'હું નિર્દોષ છું, મને ખોટી રીતે ફસાવવામાં આવી' : રાજા રઘુવંશી હત્યા કેસમાં સુપ્રીમ કોર્ટમાં સોનમનું મોટું નિવેદન

Raja Raghuvanshi Murder Case: દેશભરમાં ચર્ચામાં રહેલા રાજા રઘુવંશી હત્યાકાંડમાં વધુ એક મહત્વપૂર્ણ કાનૂની વળાંક આવ્યો છે. આ કેસની મુખ્ય આરોપી અને હાલ જામીન પર બહાર રહેલી સોનમ રઘુવંશીએ સુપ્રીમ કોર્ટમાં જવાબી સોગંદનામું (એફિડેવિટ) દાખલ કરીને પોતાને સંપૂર્ણપણે નિર્દોષ ગણાવી છે. સોનમનો દાવો છે કે તેને આ કેસમાં ખોટી રીતે ફસાવવામાં આવી છે અને તેની સામેના આરોપો માત્ર શંકા અને પરિસ્થિતિજન્ય પુરાવાઓના આધારે ઉભા કરવામાં આવ્યા છે. સોનમે સુપ્રીમ કોર્ટને જણાવ્યું છે કે, જામીન મળ્યા બાદથી તેણે ટ્રાયલની દરેક કાર્યવાહી દરમિયાન તપાસ એજન્સી અને કોર્ટને સંપૂર્ણ સહકાર આપ્યો છે. તેણે જામીનની કોઈપણ શરતનો ભંગ કર્યો નથી, તેથી તેના જામીન રદ કરવાનો કોઈ કાનૂની આધાર નથી. હવે આ સમગ્ર મામલે સુપ્રીમ કોર્ટમાં થનારી આગામી સુનાવણી પર સૌની નજર ટકેલી છે.

મેઘાલય સરકારની અરજી બાદ સુપ્રીમ કોર્ટમાં પહોંચ્યો મામલો

તાજેતરમાં મેઘાલય હાઇકોર્ટ દ્વારા સોનમ રઘુવંશીને જામીન આપવામાં આવ્યા હતા. જોકે રાજ્ય સરકારે આ નિર્ણયને સુપ્રીમ કોર્ટમાં પડકાર્યો છે. મેઘાલય સરકારનું કહેવું છે કે સોનમ સામે ગંભીર આરોપો છે અને આવા સંજોગોમાં તેને જામીન આપવાનો નિર્ણય યોગ્ય નથી. ગયા અઠવાડિયે સુનાવણી દરમિયાન સુપ્રીમ કોર્ટે સોનમને નોટિસ પાઠવી પૂછ્યું હતું કે તેના જામીન કેમ રદ ન કરવામાં આવે. ત્યારબાદ હવે સોનમે પોતાનો વિગતવાર જવાબ કોર્ટ સમક્ષ રજૂ કર્યો છે.

'મને ખોટી રીતે ફસાવવામાં આવી'

સુપ્રીમ કોર્ટમાં દાખલ કરાયેલા સોગંદનામામાં સોનમ રઘુવંશીએ જણાવ્યું છે કે તે આ કેસમાં નિર્દોષ છે અને તેને જાણીજોઈને આરોપી બનાવવામાં આવી છે. તેના જણાવ્યા અનુસાર, તપાસ એજન્સીએ માત્ર પરિસ્થિતિજન્ય પુરાવા અને અનુમાનના આધારે સમગ્ર કેસ તૈયાર કર્યો છે. માત્ર આરોપ મૂકવાથી કોઈ વ્યક્તિ ગુનેગાર સાબિત થઈ જતો નથી અને અંતિમ નિર્ણય કોર્ટના ટ્રાયલ બાદ જ થઈ શકે છે.

આ પણ વાંચો: સુપ્રીમ કોર્ટથી સોનમ રઘુવંશીને મોટી રાહત : નિર્ણય જાણીને ચોંકી જશો; સુનાવણીમાં કેતન-સિયા કેસની પણ થઈ હતી ચર્ચા

ટ્રાયલમાં સતત સહકાર આપ્યાનો દાવો

સોનમે પોતાના જવાબમાં સ્પષ્ટ કર્યું છે કે જામીન મળ્યા બાદથી તેણે કોર્ટની તમામ શરતોનું પાલન કર્યું છે. તપાસથી લઈને કોર્ટની કાર્યવાહી સુધી તેણે દરેક તબક્કે સંપૂર્ણ સહકાર આપ્યો છે. તેણે વધુમાં જણાવ્યું કે, કેસની સુનાવણીમાં જો વિલંબ થઈ રહ્યો હોય તો તેના માટે તેને જવાબદાર ઠેરવી શકાય નહીં. તે દરેક તારીખે કોર્ટ સમક્ષ હાજર રહી છે અને તપાસમાં કોઈ અવરોધ ઊભો કર્યો નથી.

'ફરી જેલ મોકલવાનો કોઈ કાનૂની આધાર નથી'

સોનમે કોર્ટને જણાવ્યું કે તેને 27 એપ્રિલ 2026ના રોજ જામીન મળ્યા હતા અને બીજા જ દિવસે તે જેલમાંથી મુક્ત થઈ ગઈ હતી. તેણે દલીલ કરી કે, ત્યારથી આજદિન સુધી તેણે જામીનની કોઈપણ શરતનો ભંગ કર્યો નથી. રાજ્ય સરકાર પણ એવો કોઈ આરોપ મૂકી શકી નથી કે, તેણે પુરાવા સાથે ચેડાં કર્યા હોય અથવા તપાસને પ્રભાવિત કરવાનો પ્રયાસ કર્યો હોય. તેથી હવે તેને ફરી જેલમાં મોકલવાનો કોઈ કાનૂની આધાર નથી.

ચાર્જશીટ દાખલ થઈ ચૂકી હોવાથી પુરાવા સાથે ચેડાંની શક્યતા નહીં સોનમે પોતાના સોગંદનામામાં વધુમાં જણાવ્યું કે પોલીસ આ કેસમાં પહેલેથી જ ચાર્જશીટ દાખલ કરી ચૂકી છે. આ સ્થિતિમાં હવે તેની પાસેથી કોઈ નવી વસ્તુ અથવા પુરાવાની જરૂર નથી. તેથી તે પુરાવા નષ્ટ કરી શકે અથવા તપાસને અસર કરી શકે તેવી દલીલ પણ યોગ્ય નથી.

અગાઉની સુનાવણીમાં શું થયું હતું?

ગત સુનાવણી દરમિયાન સોનમના વકીલે દલીલ કરી હતી કે તેની ધરપકડ વખતે તેને કાયદાકીય મદદ આપવામાં આવી નહોતી અને ધરપકડના સ્પષ્ટ કારણો પણ જણાવવામાં આવ્યા નહોતા. વકીલના જણાવ્યા અનુસાર, પોલીસે માત્ર એક ખાલી પ્રોફોર્મા તેના હાથમાં આપ્યો હતો. જોકે સુપ્રીમ કોર્ટે આ મુદ્દે સવાલ ઉઠાવતા પૂછ્યું હતું કે જો આ મુદ્દો એટલો મહત્વનો હતો તો અગાઉની સુનાવણીઓમાં કેમ રજૂ કરવામાં આવ્યો નહોતો. કોર્ટે એ પણ પૂછ્યું હતું કે, જો જામીન માત્ર ટેક્નિકલ આધાર પર મળ્યા હોય તો શું પોલીસને ફરી ધરપકડ કરવાની સત્તા નથી?

આ પણ વાંચો: રાજા રઘુવંશી હત્યાકાંડમાં મોટો ટ્વિસ્ટ! : સોનમ રઘુવંશીની મુશ્કેલી વધી શકે, જામીન રદ કરાવવા સુપ્રીમ કોર્ટ પહોંચી મેઘાલય સરકાર

મેઘાલય સરકારનો ગંભીર આરોપ

સુનાવણી દરમિયાન મેઘાલય સરકાર તરફથી હાજર રહેલા સોલિસિટર જનરલ તુષાર મહેતાએ આ સમગ્ર કેસને અત્યંત ગંભીર અને સનસનાટીભર્યો ગણાવ્યો હતો. તેમણે કોર્ટને જણાવ્યું હતું કે, ચાર્જશીટ અનુસાર સોનમ રઘુવંશી હત્યાના કાવતરાની મુખ્ય સૂત્રધાર હતી અને અન્ય આરોપીઓ સાથે મળીને સમગ્ર ઘટનાને અંજામ આપવામાં આવ્યો હતો. તેમણે એ પણ જણાવ્યું કે, નીચલી અદાલતે અગાઉ ત્રણ વખત સોનમની જામીન અરજી ફગાવી હતી. તે તમામ આદેશોમાં કોર્ટએ તેની સામે પ્રથમ દ્રષ્ટિએ મજબૂત પુરાવા હોવાનું અને ફરાર થવાની શક્યતા વ્યક્ત કરી હતી.

હવે સુપ્રીમ કોર્ટના નિર્ણય પર સૌની નજર

રાજા રઘુવંશી હત્યાકાંડનો ટ્રાયલ હજુ ચાલુ છે અને કેસમાં અંતિમ ચુકાદો આવ્યો નથી. સોનમ રઘુવંશી હાલ જામીન પર બહાર છે, જ્યારે અન્ય સહઆરોપીઓ સામેની કાર્યવાહી ચાલુ છે. બીજી તરફ મેઘાલય સરકાર અને રાજા રઘુવંશીના પરિવારજનો સોનમના જામીન રદ કરાવવા માટે કાનૂની લડાઈ લડી રહ્યા છે. હવે સુપ્રીમ કોર્ટમાં થનારી આગામી સુનાવણી આ સમગ્ર કેસ માટે અત્યંત મહત્વપૂર્ણ માનવામાં આવી રહી છે, કારણ કે તેના આધારે કેસની આગળની દિશા અને જામીન અંગેનો નિર્ણય સ્પષ્ટ થશે.