Rajkot News: કહેવાય છે કે જો મનમાં અડગ શ્રદ્ધા અને કંઈક નવું કરી છૂટવાનો જઝબો હોય, તો ગમે તેટલું મોટું અંતર પણ નાનું લાગવા માંડે છે. રાજકોટના આવા જ બે સાહસિક બાઈક રાઈડર્સે એક એવો નિર્ણય લીધો છે જે સાંભળીને જ રોમાંચ થઈ આવે. રાજકોટના જીવા ભાઈ પરમાર અને એહમદ ચાવડા હવે પોતાના બાઈક પર સવાર થઈને છેક લંડન સુધીની ઐતિહાસિક સફરે નીકળવાના છે. આ બંને રાઈડર્સ રાજકોટથી બાઈક લઈને નીકળશે અને વિશ્વના અલગ-અલગ દેશો ખૂંદતા ખૂંદતા યુનાઇટેડ કિંગડમ (લંડન) પહોંચશે.
રાજકોટમાં વધુ એક ‘લવ જેહાદ’! : ખાનગી રિટેલ સંસ્થામાં સાથે નોકરી કરતાં અને પછી...
49 દિવસ, 17 દેશો અને હજારો કિલોમીટરની રોમાંચક સફર
આ કોઈ સામાન્ય મુસાફરી નથી. જીવા ભાઈ અને એહમદ ચાવડા સતત 49 દિવસ સુધી બાઈક સવારી કરશે. આ સફર દરમિયાન તેઓ કોઈ એક કે બે નહીં, પરંતુ 17 દેશોની સરહદો પાર કરીને લંડન પહોંચશે. તેમનો રૂટ કોઈ આંતરરાષ્ટ્રીય રોડ ટ્રીપના શોખીન માટે સપના સમાન છે. તેઓ રાજકોટથી નીકળીને નીચે મુજબના દેશોમાંથી પસાર થશે.
એશિયા: ભારત (રાજકોટ) થી નેપાળ, તિબેટ અને ચાઇના.
મધ્ય એશિયા અને યુરેશિયા: કઝાકિસ્તાન, રશિયા, જ્યોર્જિયા અને ટર્કી (તુર્કી).
યુરોપ: બેલગ્રેડ, બુડાપેસ્ટ, ચેક રિપબ્લિક, વિયેના, જર્મની, સ્વિડ્ઝર્લેન્ડ, સ્પેન, પોર્ટુગલ, ફ્રાંસ અને અંતે યુ.કે. (લંડન).
યાત્રા પાછળનો ઉમદા હેતુ
આ આંતરરાષ્ટ્રીય બાઈક રાઈડ માત્ર પ્રવાસ કે સાહસ પૂરતી મર્યાદિત નથી, પરંતુ તેની પાછળ એક ખૂબ જ મહત્વનો સામાજિક અને પર્યાવરણીય સંદેશ છુપાયેલો છે. જીવા ભાઈ અને એહમદ ચાવડા પોતાની આ સફર દરમિયાન વિશ્વભરમાં બે મુખ્ય વિષયો પર જાગૃતિ ફેલાવશે. સેવ ધી બેટરી (Save the Battery): ઊર્જાના યોગ્ય ઉપયોગ અને ભવિષ્યની ટેકનોલોજી પ્રત્યે જાગૃતિ. સેવ સોઈલ (Save Soil): આપણી ધરતી માતા (જમીન) ની ફળદ્રુપતા બચાવવા અને પર્યાવરણના રક્ષણ માટે વૈશ્વિક આહવાન. જ્યારે તમે બાઈક પર સવારી કરો છો, ત્યારે તમે કુદરતની સૌથી નજીક હોવ છો. અમે અમારા આ સાહસના માધ્યમથી વિશ્વને પર્યાવરણ બચાવવાનો સંદેશ આપવા માંગીએ છીએ."
રાજકોટનું ગૌરવ વધારશે આ રાઈડર્સ
આજે જ્યારે લોકો થોડાક કિલોમીટરની મુસાફરી માટે પણ પ્લેન કે ટ્રેન પસંદ કરતા હોય છે, ત્યારે બાઈક પર 17 દેશો પાર કરીને લંડન પહોંચવું એ રાજકોટ જ નહીં પરંતુ આખા ભારત દેશ માટે ગૌરવની વાત છે. આ 49 દિવસ દરમિયાન તેઓ અલગ-અલગ દેશોની સંસ્કૃતિ, હવામાન અને પડકારોનો સામનો કરીને આગળ વધશે. રાજકોટવાસીઓ અત્યારથી જ આ બંને વિરલાઓને તેમની આ અદ્ભુત અને સાહસિક સફર માટે શુભકામનાઓ પાઠવી રહ્યા છે. જીવા ભાઈ અને એહમદ ચાવડાની આ સફર સફળ રહે અને તેઓ હેમખેમ લંડન પહોંચી દેશનું નામ રોશન કરે તેવી આશા.
