Honda : વૈશ્વિક ઓટોમોબાઈલ માર્કેટમાં હાલમાં મોટા ઉલટફેર જોવા મળી રહ્યા છે. જાપાનની દિગ્ગજ કંપની હોન્ડાએ હાલમાં એક એવો નિર્ણય લીધો છે, જેને આખા ઉદ્યોગને ચોંકાવી દીધો છે. એક તરફ કંપની એક મોટા દેશમાંથી પોતાનો વર્ષો જૂનો કાર બિઝનેસ સમેટી રહી છે, તો બીજી તરફ ભારતીય ગ્રાહકો માટે પોતાની લોકપ્રિય સેડાન 'હોન્ડા સિટી' નું નવું અવતાર લોન્ચ કરવાની તૈયારી કરી રહી છે.
દક્ષિણ કોરિયાથી વિદાય અને ભારત પર ફોકસ
હોન્ડાએ સત્તાવાર જાહેરાત કરી છે કે, તે દક્ષિણ કોરિયાના માર્કેટમાંથી 23 વર્ષ જૂનો પોતાનો ફોર-વ્હીલર બિઝનેસ સમેટવા જઈ રહી છે. વર્ષ 2026 ના અંત સુધીમાં ત્યાં હોન્ડાની કારનું વેચાણ બંધ થઈ જશે. હ્યુન્ડાઇ અને કિયા જેવી સ્થાનિક કંપનીઓના દબદબા અને ઘટતા વેચાણને કારણે કંપનીએ આ કઠોર નિર્ણય લીધો છે. જોકે, દક્ષિણ કોરિયામાં હોન્ડાનો ટુ-વ્હીલર બિઝનેસ ચાલુ રહેશે અને હાલના કાર ગ્રાહકોને સર્વિસ પણ મળતી રહેશે. આ આંતરરાષ્ટ્રીય ફેરફારો વચ્ચે હોન્ડાએ ભારત જેવા દેશોમાં પોતાની પકડ મજબૂત કરવા માટે 22 મેના રોજ નવી 'હોન્ડા સિટી ફેસલિફ્ટ' લોન્ચ કરવાની જાહેરાત કરીને બધાનું ધ્યાન ખેંચ્યું છે.
લોન્ચિંગ અને બજારમાં સ્પર્ધા
ભારતમાં આગામી 22 મેના રોજ નવી હોન્ડા સિટી ફેસલિફ્ટ સત્તાવાર રીતે માર્કેટમાં ઉતરશે. પાંચમી જનરેશનની સિટીમાં આ પ્રથમ મોટું અપડેટ છે. ભારતમાં સેડાન સેગમેન્ટમાં હ્યુન્ડાઇ વર્ના અને સ્કોડા સ્લેવિયા જેવી કારોનો પ્રભાવ વધી રહ્યો છે, ત્યારે હોન્ડા પોતાની આ પ્રીમિયમ સેડાનને નવા લુક અને મોડર્ન ટેકનોલોજી સાથે ઉતારીને ગ્રાહકોને ફરી પોતાની તરફ આકર્ષવા માંગે છે.
આ પણ ખાસ વાંચો : હોન્ડાએ લીધો ઐતિહાસિક નિર્ણય : 23 વર્ષ પછી ઓટોમોબાઈલ માર્કેટમાંથી કરશે એક્ઝિટ!
બાહ્ય ડિઝાઇન અને આકર્ષક દેખાવ
નવી હોન્ડા સિટીમાં ડિઝાઇનની દ્રષ્ટિએ ઘણા ક્લાસી ફેરફારો કરવામાં આવ્યા છે. તેમાં સુધારેલા બમ્પર, અપડેટેડ હેડલેમ્પ્સ અને ટેલ-લેમ્પ્સ આપવામાં આવ્યા છે, જે કારને વધુ સ્લીક અને આધુનિક લુક આપે છે. આ ઉપરાંત, નવા ડાયમંડ-કટ એલોય વ્હીલ્સ કારના એકંદર દેખાવમાં ચાર ચાંદ લગાવશે. જોકે કારનું મૂળ માળખું એવું જ રાખવામાં આવ્યું છે, પરંતુ આ નાના ફેરફારો તેને વિઝ્યુઅલી ખૂબ જ આકર્ષક બનાવે છે.
કેબિન લક્ઝરી અને પ્રીમિયમ ફીચર્સ
કારના ઇન્ટિરિયરને આ વખતે વધુ મોડર્ન બનાવવામાં આવ્યું છે. તેમાં અપડેટેડ સોફ્ટવેર સાથે મોટી ટચસ્ક્રીન ઇન્ફોટેનમેન્ટ સિસ્ટમ, સંપૂર્ણ ડિજિટલ ઇન્સ્ટ્રુમેન્ટ ક્લસ્ટર અને પ્રીમિયમ ક્વોલિટીની નવી અપહોલ્સ્ટરી જોવા મળશે. વધુમાં, પાવર્ડ ડ્રાઇવર સીટ, વેન્ટિલેટેડ ફ્રન્ટ સીટ્સ અને 360-ડિગ્રી કેમેરા જેવા પ્રીમિયમ ફીચર્સ આ કારને તેના સેગમેન્ટમાં સૌથી સ્પર્ધાત્મક બનાવે છે. સેફટી માટે હોન્ડાની એડવાન્સ ADAS સિસ્ટમ પણ આમાં સામેલ હશે.
એન્જિન પાવર અને પરફોર્મન્સ
મિકેનિકલ ફેરફાર વગર હોન્ડાએ તેના ભરોસાપાત્ર 1.5-લિટર i-VTEC પેટ્રોલ એન્જિન (121hp) અને 1.5-લિટર હાઇબ્રિડ એન્જિન (126hp) ને જાળવી રાખ્યા છે. ગ્રાહકો પોતાની જરૂરિયાત મુજબ મેન્યુઅલ અથવા CVT ઓટોમેટિક ટ્રાન્સમિશન પસંદ કરી શકશે. કંપનીનો ઉદ્દેશ્ય શ્રેષ્ઠ પરફોર્મન્સની સાથે ફ્યુઅલની બચત (Efficiency) આપવાનો છે.
