2027ની પંજાબ વિધાનસભા ચૂંટણીને ધ્યાનમાં રાખીને કોંગ્રેસે રાજ્યમાં સંગઠનને વધુ મજબૂત બનાવવા માટે નવી ચૂંટણી ટીમની જાહેરાત કરી છે. જોકે આ નિર્ણય બાદ પક્ષની અંદર અસંતોષ અને જૂથબંધી ખુલ્લેઆમ સામે આવવા લાગી છે. નવા સંગઠનમાં કેટલાક વરિષ્ઠ નેતાઓને અપેક્ષા મુજબની જવાબદારી ન મળતા તેઓએ અસંતોષ વ્યક્ત કર્યો છે. રાજકીય વિશ્લેષકોનું માનવું છે કે ચૂંટણી પહેલાં ઊભો થયેલો આ આંતરિક મતભેદ કોંગ્રેસ માટે મુશ્કેલી ઊભી કરી શકે છે અને વિરોધી પક્ષો તેનો રાજકીય લાભ લેવાનો પ્રયાસ કરી શકે છે. 1 જુલાઈ 2026ના રોજ અખિલ ભારતીય કોંગ્રેસ કમિટી (AICC) દ્વારા પંજાબ માટે નવી ચૂંટણી ટીમની જાહેરાત કરવામાં આવી હતી. આ જાહેરાત બાદ પૂર્વ મુખ્યમંત્રી ચરણજીત સિંહ ચન્ની અને ચંડીગઢથી સાંસદ મનીષ તિવારી સહિત કેટલાક નેતાઓએ સોશિયલ મીડિયા અને જાહેર મંચો પર પોતાની નારાજગી વ્યક્ત કરી હતી. પક્ષના અન્ય કેટલાક નેતાઓ પણ અંદરખાને નિર્ણય સામે અસંતોષ ધરાવતા હોવાનું રાજકીય વર્તુળોમાં ચર્ચાઈ રહ્યું છે.
રાજા વડીંગને ફરી સોંપાઈ પ્રદેશ અધ્યક્ષની જવાબદારી
કોંગ્રેસ હાઈકમાન્ડે પંજાબ પ્રદેશ કોંગ્રેસ અધ્યક્ષ તરીકે અમરિંદર સિંહ રાજા વડીંગ પર ફરી વિશ્વાસ વ્યક્ત કર્યો છે. સાથે જ વિધાનસભામાં વિરોધ પક્ષના નેતા તરીકે પ્રતાપ સિંહ બાજવાનું સ્થાન યથાવત રાખવામાં આવ્યું છે.
નવી રચનામાં પૂર્વ મુખ્યમંત્રી ચરણજીત સિંહ ચન્નીને ચૂંટણી અભિયાન સમિતિના અધ્યક્ષ બનાવવામાં આવ્યા છે. સુખજિંદર સિંહ રંધાવાને કોર કમિટીના અધ્યક્ષ અને વિજય ઇન્દર સિંગલાને ચૂંટણી વ્યવસ્થાપન અને સમન્વય સમિતિની જવાબદારી સોંપવામાં આવી છે. જોકે, ચન્ની અને તેમના સમર્થકો આ નિર્ણયથી સંતોષ માનતા નથી.
આ પણ વાંચો: PM મોદીએ દેશની પ્રથમ ગ્રીનફિલ્ડ રિફાઇનરી રાષ્ટ્રને કરી સમર્પિત : ઊર્જા સુરક્ષા પર આપ્યું મોટું નિવેદન
ચન્નીના સમર્થકોનું શક્તિ પ્રદર્શન
ચરણજીત સિંહ ચન્ની પંજાબ કોંગ્રેસના પ્રદેશ અધ્યક્ષ પદના મુખ્ય દાવેદારોમાં ગણાતા હતા. તેમના સમર્થકોને આશા હતી કે ચૂંટણી પૂર્વે સંગઠનમાં ફેરફાર કરીને ચન્નીને રાજ્ય સંગઠનની કમાન સોંપવામાં આવશે. પરંતુ પ્રદેશ અધ્યક્ષ તરીકે રાજા વડીંગને યથાવત રાખવામાં આવતા ચન્ની કેમ્પમાં અસંતોષ વધ્યો. આ નિર્ણય બાદ ચન્નીએ પોતાના મોરિંડા સ્થિત નિવાસસ્થાને સમર્થકોની બેઠક બોલાવી હતી. બેઠકમાં પૂર્વ મંત્રીઓ, પૂર્વ ધારાસભ્યો અને અન્ય કોંગ્રેસી નેતાઓ મોટી સંખ્યામાં હાજર રહ્યા હતા. બેઠક દરમિયાન રાજા વડીંગને પ્રદેશ અધ્યક્ષ પદ પરથી હટાવવાની અથવા ચરણજીત સિંહ ચન્નીને આગામી વિધાનસભા ચૂંટણી માટે કોંગ્રેસના મુખ્યમંત્રી પદના ચહેરા તરીકે જાહેર કરવાની માંગ કરવામાં આવી હોવાનું જાણવા મળે છે.
હાઈકમાન્ડને સાત દિવસનો સમય આપ્યાનો દાવો
સૂત્રોના જણાવ્યા અનુસાર ચન્નીના નિવાસસ્થાને યોજાયેલી બેઠકમાં હાલના ત્રણ ધારાસભ્યો, અંદાજે 25 પૂર્વ ધારાસભ્યો, પૂર્વ કેબિનેટ મંત્રીઓ અને પૂર્વ સાંસદોએ હાજરી આપી હતી. પૂર્વ ઉપમુખ્યમંત્રી ઓપી સોની, પૂર્વ મંત્રી ભારત ભૂષણ આશુ, ગુરકીરત સિંહ કોટલી સહિત અનેક વરિષ્ઠ નેતાઓ પણ બેઠકમાં સામેલ થયા હતા. ચન્નીના સમર્થકોએ એક વિશેષ સમિતિ રચવાનો નિર્ણય લીધો હોવાનું કહેવાય છે. આ સમિતિ ટૂંક સમયમાં દિલ્હી જઈ કોંગ્રેસ હાઈકમાન્ડ અને રાહુલ ગાંધી સાથે મુલાકાત કરીને પંજાબ કોંગ્રેસના નેતૃત્વ અંગે પુનર્વિચાર કરવાની માંગ કરશે. મીડિયા અહેવાલો અનુસાર સમર્થકોએ આ મુદ્દે હાઈકમાન્ડને સાત દિવસનો સમય આપ્યો હોવાનું પણ જણાવાયું છે.
ચન્ની પ્રદેશ અધ્યક્ષ કેમ બનવા માંગે છે?
રાજકીય નિરીક્ષકોના મત મુજબ ચરણજીત સિંહ ચન્નીનું લક્ષ્ય માત્ર સંગઠનનું નેતૃત્વ નહીં પરંતુ આગામી વિધાનસભા ચૂંટણીમાં કોંગ્રેસને પોતાના નેતૃત્વ હેઠળ જીત અપાવી ફરી એકવાર મુખ્યમંત્રી પદ સુધી પહોંચવાનું હોઈ શકે છે. જો તેઓ પ્રદેશ અધ્યક્ષ બને તો ચૂંટણીની વ્યૂહરચના, ઉમેદવારોની પસંદગી અને સંગઠન પર તેમનો વધુ પ્રભાવ રહી શકે છે, જે તેમના રાજકીય ભવિષ્ય માટે મહત્વપૂર્ણ માનવામાં આવે છે. જોકે કોંગ્રેસ તરફથી હજુ સુધી ચન્નીને મુખ્યમંત્રી પદના ચહેરા તરીકે જાહેર કરવામાં આવ્યા નથી અને પાર્ટીએ સત્તાવાર રીતે નેતૃત્વમાં કોઈ ફેરફારના સંકેત પણ આપ્યા નથી.
આ પણ વાંચો: સોનમ વાંગચુકનું 5 kg વજન ઘટ્યું : અનશન વચ્ચે તબિયત બગડી
મનીષ તિવારી અને રંધાવા પણ ચર્ચામાં
ચંડીગઢના સાંસદ મનીષ તિવારી પણ પંજાબ કોંગ્રેસના પ્રદેશ અધ્યક્ષ પદના સંભવિત દાવેદારોમાં ગણાતા હતા. પરંતુ નવી ચૂંટણી ટીમમાં તેમને કોઈ મહત્વપૂર્ણ જવાબદારી સોંપવામાં આવી નથી. ત્યારબાદ તેમણે સોશિયલ મીડિયા મારફતે પોતાની નારાજગી વ્યક્ત કરી હોવાનું સામે આવ્યું છે. બીજી તરફ કોર કમિટીના અધ્યક્ષ સુખજિંદર સિંહ રંધાવા પણ છેલ્લા કેટલાક દિવસોથી રાજકીય ચર્ચાના કેન્દ્રમાં રહ્યા છે. તાજેતરમાં તેઓ દિલ્હીમાં કેન્દ્રીય ગૃહમંત્રી અમિત શાહને મળ્યા હતા, જેના પગલે તેમના પક્ષ બદલવાની અટકળો શરૂ થઈ હતી. જોકે રંધાવાએ આ તમામ અટકળોને નકારી કાઢી છે અને કોંગ્રેસ છોડવાની વાતને માત્ર અફવા ગણાવી છે.
ચૂંટણી પહેલાં કોંગ્રેસ સામે એકતા જાળવવાનો પડકાર
પંજાબમાં કોંગ્રેસ માટે આગામી વિધાનસભા ચૂંટણી અત્યંત મહત્વપૂર્ણ માનવામાં આવે છે. એક તરફ પક્ષ રાજ્યમાં ફરી સત્તામાં વાપસીનો પ્રયાસ કરી રહ્યો છે, તો બીજી તરફ આંતરિક અસંતોષ અને નેતૃત્વને લઈને ઊભા થયેલા મતભેદો ચૂંટણી વ્યૂહરચનાને અસર કરી શકે છે. રાજકીય નિષ્ણાતોનું માનવું છે કે જો કોંગ્રેસ હાઈકમાન્ડ સમયસર અસંતોષ દૂર કરવામાં સફળ નહીં થાય તો પક્ષની ચૂંટણી તૈયારી પર તેની સીધી અસર પડી શકે છે. બીજી તરફ જો તમામ વરિષ્ઠ નેતાઓને સાથે રાખીને સંગઠનાત્મક એકતા જાળવી શકાશે તો કોંગ્રેસ માટે ચૂંટણીમાં મજબૂત પડકાર ઉભો કરવાની તક હજુ પણ યથાવત રહી શકે છે.
