કેનેડામાં પંજાબી યુવતીની હત્યા, લિવ-ઇન પાર્ટનર ઝડપાયો
કેનેડાના એડમન્ટનમાં રહેતી પંજાબના લુધિયાણા જિલ્લાના સમરાલાની રહેવાસી 23 વર્ષીય દમનપ્રીત કૌરની હત્યાના કેસમાં પોલીસે તેના 22 વર્ષીય લિવ-ઇન પાર્ટનર ઋતિશ કુમારની ધરપકડ કરી છે. પોલીસે તેની સામે Second-Degree Murderનો ગુનો નોંધ્યો છે. પ્રાથમિક તપાસમાં આ ઘટનાને ઇન્ટિમેટ પાર્ટનર હોમિસાઇડ તરીકે ગણાવવામાં આવી છે.
બેભાન હાલતમાં મળી, સારવાર દરમિયાન મોત
એડમન્ટન પોલીસને 9 Julyના રોજ સિલ્વરબેરી વિસ્તારમાં આવેલા એક મકાનમાંથી બેભાન હાલતમાં યુવતી હોવાની જાણ થઈ હતી. પોલીસ અને પેરામેડિક્સ ઘટનાસ્થળે પહોંચ્યા બાદ દમનપ્રીતને ગંભીર હાલતમાં હોસ્પિટલમાં ખસેડવામાં આવી હતી. સારવાર દરમિયાન 12 Julyના રોજ તેનું મોત થયું હતું.
પોસ્ટમોર્ટમમાં ગળું દબાવી હત્યાની પુષ્ટિ
14 Julyના રોજ થયેલા પોસ્ટમોર્ટમમાં દમનપ્રીતનું મૃત્યુ ગળું દબાવવાના કારણે થયું હોવાનું સામે આવ્યું. ત્યારબાદ પોલીસે આ કેસને હત્યા તરીકે નોંધ્યો અને તપાસ આગળ વધારી.
આરોપીની ધરપકડ, અન્ય કોઈ શંકાસ્પદ નહીં
તપાસ દરમિયાન પોલીસે 22 Julyના રોજ દિલ્હીના રહેવાસી ઋતિશ કુમારની ધરપકડ કરી હતી. પોલીસે જણાવ્યું કે હાલ આ કેસમાં અન્ય કોઈ શંકાસ્પદ વ્યક્તિની શોધ કરવામાં આવી રહી નથી. આરોપી સામે કોર્ટમાં કાર્યવાહી શરૂ થશે.
અભ્યાસ માટે ગઈ હતી કેનેડા
પરિવારના જણાવ્યા મુજબ દમનપ્રીત લગભગ 5 વર્ષ પહેલાં સ્ટડી વિઝા પર કેનેડા ગઈ હતી. અભ્યાસ દરમિયાન તેની ઋતિશ સાથે ઓળખાણ થઈ હતી અને બાદમાં બંને લિવ-ઇન સંબંધમાં રહેતા હતા. હાલમાં પરિવાર દમનપ્રીતના પાર્થિવ દેહને ભારત લાવવા માટે આર્થિક સહાય એકત્ર કરી રહ્યો છે.
