રશિયન દળોએ યુક્રેનના ઉત્તરપૂર્વીય સુમી ક્ષેત્રમાં 4 સરહદી ગામો કબજે કર્યા છે. એક સ્થાનિક અધિકારીએ આ માહિતી આપી. રશિયાના રાષ્ટ્રપતિ વ્લાદિમીર પુતિને થોડા દિવસ પહેલા કહ્યું હતું કે તેમણે સરહદ પર 'બફર ઝોન' સ્થાપિત કરવાનો આદેશ જારી કર્યો છે. આ દરમિયાન યુક્રેનના સુમી પ્રદેશના ગવર્નરે કહ્યું છે કે રશિયન દળોએ યુક્રેનિયન પ્રદેશ પર 'બફર ઝોન' બનાવવાના ઈરાદાથી ગામડાઓ પર કબજો કર્યો છે.
યુદ્ધવિરામ સુરક્ષિત કરવા અને શાંતિ વાટાઘાટોનો માર્ગ મોકળો કરવા માટે અમેરિકાના નેતૃત્વ હેઠળના મહિનાઓના પ્રયાસો છતાં રશિયાએ તેના હુમલાઓ રોકવાના કોઈ સંકેત આપ્યા નથી. રશિયા અને યુક્રેનના પ્રતિનિધિમંડળો આ મહિનાની શરૂઆતમાં તુર્કીમાં ત્રણ વર્ષમાં પહેલી સીધી વાટાઘાટો માટે મળ્યા હતા. એકમાત્ર નક્કર પરિણામ મોટા પાયે કેદીઓની આપ-લે રહ્યું છે, પરંતુ વાટાઘાટોમાં કોઈ નોંધપાત્ર સફળતા મળી નથી.
રશિયા કરી રહ્યું છે હુમલા
અધિકારીઓએ જણાવ્યું હતું કે શુક્રવાર અને રવિવાર વચ્ચે રશિયાએ યુક્રેન પર લગભગ 900 ડ્રોન છોડ્યા હતા. રવિવારે રાત્રે રશિયાએ યુક્રેન પર પોતાનો સૌથી મોટો ડ્રોન હુમલો કર્યો, જેમાં 355 ડ્રોન તોડી પાડ્યા. યુક્રેનિયન વાયુસેનાએ મંગળવારે જણાવ્યું હતું કે રશિયાએ સોમવારથી મંગળવાર સુધીમાં યુક્રેન પર 60 ડ્રોન છોડ્યા હતા. રશિયાના સંરક્ષણ મંત્રાલયે દાવો કર્યો છે કે તેમની હવાઈ સંરક્ષણ પ્રણાલીઓએ સાત રશિયન પ્રદેશોમાં રાતોરાત 99 યુક્રેનિયન ડ્રોનને તોડી પાડ્યા છે.
