Virat Kohli and Anushka Sharma : ઈન્ડિયન પ્રીમિયર લીગ 2026 ની સિઝનનો અંત આવી ગયો છે અને આ વર્ષે પણ ક્રિકેટ ફેન્સને એક અત્યંત રોમાંચક ફાઇનલ મેચ જોવા મળી છે. ટાઇટલ મેચમાં રોયલ ચેલેન્જર્સ બેંગ્લોરે (RCB) મેદાન પર શાનદાર રમત બતાવીને ફરી એકવાર ટ્રોફી પોતાના નામે કરી લીધી છે. RCB સતત બીજી વાર IPL ચેમ્પિયન બનતા જ આખા કેમ્પમાં અને ડ્રેસિંગ રૂમમાં જશ્નનો માહોલ જોવા મળ્યો હતો. ખેલાડીઓથી લઈને સપોર્ટ સ્ટાફ સુધીના તમામ લોકો વિજયની ખુશીમાં ડૂબી ગયા હતા. આ ભવ્ય ઉજવણી દરમિયાન સોશિયલ મીડિયા પર વિરાટ કોહલી અને અનુષ્કા શર્માના કેટલાક વીડિયો અને ફોટા ઇન્ટરનેટ પર જોરદાર વાયરલ થઈ રહ્યા છે, જે ચાહકોમાં ચર્ચાનો વિષય બન્યા છે.
ઐતિહાસિક ખિતાબી જીત
અમદાવાદના મોટેરા ખાતે આવેલા વિશ્વના સૌથી મોટા નરેન્દ્ર મોદી સ્ટેડિયમમાં રવિવાર 31 મે ના રોજ આ મહામુકાબલો રમાયો હતો. આ હાઇ-વોલ્ટેજ ફાઇનલ મેચમાં રોયલ ચેલેન્જર્સ બેંગ્લોરે ગુજરાત ટાઇટન્સને (GT) 5 વિકેટે હરાવીને આઈપીએલના 19 મા સિઝનનું ટાઇટલ જીતી લીધું છે. ટોસ હાર્યા બાદ પ્રથમ બેટિંગ કરવા ઉતરેલી ગુજરાતની ટીમે આરસીબી સામે જીતવા માટે 156 રનનો સામાન્ય પડકાર રાખ્યો હતો. આ લક્ષ્યાંકનો પીછો કરવા ઉતરેલી RCB ની ટીમે માત્ર 5 વિકેટ ગુમાવીને, 12 બોલ બાકી રહેતા જ ખૂબ જ સરળતાથી જીત મેળવી લીધી હતી. ગયા વર્ષે પંજાબ કિંગ્સને (PBKS) હરાવીને ઇતિહાસમાં પહેલીવાર IPL ટ્રોફી જીતનાર RCB એ આ વર્ષે ફરી ઇતિહાસ દોહરાવ્યો છે. આ સતત બીજી જીત સાથે જ RCB હવે IPL ઇતિહાસની સૌથી સફળ અને ખાસ ટીમોની યાદીમાં સામેલ થઈ ગઈ છે. આખી સિઝન દરમિયાન કેપ્ટન રજત પાટીદારના અદભુત નેતૃત્વમાં ટીમે શાનદાર પ્રદર્શન કર્યું હતું.
ઉજવણી કે ગુંડાગીરી?: IPL જીત્યા બાદ RCB ફેન્સ બેકાબૂ , અડધી રાત્રે બસ પર પથ્થરમારો કરી મચાવ્યો ભારે હોબાળો, મુસાફરોમાં ફફડાટ
વિરાટ કોહલીની વિસ્ફોટક ઇનિંગ
આ મહત્વપૂર્ણ અને દબાણવાળી ફાઇનલ મેચમાં કિંગ કોહલીએ ફરી એકવાર સાબિત કરી દીધું કે મોટા મુકાબલામાં તેનો કોઈ મુકાબલો નથી. RCB ને ટ્રોફી અપાવવામાં વિરાટ કોહલીએ સૌથી મુખ્ય ભૂમિકા ભજવી હતી. ઓપનિંગમાં આવીને તેમણે મેદાનની ચારેય બાજુ આકર્ષક શૉટ્સ ફટકાર્યા હતા અને માત્ર 42 બોલનો સામનો કરતાં નોટઆઉટ 75 રનની મેચ વિનિંગ ઇનિંગ રમી હતી. પોતાની આ તોફાની ઇનિંગ દરમિયાન કોહલીએ 9 શાનદાર ચોગ્ગા અને 3 ગગનચુંબી છગ્ગા લગાવ્યા હતા. આ ધમાકેદાર પ્રદર્શન માટે વિરાટ કોહલીને પ્લેયર ઓફ ધ મેચના એવોર્ડથી નવાજવામાં આવ્યો હતો. આઈપીએલનો આ ધમાકેદાર પ્રવાસ પૂરો કર્યા બાદ વિરાટ કોહલી જરાય આરામ કરવાના મૂડમાં નથી, કારણ કે તે ટૂંક સમયમાં જ આંતરરાષ્ટ્રીય ક્રિકેટમાં એક્શનમાં જોવા મળશે. ચાલુ મહિનામાં અફઘાનિસ્તાન સામે રમાનારી ત્રણ મેચોની વનડે (ODI) સિરીઝ માટે ભારતીય ટીમમાં વિરાટ કોહલીની પસંદગી કરવામાં આવી છે.
અનુષ્કાનો વીડિયો વાયરલ
આઈપીએલ ચેમ્પિયન બન્યા બાદ આરસીબીના ડ્રેસિંગ રૂમ અને ટીમની પ્રાઇવેટ આફ્ટર-પાર્ટીના ઘણા ઇમોશનલ અને મજેદાર વીડિયો સોશિયલ મીડિયા પર વાયરલ થઈ રહ્યા છે. વિરાટ કોહલીની પત્ની અને બોલિવૂડ અભિનેત્રી અનુષ્કા શર્મા પણ આ ખાસ વિજયી ક્ષણોની સાક્ષી બનવા સ્ટેડિયમમાં હાજર હતી. તેણે ખેલાડીઓ અને આખા સપોર્ટ સ્ટાફ સાથે મળીને જીતની ખુશીને દિલ ખોલીને સેલિબ્રેટ કરી હતી. આ બધા વચ્ચે સોશિયલ મીડિયા પર એક વીડિયો સૌથી વધુ વાયરલ થઈ રહ્યો છે જેમાં અનુષ્કા શર્મા આરસીબીના બેટિંગ કોચ અને મેન્ટર દિનેશ કાર્તિકને જીતની શુભકામનાઓ આપતા ગળે લગાવતી જોવા મળે છે. આ સમયે કિંગ કોહલી પણ તેમની બિલકુલ નજીક જ ઉભો હતો. પોતાની પત્ની અને જૂના સાથી ખેલાડી દિનેશ કાર્તિક વચ્ચેની આ મિત્રતા જોઈને વિરાટે એકદમ કૂલ અને હસતી પ્રતિક્રિયા આપી હતી, જે ફેન્સને ખૂબ જ પસંદ આવી રહી છે.
