કોંગ્રેસ નેતા રાહુલ ગાંધી હાલમાં જર્મનીના પ્રવાસે છે, જ્યાં તેમણે મ્યુનિખ સ્થિત BMW ના અત્યાધુનિક પ્લાન્ટની મુલાકાત લીધી હતી. આ મુલાકાત દરમિયાન રાહુલ ગાંધી BMW F 450 GS બાઈક પર બેઠેલા જોવા મળ્યા હતા, જેની તસવીરો સોશિયલ મીડિયા પ્લેટફોર્મ X પર વાયરલ થઈ રહી છે. રાહુલ ગાંધીએ જર્મનીમાં ભારતીય ધ્વજ લહેરાતો જોઈને ગૌરવ વ્યક્ત કર્યું હતું અને કંપનીની આધુનિક મેન્યુફેક્ચરિંગ પ્રોસેસ તેમજ રોલ્સ રોયસ અને ઈલેક્ટ્રિક વ્હીકલ્સના યુનિટ્સનું નિરીક્ષણ કર્યું હતું. આ મુલાકાત બાદ ભારત માટે ખાસ તૈયાર કરવામાં આવેલી આ એડવેન્ચર બાઈકની ચર્ચાઓ તેજ થઈ છે.
'મેડ ઇન ઇન્ડિયા' ગૌરવ: તમિલનાડુમાં થશે નિર્માણ
BMW Motorradની આ નવી એન્ટ્રી લેવલ એડવેન્ચર બાઈક ભારત માટે ખૂબ જ મહત્વની છે. આ બાઈકનું ઉત્પાદન તમિલનાડુના હોસુર સ્થિત TVS પ્લાન્ટમાં કરવામાં આવી રહ્યું છે. અહીં તૈયાર થયેલી બાઈક્સ વિશ્વના 100 થી વધુ દેશોમાં નિકાસ કરવામાં આવશે. ભારતીય બજારમાં આ બાઈકની સંભવિત કિંમત 4.50 લાખ રૂપિયાની આસપાસ હોઈ શકે છે. રાહુલ ગાંધીએ પણ 450 cc ના આ ભારતીય જોડાણ પર ખુશી વ્યક્ત કરતા તેને એક શાનદાર અનુભવ ગણાવ્યો હતો.
એન્જિન પાવર અને આધુનિક ફીચર્સ
BMW F 450 GS ના પ્રોડક્શન મોડલમાં 420 cc નું શક્તિશાળી એન્જિન આપવામાં આવ્યું છે જે 48 hp પાવર અને 43 Nm ટોર્ક જનરેટ કરવાની ક્ષમતા ધરાવે છે. આ બાઈકની સૌથી મોટી ખાસિયત તેની Easy Ride Clutch (ERC) ટેકનોલોજી છે, જે રાઈડરને ઓટોમેટિક અને મેન્યુઅલ એમ બંને પ્રકારના ક્લચ ઓપરેશનની સુવિધા આપે છે. આ ઉપરાંત બાઈકમાં 6.5 ઇંચનું કલર TFT ડિસ્પ્લે, નેવિગેશન અને વિવિધ રાઈડિંગ મોડ્સ જેવા કે રેઈન, રોડ અને એન્ડ્યુરો ઉપલબ્ધ કરાવવામાં આવ્યા છે.
લોન્ચિંગ ટાઈમલાઈન અને સ્પર્ધા
અગાઉ આ બાઈક ડિસેમ્બર 2025 માં લોન્ચ થવાની અટકળો હતી, પરંતુ તાજા અહેવાલો મુજબ હવે તે જાન્યુઆરી 2026 માં ભારતીય રસ્તાઓ પર જોવા મળી શકે છે. અનેક ડીલરશીપ પર 10,000 થી 25,000 રૂપિયાના ટોકન એમાઉન્ટ સાથે તેનું બુકિંગ પણ શરૂ થઈ ચૂક્યું છે. ભારતમાં લોન્ચ થયા બાદ આ બાઈકની સીધી ટક્કર Royal Enfield Himalayan 450 અને KTM 390 Adventure સાથે થશે. આ પ્રીમિયમ બાઈક જૂની G 310 GS નું સ્થાન લેશે અને BMW-TVSની ભાગીદારીને વધુ મજબૂત બનાવશે.
