના પગાર ડબલથી પણ વધી ગયો છે.

બિલને મંજૂરી આપવામાં આવી
26 જાન્યુઆરી, 2025ના રોજ નેશનલ એસેમ્બલીની બજેટ સમિતિએ આ બિલને મંજૂરી આપી. આ બેઠકની અધ્યક્ષતા મુખ્યમંત્રી અયાઝ સાદિકે કરી. દેશની આ વિકટ આર્થિક સ્થિતિ હોવા છતાં, ન તો શાસક પક્ષ કે ન તો વિપક્ષી સાંસદોએ આ પગાર વધારા સામે કોઈ વાંધો ઉઠાવ્યો.

પાકિસ્તાનની આર્થિક સ્થિતિ
પાકિસ્તાન વર્ષોથી ગંભીર આર્થિક સંકટનો સામનો કરી રહ્યું છે અને 2023માં ડિફોલ્ટ સ્થિતિને ટાળવામાં આવ્યું હતું. આ દેશ IMF અને વર્લ્ડ બેંકનું ભારે ઋણી છે. આવી સ્થિતિમાં જ્યારે સામાન્ય સરકારી કર્મચારીઓને પગાર ચૂકવવામાં મુશ્કેલી આવી રહી છે, ત્યારે સાંસદોના પગારમાં વધારો વિવાદનો વિષય બની ગયો છે.

પાકિસ્તાનમાં મોંઘવારી અને બેરોજગારી
પગાર વધારો એવા સમયે થયો છે જ્યારે પાકિસ્તાનમાં મોંઘવારી અને બેરોજગારી વધી રહી છે અને દેશને તેના દેવાની ચૂકવણી કરવા માટે IMF પાસેથી વારંવાર સહાયની જરૂર છે. આ નિર્ણય પછી દેશમાં સરકારની પ્રાથમિકતાઓ પર સવાલ ઉઠ્યા છે, કારણ કે સરકાર પાસે સામાન્ય કર્મચારીઓના પગાર ચૂકવવા માટે પણ પૂરતા સંસાધનો નથી.