CWG2026: કોમનવેલ્થ ગેમ્સ 2026માં ભારતના વેઇટલિફ્ટર ચાનામ્બમ ઋષિકાંત સિંહે દેશને વધુ એક ગૌરવપૂર્ણ ક્ષણ અપાવી છે. પુરુષોની 60 કિલોગ્રામ વજન વર્ગમાં તેમણે શાનદાર પ્રદર્શન કરીને સિલ્વર મેડલ પોતાના નામે કર્યો. ખાસ વાત એ રહી કે ઋષિકાંતએ સ્નેચ રાઉન્ડમાં 121 કિલોગ્રામ વજન સફળતાપૂર્વક ઊંચકીને કોમનવેલ્થ ગેમ્સનો નવો રેકોર્ડ નોંધાવ્યો, જે તેમના કારકિર્દીનું સૌથી યાદગાર પ્રદર્શન માનવામાં આવી રહ્યું છે. આ સિદ્ધિ સાથે ભારતને ગ્લાસ્ગો કોમનવેલ્થ ગેમ્સમાં પ્રથમ સિલ્વર મેડલ મળ્યો છે. જોકે ગોલ્ડ મેડલથી તેઓ થોડા અંતરે રહી ગયા, તેમ છતાં તેમની રેકોર્ડબ્રેકિંગ લિફ્ટે સમગ્ર ભારતીય દળનું મનોબળ વધાર્યું છે. રમતવિશ્વમાં પણ ઋષિકાંતાની આ સિદ્ધિની વ્યાપક પ્રશંસા થઈ રહી છે.
સ્નેચમાં ઈતિહાસ રચ્યો
ફાઇનલમાં ઋષિકાંત સિંહે સ્નેચ વિભાગમાં 121 કિલોગ્રામ વજન સફળતાપૂર્વક ઊંચક્યું. આ સાથે તેમણે કોમનવેલ્થ ગેમ્સના ઇતિહાસમાં નવો રેકોર્ડ નોંધાવ્યો. તેમની ટેક્નિકલ ચોકસાઈ, સંતુલન અને આત્મવિશ્વાસ સ્પર્ધા દરમિયાન સ્પષ્ટ જોવા મળ્યો હતો. સ્નેચ બાદ તેઓ ગોલ્ડ મેડલના દાવેદાર તરીકે આગળ વધી રહ્યા હતા, પરંતુ ક્લીન એન્ડ જર્ક વિભાગમાં મલેશિયાના અનુભવી વેઇટલિફ્ટર મોહમ્મદ અનિક બિન કસદાને શાનદાર પ્રદર્શન કરીને ગોલ્ડ પોતાના નામે કરી લીધો. અનિકે કુલ 273 કિલોગ્રામ વજન સાથે ગેમ્સ રેકોર્ડ બનાવ્યો, જ્યારે ઋષિકાંતાએ કુલ 264 કિલોગ્રામ વજન ઊંચકીને સિલ્વર જીત્યો. કેન્યાના જોશુઆ અમુંગા મ્બોયાએ બ્રોન્ઝ મેડલ મેળવ્યો.
ક્લીન એન્ડ જર્કમાં ગોલ્ડ હાથમાંથી સરક્યું
ઋષિકાંતાએ ક્લીન એન્ડ જર્કમાં 143 કિલોગ્રામ લિફ્ટ પૂર્ણ કરી હતી. કુલ 264 કિલોગ્રામના સ્કોર સાથે તેમણે સિલ્વર મેડલ જીત્યો. ગોલ્ડ માટે તેમને વધુ સફળ લિફ્ટની જરૂર હતી, પરંતુ અંતિમ પ્રયાસમાં તેઓ આગળ વધી શક્યા નહોતા. તેમ છતાં તેમની સમગ્ર સ્પર્ધા દરમિયાનની સ્થિરતા અને રેકોર્ડબ્રેકિંગ સ્નેચ પ્રદર્શન ભારત માટે ગૌરવનું કારણ બન્યું.
મણિપુરથી આંતરરાષ્ટ્રીય મંચ સુધીની સફર
મણિપુરના ઇમ્ફાલ પશ્ચિમ જિલ્લાના રહેવાસી ઋષિકાંતા સિંહ ભારતીય સેનાના સ્પોર્ટ્સ કાર્યક્રમ હેઠળ તાલીમ મેળવી ચૂક્યા છે. છેલ્લા કેટલાક વર્ષોમાં તેમણે રાષ્ટ્રીય અને આંતરરાષ્ટ્રીય સ્તરે સતત પ્રગતિ કરી છે. 2025માં અમદાવાદમાં યોજાયેલી કોમનવેલ્થ વેઇટલિફ્ટિંગ ચેમ્પિયનશિપમાં ગોલ્ડ મેડલ જીત્યા બાદ તેમણે કોમનવેલ્થ ગેમ્સ માટે ક્વોલિફાય કર્યું હતું. તે સ્પર્ધામાં તેમણે રાષ્ટ્રીય રેકોર્ડ પણ બનાવ્યો હતો.
ભારત માટે મહત્વપૂર્ણ સિદ્ધિ
ભારતીય વેઇટલિફ્ટિંગ માટે આ સિલ્વર મેડલ ખૂબ મહત્વનો માનવામાં આવી રહ્યો છે. મીરાબાઈ ચાનુ જેવી ખેલાડીઓ પછી હવે નવી પેઢીના વેઇટલિફ્ટરો આંતરરાષ્ટ્રીય મંચ પર પોતાની ક્ષમતા સાબિત કરી રહ્યા છે.
ઋષિકાંતાની આ સિદ્ધિ આગામી એશિયન ગેમ્સ અને ઓલિમ્પિક્સ માટે પણ સકારાત્મક સંકેત તરીકે જોવામાં આવી રહી છે. નિષ્ણાતોના મતે જો તેઓ આ જ લય જાળવી રાખશે તો ભવિષ્યમાં ભારત માટે વધુ મોટા મંચ પર મેડલ જીતવાની ક્ષમતા ધરાવે છે.
આ પણ વાંચો: ગોલ્ડની લડાઈ વચ્ચે સર્જાયો ભયાનક અકસ્માત : કોમનવેલ્થ ગેમ્સમાં હાઇ બાર પરથી માથાના બળે પટકાયો 19 વર્ષનો જીમનાસ્ટ
ભારતીય દળનો આત્મવિશ્વાસ વધ્યો
કોમનવેલ્થ ગેમ્સમાં શરૂઆતના દિવસોમાં જ ભારતને મળેલા આ સિલ્વર મેડલથી સમગ્ર ભારતીય દળમાં આત્મવિશ્વાસનો સંચાર થયો છે. આગામી દિવસોમાં વેઇટલિફ્ટિંગ, કુસ્તી, બેડમિન્ટન, બોક્સિંગ, શૂટિંગ અને એથ્લેટિક્સ જેવી સ્પર્ધાઓમાં પણ ભારતને અનેક મેડલની આશા છે. ઋષિકાંતા સિંહની આ સિદ્ધિ માત્ર વ્યક્તિગત સફળતા નથી, પરંતુ ભારતીય વેઇટલિફ્ટિંગના ઉજ્જવળ ભવિષ્યનું પણ પ્રતીક બની છે. તેમની રેકોર્ડબ્રેકિંગ લિફ્ટ અને સિલ્વર મેડલ આગામી પેઢીના ખેલાડીઓને પણ પ્રેરણા આપશે.
