મોસ્કો અને કિવ વચ્ચે ચાલી રહેલો ભીષણ સંગ્રામ હવે અત્યંત વિનાશક તબક્કામાં પ્રવેશ્યો છે. રશિયન સૈન્ય દ્વારા કરવામાં આવેલા તાજેતરના દાવા મુજબ, તેમણે યુક્રેનના હવાઈ કાફલામાં સામેલ અમેરિકી બનાવટના અત્યાધુનિક F-16 ફાઈટર જેટને આકાશમાં જ ફૂંકી માર્યું છે. આ શક્તિશાળી યુદ્ધવિમાનના પતનથી યુક્રેન અને વોશિંગ્ટન બંનેને મોટો આંચકો લાગ્યો હોવાનું માનવામાં આવે છે. રશિયાના સંરક્ષણ વિભાગે માહિતી આપી હતી કે તેમની અત્યંત સચોટ એર ડિફેન્સ સિસ્ટમ દ્વારા છોડવામાં આવેલી બે મિસાઈલોએ આ મલ્ટીરોલ ફાઈટર જેટનો ખુરદો બોલાવી દીધો હતો.
રશિયન કમાન્ડરનો ચોંકાવનારો ઘટસ્ફોટ
રશિયાની સરકારી ન્યૂઝ ચેનલને આપેલા વિશેષ ઇન્ટરવ્યુમાં રશિયન કમાન્ડરે જણાવ્યું હતું કે, રશિયાની S-300 એર ડિફેન્સ સિસ્ટમ દ્વારા આ મિશન પાર પાડવામાં આવ્યું હતું. કમાન્ડરે યુક્રેનને અમેરિકા તરફથી મળેલી આ સપ્લાયને પોતાનું સૌથી રોમાંચક લક્ષ્ય એટલે કે એક્સાઈટિંગ ટાર્ગેટ ગણાવ્યું હતું. વિગતો મુજબ, S-300 માંથી બે મિસાઈલ પ્રહાર કરવામાં આવ્યા હતા. જેમાંથી પ્રથમ મિસાઈલ વિમાન સાથે અથડાતા તે ક્ષતિગ્રસ્ત થયું હતું અને બીજી મિસાઈલે તેને સંપૂર્ણપણે નષ્ટ કરી દીધું હતું. રશિયન સૈન્ય આ ફાઈટર જેટની હિલચાલ પર લાંબા સમયથી નજર રાખી રહ્યું હતું. યુક્રેનને ઓગસ્ટ 2024 માં F-16 મળવાનું શરૂ થયું હતું અને અત્યાર સુધીમાં તેમણે આવા 4 વિમાનો ગુમાવ્યા હોવાની પુષ્ટિ થઈ છે.
યુરોપિયન રાષ્ટ્રો તરફથી મળેલી સૈન્ય સહાય
એક આંતરરાષ્ટ્રીય રિપોર્ટ અનુસાર, યુક્રેનને વિવિધ યુરોપિયન દેશો તરફથી કુલ 87 જેટલા F-16 આપવાનું વચન આપવામાં આવ્યું હતું, જેમાંથી અત્યાર સુધીમાં 44 જેટલા વિમાનો કિવને પ્રાપ્ત થઈ ચૂક્યા છે. બીજી તરફ, રશિયાએ વ્લાદિમીર પુતિનના નિવાસસ્થાન પર થયેલા ડ્રોન હુમલાના વળતા પ્રહાર તરીકે પોતાની અત્યંત ઘાતક Oreshnik હાઈપરસોનિક મિસાઈલનો ઉપયોગ કર્યો હોવાનો દાવો કર્યો છે.
અજેય ગણાતી Oreshnik મિસાઈલનો પ્રહાર
રાષ્ટ્રપતિ પુતિનના જણાવ્યા મુજબ, ઇન્ટરમીડિયેટ રેન્જ ધરાવતી Oreshnik મિસાઈલને રોકવી દુનિયાની કોઈપણ સિસ્ટમ માટે અશક્ય છે. આ મિસાઈલની ઝડપ અવાજની ગતિ કરતા 10 ગણી વધારે એટલે કે Mach 10 જેટલી હોવાનું કહેવાય છે. આ મિસાઈલ ન્યુક્લિયર વોરહેડ લઈ જવામાં પણ સક્ષમ છે, જોકે તાજેતરના હુમલામાં સામાન્ય હથિયારોનો જ ઉપયોગ થયો હોવાના સંકેતો છે. રશિયન સંરક્ષણ મંત્રાલયે સ્પષ્ટ કર્યું છે કે તેમણે યુક્રેનના મહત્વના ઈન્ફ્રાસ્ટ્રક્ચરને નિશાન બનાવીને આક્રમક ડ્રોન અને લાંબા અંતરના દરિયાઈ તેમજ જમીની હથિયારોથી હુમલો તેજ કર્યો છે.
