વધ્યો કેન્સરનો ખતરો : કેન્સરનો વધી રહ્યો છે ખતરો, મહિલાઓ રાખે ખાસ ધ્યાન

પહેલા કેન્સરને એક દુર્લભ બીમારી માનવામાં આવતી હતી. કેન્સરનું પ્રમાણ પણ એટલું નહોતું. પરંતુ હવે કેન્સરના કેસ ચિંતાજનક ઝડપે વધી રહ્યા છે. અનેક લોકો તેના કારણે જીવ ગુમાવી રહ્યા છે. ભારતમાં ખાસ કરીને મહિલાઓમાં કેસ વધી રહ્યા છે.કેન્સર એ એક ગંભીર રોગ છે, જે વિશ્વભરમાં ચિંતાનો વિષય છે. ખાસ કરીને ભારતમાં છેલ્લા કેટલાક સમયથી કેન્સરના કેસ ઝડપથી વધી રહ્યા છે, જે સ્વાસ્થ્ય માટે ગંભીર ચિંતાનો વિષય છે. આ રોગ કોઈપણ વ્યક્તિને તેનો શિકાર બનાવી શકે છે, પછી ભલે તે ઉંમર અથવા લિંગની હોય.

વિશ્વ આરોગ્ય સંસ્થાએ કેન્સર વિશે જે આંકડા આપ્યા છે તે ચોંકાવનારા છે. WHOની ગ્લોબલ કેન્સર ઓબ્ઝર્વેટરી અનુસાર, ભારતમાં વર્ષ 2022માં લગભગ 14,13,316 નવા કેન્સરના કેસ નોંધાયા છે.

કેન્સરના કેસો
પુરુષો: લગભગ 6,91,178 નવા કેસ
મહિલાઃ લગભગ 7,22,138 નવા કેસ

કેન્સરથી મૃત્યુ દર
પુરુષો: લગભગ 4,70,055 મૃત્યુ
મહિલાઓઃ લગભગ 4,46,772 મૃત્યુ

આંકડાઓથી સાફ છે કે, ભારતમાં પુરુષો કરતા મહિલાઓને વધુ કેન્સરનો ખતરો છે. સાથે એ પણ સ્પષ્ટ છે કે, કેન્સરથી મૃત્યુનું પ્રમાણ પુરુષોમાં વધારે છે. ભારતીય મહિલાઓમાં બ્રેસ્ટ કેન્સર સૌથી વધારે થાય છે. સાથે જ ગર્ભાશયના મુખના કેન્સરના પણ વધુ કેસ સામે આવે છે. ગર્ભાશયના કેન્સરની સાથે મોંના કેન્સરના પણ કેસ વધી રહ્યા છે. જેનાથી સાવધાન રહેવું જરૂરી છે.