દેશની રાજધાનીમાં આયોજિત 77મા પ્રજાસત્તાક પર્વની પરેડ આ વર્ષે અનેક રીતે ઐતિહાસિક બની રહી છે. આ અવસરે ભારતીય સેનાએ પોતાના 'સાયલન્ટ વોરિયર્સ' એટલે કે સેવા આપતા જાનવરો સાથેના અતૂટ સંબંધોને દુનિયા સમક્ષ રજૂ કર્યા હતા. કર્તવ્ય પથ પર પ્રથમ વખત Remount and Veterinary Corps (RVC) દ્વારા એક વિશેષ એનિમલ કન્ટીજન્ટ પ્રદર્શિત કરવામાં આવ્યું હતું.
આ વિશેષ ટુકડીમાં લદ્દાખ અને સિયાચીન જેવા અત્યંત ઊંચાઈવાળા અને દુર્ગમ વિસ્તારોમાં સેનાને મદદરૂપ થતા બે Bactrian camels (બે ખૂંધવાળા ઊંટ) અને ચાર Zanskar Ponies (ઝંસ્કારી ઘોડા) આકર્ષણનું કેન્દ્ર બન્યા હતા. આ ઉપરાંત આકાશી દેખરેખ માટે સજ્જ ચાર Black Kites (સમડી) અને સેનાની વિવિધ કામગીરીમાં નિષ્ણાત 10 ભારતીય ઓલાદના શ્વાન પણ પરેડમાં સામેલ થયા હતા. આ શ્વાનોમાં Mudhol Hound, Rampur Hound, Chippiparai, Kombai અને Rajapalayam જેવી સ્વદેશી નસલોનો સમાવેશ થાય છે.
આ પ્રાણીઓ સાથે ભારતીય સંરક્ષણ દળના 'હિમ યોદ્ધા' પણ જોડાયા હતા, જેઓ અત્યાધુનિક બુલેટ રેઝિસ્ટન્ટ જેકેટ, GPS, કેમેરા અને એડવાન્સ સર્વેલન્સ સિસ્ટમથી સજ્જ હતા. સેનાના આ પ્રદર્શનનો મુખ્ય હેતુ એ દર્શાવવાનો હતો કે જ્યાં આધુનિક ટેકનોલોજીની મર્યાદાઓ આવી જાય છે, ત્યાં આ મૂંગા સૈનિકો દેશની સુરક્ષામાં કેટલી મહત્વની ભૂમિકા ભજવે છે. આ વર્ષની પરેડમાં 'ઓપરેશન સિંદૂર'ની ઝાંખી અને યુરોપિયન કાઉન્સિલના પ્રેસિડેન્ટ Antonio Costa તેમજ યુરોપિયન કમિશનના પ્રેસિડેન્ટ Ursula von der Leyen મુખ્ય અતિથિ તરીકે ઉપસ્થિત રહ્યા હતા.
