Rajnath Singh On SCO Meeting: શાંઘાઈ કોઓપરેશન ઓર્ગેનાઈઝેશન (SCO)ની મહત્વપૂર્ણ બેઠકમાં ભારતના રક્ષામંત્રી રાજનાથ સિંહે વૈશ્વિક સુરક્ષા અને શાંતિ અંગે ભારતનો પક્ષ મજબૂતીથી રજૂ કર્યો છે. વર્તમાન સમયમાં જ્યારે વિશ્વ અનેક નાના-મોટા સંઘર્ષો અને યુદ્ધોનો સામનો કરી રહ્યું છે, ત્યારે રાજનાથ સિંહે સ્પષ્ટ શબ્દોમાં જણાવ્યું હતું કે કોઈપણ વિવાદનો ઉકેલ રણમેદાનમાં નહીં પરંતુ ટેબલ પરની વાતચીત દ્વારા જ શક્ય છે. તેમણે આ સંગઠનની ભૂમિકાને અત્યંત મહત્વની ગણાવતા કહ્યું કે, ઐતિહાસિક વેપારી માર્ગો અને સાંસ્કૃતિક વારસાનું કેન્દ્ર રહેલા આ ક્ષેત્રમાં વધતા જતાં એકતરફીવાદને કારણે વૈશ્વિક શાંતિ નબળી પડી રહી છે.
રાજનાથ સિંહે તેમના સંબોધનમાં ભારપૂર્વક જણાવ્યું હતું કે છેલ્લા કેટલાક વર્ષોમાં વિશ્વમાં ચાલી રહેલા યુદ્ધોને કારણે જાન-માલનું ભારે નુકસાન થયું છે. આ પરિસ્થિતિ રક્ષા અને સુરક્ષા તંત્ર માટે આત્મમંથનનો વિષય છે. ભારત હંમેશા 'વસુધૈવ કુટુંબકમ'ની ભાવનામાં માને છે અને તે જ મંત્ર આજના અશાંત વિશ્વને શાંતિના માર્ગે લઈ જઈ શકે છે.
આતંકવાદ પર આકરા પ્રહારો: 'ઓપરેશન સિંદૂર'નો ઉલ્લેખ
આતંકવાદના મુદ્દે પાકિસ્તાન અને ચીન જેવા દેશોની હાજરીમાં રાજનાથ સિંહે આકરા પ્રહારો કર્યા હતા. તેમણે સ્પષ્ટ કર્યું કે આતંકવાદ, ઉગ્રવાદ અને કટ્ટરપંથ આજે માનવતા માટે સૌથી મોટું જોખમ બની ગયું છે.
ઝીરો ટોલરન્સ નીતિ: રક્ષામંત્રીએ ભારતની 'ઝીરો ટોલરન્સ' નીતિનો પુનરોચ્ચાર કર્યો અને તાજેતરના પહલગામ આતંકી હુમલાનો ઉલ્લેખ કરી જણાવ્યું કે આવી ઘટનાઓ માટે કોઈ પણ તર્ક કે બહાનું ચલાવી શકાય નહીં.
બેવડા ધોરણો નહીં: તેમણે પાડોશી દેશો તરફ ઈશારો કરતા કહ્યું કે સ્ટેટ-સ્પોન્સર કે ક્રોસ-બોર્ડર આતંકવાદ સામે વિશ્વએ બેવડા ધોરણો રાખ્યા વગર કડક કાર્યવાહી કરવી પડશે. 'ઓપરેશન સિંદૂર' દ્વારા ભારતે બતાવી દીધું છે કે દેશની સુરક્ષા સામે જોખમ ઊભું કરનારાઓને જડબાતોડ જવાબ આપવામાં આવશે.
આ પણ વાંચો: નવી કાર ખરીદવાનું વિચારતા લોકો માટે મોટા સમાચાર! : આગામી મહિનાઓમાં ઓટો ઉદ્યોગ પર મંડરાશે મોટું સંકટ
RATS ની ભૂમિકા અને સંયુક્ત મોરચો
આતંકવાદ, કટ્ટરપંથ અને અલગતાવાદ સામે લડવા માટે રાજનાથ સિંહે રિજનલ એન્ટી-ટેરર સ્ટ્રક્ચર (RATS) ને વધુ મજબૂત બનાવવાની જરૂરિયાત પર ભાર મૂક્યો હતો. તેમણે SCO સભ્ય દેશોને હાકલ કરી હતી કે આ જોખમો સામે લડવા માટે એક સંયુક્ત મોરચો બનાવવામાં આવે. ભારતનું માનવું છે કે માત્ર માહિતીના આદાન-પ્રદાનથી જ નહીં, પરંતુ પાયાના સ્તરે સહકારથી જ આ વૈશ્વિક સંકટને નાબૂદ કરી શકાશે.
'ન્યૂ વર્લ્ડ ઓર્ડર' અને ભારતીય સંસ્કાર
ભારતના વિદેશ નીતિના અભિગમ વિશે વાત કરતા તેમણે કહ્યું કે ભારત માત્ર કોઈ નવા વૈશ્વિક ક્રમ એટલે કે 'ન્યૂ વર્લ્ડ ઓર્ડર'માં જ નહીં, પરંતુ એક એવી દુનિયા બનાવવામાં માને છે જે 'વધારે વ્યવસ્થિત' હોય.
રાજદ્વારી પ્રયાસો: વિશ્વમાં સ્થિરતા માત્ર પરસ્પર સંવાદ અને રાજદ્વારી પ્રયાસોથી જ લાવી શકાય છે, હિંસાથી નહીં.
વસુધૈવ કુટુંબકમ: અંતમાં તેમણે ભારતીય સંસ્કાર 'વસુધૈવ કુટુંબકમ' (આખી દુનિયા એક પરિવાર છે) ને વિશ્વ શાંતિનો મુખ્ય પાયો ગણાવ્યો હતો. તેમણે આશા વ્યક્ત કરી હતી કે SCO દેશો પરસ્પર વિશ્વાસ અને સહકારના આધારે પ્રાદેશિક સુરક્ષાને વધુ મજબૂત બનાવશે.
