ક્લીન સ્વીપ કરવા ટીમ ઈન્ડિયા આજે ઉતરશે : ઈશાન-તિલક પર ફરી મંડરાશે નજર, શું આજે વધુ એક ખેલાડીનું થશે ડેબ્યૂ?

India vs Zimbabwe: ભારત અને ઝિમ્બાબ્વે વચ્ચે ત્રણ મેચની T20 આંતરરાષ્ટ્રીય શ્રેણીની ત્રીજી અને અંતિમ મેચ આજે હરારે સ્પોર્ટ્સ ક્લબ ખાતે રમાશે. ભારતીય સમય અનુસાર મેચ સાંજે 4:30 વાગ્યે શરૂ થશે. શ્રેયસ અય્યરની આગેવાની હેઠળની ભારતીય ટીમે પ્રથમ બંને મેચમાં શાનદાર જીત મેળવીને શ્રેણીમાં 2-0ની અજેય સરસાઈ મેળવી લીધી છે. હવે ટીમ ઈન્ડિયાનું લક્ષ્ય યજમાન ઝિમ્બાબ્વેને તેના જ ઘરઆંગણે ક્લીન સ્વીપ કરીને શ્રેણીનો અંત જીત સાથે કરવાનો રહેશે. બીજી તરફ ઝિમ્બાબ્વે માટે આ મેચ પ્રતિષ્ઠા બચાવવાનો સવાલ છે. પ્રથમ બંને મુકાબલામાં બેટિંગ અને બોલિંગ બંને વિભાગમાં અપેક્ષા મુજબનું પ્રદર્શન ન કરી શકનાર યજમાન ટીમ હવે અંતિમ મેચ જીતીને શ્રેણીનો અંત સકારાત્મક રીતે કરવાનો પ્રયાસ કરશે.

હેડ-ટુ-હેડમાં ભારતનું સંપૂર્ણ વર્ચસ્વ

ભારત અને ઝિમ્બાબ્વે વચ્ચે અત્યાર સુધી કુલ 16 T20 આંતરરાષ્ટ્રીય મેચ રમાઈ છે. જેમાં ભારતે 13 મેચમાં જીત મેળવી છે, જ્યારે ઝિમ્બાબ્વે માત્ર 3 મેચ જીતવામાં સફળ રહ્યું છે. આ આંકડા સ્પષ્ટ દર્શાવે છે કે ટૂંકા ફોર્મેટમાં ભારતીય ટીમનો ઝિમ્બાબ્વે સામે નોંધપાત્ર દબદબો રહ્યો છે. વર્તમાન શ્રેણીમાં પણ ભારતીય ટીમે બંને મુકાબલામાં સર્વાંગી પ્રદર્શન કરીને પોતાની મજબૂતાઈ સાબિત કરી છે. યુવા ખેલાડીઓએ મળેલી તકનો ભરપૂર લાભ ઉઠાવ્યો છે, જેના કારણે ટીમ મેનેજમેન્ટને પણ ભવિષ્ય માટે સકારાત્મક સંકેતો મળ્યા છે.

ઈશાન કિશનની શાનદાર લય ભારત માટે સૌથી મોટો પ્લસ પોઇન્ટ

ભારતના વિકેટકીપર બેટર ઈશાન કિશન આ શ્રેણીમાં અત્યાર સુધી સૌથી સફળ બેટર સાબિત થયો છે. તેણે બે મેચમાં કુલ 116 રન બનાવ્યા છે અને તેનો સ્ટ્રાઈક રેટ 170.58 રહ્યો છે. બીજી T20માં તેણે માત્ર 44 બોલમાં 81 રનની વિસ્ફોટક ઇનિંગ્સ રમી હતી, જેમાં અનેક આકર્ષક બાઉન્ડ્રી અને છગ્ગાઓનો સમાવેશ થતો હતો. ઈશાનની આ ઇનિંગ્સે ભારતને મુશ્કેલ પરિસ્થિતિમાંથી બહાર કાઢીને જીત અપાવી હતી. તેના આ પ્રદર્શન બદલ તેને 'પ્લેયર ઓફ ધ મેચ'નો એવોર્ડ પણ મળ્યો હતો. ત્રીજી મેચમાં પણ ભારતીય ટીમને તેની પાસેથી આવી જ ઝડપી અને જવાબદાર ઇનિંગ્સની અપેક્ષા રહેશે.

આ પણ વાંચો: 'લાફ્ટર શેફ' બાદ ભારતી સિંહનો નવો ધમાકો! : હર્ષ સાથે લાવી રહ્યા છે નવો 'ઇન્ડિયન ગેમ શો', મજેદાર પ્રોમોએ વધારી ચાહકોની ઉત્સુકતા

તિલક વર્માની સ્થિર બેટિંગ ટીમને આપી રહી છે મજબૂતી

યુવા ડાબોડી બેટર તિલક વર્મા પણ આ શ્રેણીમાં ઉત્તમ ફોર્મમાં જોવા મળ્યો છે. તેણે બે ઇનિંગ્સમાં કુલ 66 રન બનાવ્યા છે. બીજી મેચમાં તેણે દબાણ વચ્ચે અણનમ 60 રનની મહત્વપૂર્ણ ઇનિંગ્સ રમી હતી. ઈશાન કિશન અને તિલક વર્મા વચ્ચે ચોથી વિકેટ માટે થયેલી 94 રનની ભાગીદારી ભારતની જીતનું મુખ્ય કારણ બની હતી. બંને ખેલાડીઓએ પરિપક્વતા સાથે ઇનિંગ્સ સંભાળી અને અંતિમ ઓવરોમાં ઝડપી રન બનાવી ઝિમ્બાબ્વેના

બોલરોને દબાણમાં મૂકી દીધા હતા.

મધ્યક્રમ અને ફિનિશરો પાસેથી પણ મોટી અપેક્ષા

ભારતીય ટીમમાં રિંકુ સિંહ, શિવમ દુબે અને કેપ્ટન શ્રેયસ અય્યર જેવા અનુભવી ખેલાડીઓ પણ સામેલ છે. અત્યાર સુધી ટોચના ક્રમે સારું પ્રદર્શન થતા મધ્યક્રમને બહુ મોટી તક મળી નથી. જોકે, જો ત્રીજી મેચમાં શરૂઆત નબળી રહે તો આ ખેલાડીઓ પર મોટી જવાબદારી આવી શકે છે. વૈભવ સૂર્યવંશી અને અભિષેક શર્મા જેવા યુવા ખેલાડીઓ પણ પોતાની પ્રતિભા બતાવવા આતુર હશે. ટીમ મેનેજમેન્ટ આ મેચને આગામી ટુર્નામેન્ટ માટેના સંયોજનને વધુ મજબૂત બનાવવાની તક તરીકે પણ જોઈ રહ્યું છે.

બોલિંગમાં પ્રિન્સ યાદવ બન્યા ભારતના સૌથી સફળ બોલર

ભારતીય બોલિંગ આક્રમણે પણ અત્યાર સુધી પ્રભાવશાળી પ્રદર્શન કર્યું છે. ખાસ કરીને યુવા ઝડપી બોલર પ્રિન્સ યાદવે પોતાની ગતિ અને સચોટ લાઇન-લેન્થથી સૌનું ધ્યાન ખેંચ્યું છે. પ્રિન્સે બે મેચમાં કુલ ચાર વિકેટ ઝડપી છે અને તેની ઇકોનોમી માત્ર 5.43 રહી છે. તેનું શ્રેષ્ઠ પ્રદર્શન 2 વિકેટે 10 રન રહ્યું છે. બીજી મેચમાં તેણે શરૂઆતમાં જ બેન કરન અને ઝિમ્બાબ્વેના કેપ્ટન સિકંદર રઝાની મહત્વપૂર્ણ વિકેટ લઈને યજમાન ટીમને દબાણમાં મૂકી દીધી હતી. તે ઉપરાંત મયંક યાદવની ઝડપ, યશ ઠાકુરની સ્વિંગ અને રવિ બિશ્નોઈની સ્પિન પણ ભારત માટે મહત્વપૂર્ણ હથિયાર બની શકે છે.

ડોમેસ્ટિક ક્રિકેટમાં પ્રભસિમરન સિંહનો દબદબો: ફટકાર્યા 294 સિક્સર

પંજાબ તરફથી રમતા યુવા બેટ્સમેન પ્રભસિમરન સિંહે ઘરેલુ ક્રિકેટમાં પોતાના વિસ્ફોટક પ્રદર્શનથી ખાસ ઓળખ બનાવી છે. જેથી આજની ત્રીજી ટી20 મેચમાં ડેબ્યૂ થવાની શક્યતા છે. તેમણે ફર્સ્ટ ક્લાસ, List-A અને T20 ક્રિકેટ મળીને અત્યાર સુધીમાં કુલ 294 સિક્સર ફટકારી છે. કારકિર્દીના આંકડા પર નજર કરીએ તો, તેમણે 29 ફર્સ્ટ ક્લાસ મેચોમાં 36.34ની સરેરાશથી 1599 રન બનાવ્યા છે, જેમાં 202 રન તેમનો સર્વશ્રેષ્ઠ સ્કોર છે અને તેમાં 5 સદી તથા 4 અડધી સદી શામેલ છે. List-A ક્રિકેટની 58 મેચોમાં તેમણે 6 સદી અને 12 અડધી સદી સાથે 2237 રન નોંધાવ્યા છે, જ્યાં તેમનો સર્વોચ્ચ સ્કોર 167 રન રહ્યો છે. આ ઉપરાંત, T20 ફોર્મેટની 129 મેચોમાં તેમણે 2 સદી અને 27 અડધી સદીની મદદથી 3665 રન બનાવ્યા છે, જેમાં અણનમ 119 રન તેમનો બેસ્ટ સ્કોર છે.

ઝિમ્બાબ્વે માટે મરુમાની અને મુઝરબાની પર રહેશે જવાબદારી

યજમાન ઝિમ્બાબ્વે માટે તાદીવાનાશે મરુમાની અત્યાર સુધી સૌથી સફળ બેટર રહ્યો છે. તેણે બે મેચમાં કુલ 51 રન બનાવ્યા છે. જોકે તેણે મોટી ઇનિંગ્સ રમી નથી, પરંતુ ટીમ માટે મહત્વપૂર્ણ યોગદાન આપ્યું છે. બોલિંગમાં બ્લેસિંગ મુઝરબાની સૌથી અસરકારક રહ્યો છે. તેણે બે મેચમાં ત્રણ વિકેટ ઝડપી છે અને તેની ઇકોનોમી 7.75 રહી છે. નવી બોલથી તે ભારતના ટોચના ક્રમ માટે પડકાર ઉભો કરી શકે છે.

સિકંદર રઝા પાસેથી મોટી ઇનિંગ્સની અપેક્ષા

ઝિમ્બાબ્વેના સૌથી અનુભવી ખેલાડી અને કેપ્ટન સિકંદર રઝા માટે આ શ્રેણી અત્યાર સુધી નિરાશાજનક રહી છે. પ્રથમ મેચમાં તે માત્ર 4 રન બનાવી શક્યો હતો, જ્યારે બીજી મેચમાં ખાતું પણ ખોલી શક્યો નહોતો. રઝા માત્ર બેટિંગ જ નહીં પરંતુ પોતાની ઓફ-સ્પિન બોલિંગથી પણ મેચનો પાસો પલટાવી શકે છે. ત્રીજી મેચમાં ઝિમ્બાબ્વેની જીતની આશા ઘણી હદ સુધી તેના પ્રદર્શન પર નિર્ભર રહેશે.

હરારેની પીચ શું કહે છે?

હરારે સ્પોર્ટ્સ ક્લબની પીચ સામાન્ય રીતે શરૂઆતમાં ઝડપી બોલરોને મદદરૂપ બને છે. નવી બોલથી સીમ અને સ્વિંગ બંને જોવા મળે છે, જેના કારણે પ્રથમ છથી આઠ ઓવરમાં બેટરો માટે સાવચેતીપૂર્વક રમવું જરૂરી બને છે. જેમ જેમ મેચ આગળ વધે છે તેમ વિકેટ બેટિંગ માટે વધુ અનુકૂળ બની જાય છે. તેથી ટોસ જીતનાર ટીમ પહેલા બોલિંગ કરવાનો નિર્ણય લઈ શકે છે જેથી શરૂઆતની મદદનો લાભ મેળવી શકાય અને પછી લક્ષ્યનો પીછો કરવો સરળ રહે.

હવામાન રહેશે અનુકૂળ

હવામાન વિભાગના અનુમાન મુજબ હરારેમાં આખો દિવસ આકાશ સ્વચ્છ રહેવાની સંભાવના છે. વરસાદની કોઈ શક્યતા નથી. તાપમાન 10થી 26 ડિગ્રી સેલ્સિયસ વચ્ચે રહેવાની ધારણા છે, જેના કારણે ખેલાડીઓને અનુકૂળ પરિસ્થિતિ મળશે અને સંપૂર્ણ 20-20 ઓવરની મેચ રમાવાની શક્યતા વધુ છે.

ભારતની સંભવિત પ્લેઇંગ-11

અભિષેક શર્મા, વૈભવ સૂર્યવંશી, ઈશાન કિશન/પ્રભસિમરન સિંહ (વિકેટકીપર), શ્રેયસ અય્યર (કેપ્ટન), તિલક વર્મા, રિંકુ સિંહ, શિવમ દુબે, રવિ બિશ્નોઈ, પ્રિન્સ યાદવ, મયંક યાદવ અને યશ ઠાકુર.

ઝિમ્બાબ્વેની સંભવિત પ્લેઇંગ-11

બ્રાયન બેનેટ, તાદીવાનાશે મરુમાની, બેન કરન, ડિઓન માયર્સ, સિકંદર રઝા (કેપ્ટન), રાયન બર્લ, વેસ્લી મધેવેરે, બ્રેડ ઇવાન્સ, ન્યુમેન ન્યામહુરી, રિચાર્ડ નગારવા અને બ્લેસિંગ મુઝરબાની.

આ પણ ખાસ વાંચો: ધોની જેવી ચપળતા બતાવવાના પ્રયાસમાં ઇશાન કિશનથી થઈ મોટી ભૂલ : મેદાન પર જ પકડી લીધું માથું

મેચ પર સૌની નજર

ભારત પાસે શ્રેણીને 3-0થી પોતાના નામે કરવાની મોટી તક છે, જ્યારે ઝિમ્બાબ્વે પોતાની પ્રતિષ્ઠા બચાવવા માટે સંપૂર્ણ શક્તિ સાથે મેદાનમાં ઉતરશે. યુવા ભારતીય ખેલાડીઓ માટે પોતાની પ્રતિભા વધુ એક વખત સાબિત કરવાની આ શ્રેષ્ઠ તક હશે. બીજી તરફ ઝિમ્બાબ્વે માટે આ મેચ આત્મવિશ્વાસ પાછો મેળવવાની અને ઘરઆંગણે ચાહકોને જીતની ભેટ આપવાની તક બની રહેશે. બંને ટીમો વચ્ચે રોમાંચક મુકાબલો જોવા મળે તેવી પૂરી શક્યતા છે.