Sabrina Gonzalez Pasterski: શું કોઈ 12 વર્ષનું બાળક અસલી વિમાન બનાવી શકે? આ સાંભળીને કદાચ વિશ્વાસ ન થાય, પણ શિકાગોની એક યુવતીએ માત્ર 12 વર્ષની ઉંમરે આ કરી બતાવ્યું. એટલું જ નહીં, 14 વર્ષની ઉંમરે તેમણે તે વિમાનને હવામાં ઉડાડીને સૌને ચોંકાવી દીધા હતા. આજે ટેક અને સાયન્સની દુનિયામાં સબરીના ગોન્ઝાલેઝ પાસ્ટર્સ્કીનું નામ ચર્ચામાં છે. નાસાથી લઈને જેફ બેઝોસ સુધીના દિગ્ગજો તેમને કરોડોના પેકેજ સાથે નોકરી આપવા તૈયાર હતા, પરંતુ તેમણે જે કર્યું તે જાણીને તમને ચોક્કસ નવાઈ લાગશે.
કોણ છે આ જીનિયસ યુવતી?
જ્યાં સામાન્ય રીતે બાળકો રમકડાના વિમાનથી રમતા હોય છે, ત્યાં સબરીનાએ 12 વર્ષની ઉંમરે સિંગલ-એન્જિન વિમાનનું માળખું તૈયાર કરી દીધું હતું. તેમની કુશળતાને જોતા આજે અનેક લોકો તેમને 'બીજી આઈન્સ્ટાઈન' કહી રહ્યા છે. તેનું કારણ એ છે કે તે વિજ્ઞાનના એ સૌથી મોટા રહસ્યને ઉકેલવામાં લાગેલા છે, જે આઈન્સ્ટાઈનના કામ પછી અધૂરું રહી ગયું હતું એટલે કે 'ક્વોન્ટમ લેવલ પર ગુરુત્વાકર્ષણ (Quantum Gravity) કેવી રીતે કામ કરે છે?'
આ પણ વાંચો: "આપણો દેશ હુસૈનના લોહીનો બદલો લેશે..." : અલી ખામેનેઈની અંતિમ વિદાય પર ઈરાનના સુપ્રીમ લીડર મોજતબાનો હુંકાર
MIT માં રચ્યો ઇતિહાસ
શરૂઆતમાં જ્યારે સબરીનાએ મેસેચ્યુસેટ્સ ઇન્સ્ટિટ્યૂટ ઓફ ટેકનોલોજી (MIT) માં પ્રવેશ માટે અરજી કરી, ત્યારે તેમને વેઈટિંગ લિસ્ટમાં મૂકવામાં આવ્યા હતા. પરંતુ જ્યારે ત્યાંના પ્રોફેસરોએ તેમના વિમાનનો વીડિયો જોયો, ત્યારે તેઓ સ્તબ્ધ થઈ ગયા હતા. તેમણે માત્ર ૩ વર્ષમાં ૫.૦ GPA ની પરફેક્ટ સ્કોર સાથે MIT માંથી ગ્રેજ્યુએશન પૂર્ણ કર્યું. છેલ્લા બે દાયકામાં ભૌતિક વિજ્ઞાન વિભાગમાં ટોપ કરનાર તે પ્રથમ મહિલા બન્યા. મહાન વૈજ્ઞાનિક સ્ટીફન હોકિંગે પણ પોતાના જીવનના છેલ્લા રિસર્ચ પેપરમાં સબરીનાના કામનો ઉલ્લેખ કર્યો હતો.
કેમ ઠુકરાવી કરોડોની ઓફર?
સબરીનાના અદભૂત ટેલેન્ટને કારણે અમેરિકન સ્પેસ એજન્સી નાસા (NASA) અને એમેઝોનના સ્થાપક જેફ બેઝોસની કંપની બ્લુ ઓરિજિન તેમને પોતાની ટીમમાં લેવા માટે આતુર હતી. બ્રાઉન યુનિવર્સિટીએ તેમને લગભગ 1.1 મિલિયન ડોલર (આશરે 9 કરોડ રૂપિયા) ના પેકેજ સાથે આસિસ્ટન્ટ પ્રોફેસરનું પદ ઓફર કર્યું હતું. પરંતુ સબરીનાએ આ તમામ ચકાચૌંધને ઠુકરાવી દીધી. પૈસા કે કોર્પોરેટ નોકરીને બદલે, તેમણે ૨૦૨૧માં કેનેડાની 'પેરિમીટર ઇન્સ્ટિટ્યૂટ ફોર થિયોરેટિકલ ફિઝિક્સ' પસંદ કરી. હાલમાં, તે ત્યાં 'સેલેસ્ટિયલ હોલોગ્રાફી ઇનિશિયેટિવ' પ્રોજેક્ટનું નેતૃત્વ કરી રહી છે, જેને સાયમન્ડ્સ ફાઉન્ડેશન તરફથી ૮ મિલિયન ડોલર (આશરે ૬૬ કરોડ રૂપિયા) ની ગ્રાન્ટ પણ મળી છે.
વિજ્ઞાનનું કયું રહસ્ય ઉકેલવા મથી રહી છે સબરીના?
આજનું વિજ્ઞાન મુખ્યત્વે બે થિયરી પર ટકેલું છે:
1. આઈન્સ્ટાઈનની જનરલ રિલેટિવિટી: જે વિશાળ બ્રહ્માંડ, ગ્રહો અને બ્લેક હોલના કામકાજને સમજાવે છે.
2. ક્વોન્ટમ મિકેનિક્સ: જે પરમાણુ અને ઈલેક્ટ્રોન જેવા સૂક્ષ્મ કણોની રહસ્યમય દુનિયાને સમજાવે છે.
મુશ્કેલી એ છે કે આ બંને થિયરી પોતપોતાની જગ્યાએ સાચી છે, પણ જ્યારે તેમને એકસાથે લાગુ કરવામાં આવે છે, ત્યારે ગણિત ખોટું પડે છે. સબરીના આ 'ક્વોન્ટમ ગ્રેવિટી'ના અંતરને પાટવાનો પ્રયાસ કરી રહી છે. જો આ રહસ્ય ઉકેલાઈ જાય, તો ભવિષ્યમાં એવી ટેકનોલોજીનો જન્મ થઈ શકે છે જેની આજે આપણે કલ્પના પણ નથી કરી શકતા બિલકુલ તે જ રીતે, જેમ આઈન્સ્ટાઈનની થિયરી વગર આજનું GPS સિસ્ટમ અશક્ય હોત.
