પાટણ જિલ્લાના રાધનપુર નગરપાલિકામાં સ્થાનિક પ્રશ્નોની રજૂઆત દરમિયાન સર્જાયેલા વિવાદે રાજકીય રંગ પકડ્યો છે. નગરપાલિકાના વોર્ડ નં. 1ના પ્રશ્નોને લઈને કોંગ્રેસના મહિલા સભ્ય જયા સોની 100થી વધુ સ્થાનિક રહેવાસીઓ સાથે પાલિકા કચેરીએ પહોંચ્યા હતા. આ દરમિયાન પાલિકા પ્રમુખ ભાવના જોષીએ પોતાના પર હુમલાનો પ્રયાસ થયો હોવાનો ગંભીર આક્ષેપ કર્યો છે.
ઘટનાને પગલે રાધનપુર નગરપાલિકામાં ભારે ચકચાર મચી છે. સમગ્ર મામલે પ્રમુખ ભાવના જોષીએ ચીફ ઓફિસરને લેખિત રજૂઆત કરીને ઘટનાની તપાસ કરવાની માંગ કરી છે.
વોર્ડના પ્રશ્નોની રજૂઆત દરમિયાન સર્જાયો વિવાદ
મળતી માહિતી અનુસાર, વોર્ડ નં. 1ના નાગોરિવાસ વિસ્તારમાં પાણી, રસ્તા, ગટર સહિતના સ્થાનિક પ્રશ્નોને લઈને મોટી સંખ્યામાં રહેવાસીઓ કોંગ્રેસ સભ્ય જયા સોની સાથે નગરપાલિકા કચેરીએ પહોંચ્યા હતા.
સ્થાનિકોના જણાવ્યા મુજબ તેઓ પોતાના વિસ્તારની લાંબા સમયથી ચાલી રહેલી સમસ્યાઓ અંગે રજૂઆત કરવા આવ્યા હતા. જોકે, રજૂઆત દરમિયાન વાતાવરણ તંગ બન્યું હતું અને પાલિકા કચેરીમાં ભારે હોબાળો સર્જાયો હતો.
પ્રમુખનો આક્ષેપ: ઓફિસમાં હલ્લાબોલ અને ધાકધમકી
નગરપાલિકા પ્રમુખ ભાવના જોષીના જણાવ્યા અનુસાર, આશરે 100થી વધુ લોકોનું ટોળું તેમની ઓફિસ સુધી પહોંચ્યું હતું. તેમણે આક્ષેપ કર્યો છે કે રજૂઆતના નામે ઓફિસમાં હલ્લાબોલ મચાવવામાં આવ્યો હતો અને સમગ્ર ઘટનાક્રમ દરમિયાન ધાકધમકીનું વાતાવરણ ઊભું કરવામાં આવ્યું હતું.
પ્રમુખના જણાવ્યા મુજબ પરિસ્થિતિ એટલી ગંભીર બની હતી કે તેમને પોતાના પર હુમલો થવાની આશંકા થઈ હતી. જેના કારણે તેઓ અને તેમના પતિએ ઓફિસ છોડીને બહાર નીકળવાનું પસંદ કર્યું હતું.
ચીફ ઓફિસરને પત્ર લખી તપાસની માંગ
સમગ્ર ઘટનાને ગંભીર ગણાવતા પ્રમુખ ભાવના જોષીએ નગરપાલિકાના ચીફ ઓફિસરને પત્ર લખીને સમગ્ર ઘટનાની તપાસ કરવાની માંગ કરી છે. રજૂઆતમાં તેમણે ઓફિસમાં થયેલા હોબાળા, ધાકધમકી અને હુમલાના પ્રયાસ જેવા મુદ્દાઓનો ઉલ્લેખ કર્યો હોવાનું જાણવા મળે છે.
હવે નગરપાલિકા તંત્ર દ્વારા આ મામલે શું કાર્યવાહી કરવામાં આવે છે અને તપાસમાં શું તથ્યો સામે આવે છે તેના પર સૌની નજર છે.
રાજકીય માહોલ ગરમાયો
આ ઘટનાએ રાધનપુરના રાજકારણમાં ગરમાવો લાવી દીધો છે. એક તરફ પ્રમુખે હુમલાના પ્રયાસ અને ગેરવર્તનના આક્ષેપો કર્યા છે, જ્યારે બીજી તરફ સ્થાનિકો પોતાના વિસ્તારના પ્રશ્નોને લઈને અવાજ ઉઠાવી રહ્યા હોવાનું જણાવી રહ્યા છે.
વોર્ડ નં. 1ના વિકાસના પ્રશ્નોથી શરૂ થયેલો મુદ્દો હવે રાજકીય વિવાદમાં ફેરવાઈ ગયો છે. આગામી દિવસોમાં બંને પક્ષો તરફથી વધુ નિવેદનો અને કાર્યવાહી સામે આવે તેવી શક્યતા છે.
