Skoda Kushaq Facelift : ભારતીય ઓટોમોબાઈલ માર્કેટમાં મિડસાઇઝ SUV સેગમેન્ટ અત્યારે સૌથી વધુ ચર્ચામાં છે. આ સેગમેન્ટમાં પોતાનો દબદબો જાળવી રાખવા માટે સ્કોડા ઇન્ડિયાએ તેની લોકપ્રિય SUV Kushaq નું નવું અવતાર ‘Skoda Kushaq Facelift’ રજૂ કર્યું છે. કંપનીએ પુણે સ્થિત પોતાના પ્લાન્ટમાં આ નવી કારનું પ્રોડક્શન સત્તાવાર રીતે શરૂ કરી દીધું છે અને પહેલી યુનિટ પણ રોલ-આઉટ થઈ ગઈ છે.
પુણે પ્લાન્ટમાં પ્રોડક્શનનો આરંભ
સ્કોડા ઓટો ફોક્સવેગન ઇન્ડિયાએ એક મોટી સિદ્ધિ હાંસલ કરતા પુણે પ્લાન્ટમાં નવી કુશાકનું ઉત્પાદન શરૂ કર્યું છે. આ એસયુવી ‘ઇન્ડિયા 2.0’ વ્યૂહરચનાનો એક મહત્વનો ભાગ છે. કંપનીના મેનેજિંગ ડિરેક્ટર પીયૂષ અરોરાના જણાવ્યા અનુસાર, કુશાકનું ઉત્પાદન શરૂ થવું એ ભારત પ્રત્યેની તેમની લાંબા ગાળાની પ્રતિબદ્ધતા દર્શાવે છે.
કિંમત અને ડિલિવરીની વિગત
નવી કુશાક માટે રાહ જોઈ રહેલા ગ્રાહકો માટે સારા સમાચાર છે. આ કારનું વર્લ્ડ પ્રીમિયર જાન્યુઆરીમાં થઈ ચૂક્યું છે અને હવે તેની કિંમતોનો ખુલાસો આવતા મહિને એટલે કે, માર્ચ 2026 માં કરવામાં આવશે. કિંમત જાહેર થતાની સાથે જ તેની ડિલિવરી પણ શરૂ કરી દેવામાં આવશે. હાલમાં આ કારનું પ્રી-બુકિંગ ચાલી રહ્યું છે.
સેગમેન્ટમાં પહેલીવાર મળતા ખાસ ફીચર્સ
નવી સ્કોડા કુશાકમાં એવા ઘણા ફીચર્સ ઉમેરવામાં આવ્યા છે જે આ સેગમેન્ટની અન્ય કારોમાં જોવા મળતા નથી. તેમાં સેગમેન્ટ-ફર્સ્ટ રીઅર સીટ મસાજ ફંક્શન આપવામાં આવ્યું છે, જે મુસાફરોના આરામમાં વધારો કરશે. આ ઉપરાંત, કારમાં હવે મોટી પેનોરેમિક સનરૂફ અને નવું 8-સ્પીડ ટોર્ક કન્વર્ટર ઓટોમેટિક ટ્રાન્સમિશન પણ મળશે, જે ડ્રાઇવિંગ અનુભવને વધુ સ્મૂધ બનાવશે.
સુરક્ષા અને લુકમાં મોટો સુધારો
સ્કોડા હંમેશા તેની મજબૂતી માટે જાણીતી છે. નવી કુશાકમાં 40 થી વધુ એક્ટિવ અને પેસિવ સેફ્ટી ફીચર્સ આપવામાં આવ્યા છે, જે તેને 5-સ્ટાર સેફ્ટી રેટિંગ સુનિશ્ચિત કરવામાં મદદ કરે છે. કારના એક્સટીરિયરમાં પણ ફેરફાર કરવામાં આવ્યા છે, જે તેને પહેલા કરતા વધુ પ્રીમિયમ અને આધુનિક લુક આપે છે. ઇન્ટિરિયરને પણ અપડેટ કરીને વધુ આરામદાયક બનાવવામાં આવ્યું છે.
ભારત માટે ખાસ નિર્મિત SUV
આ એસયુવી ‘મેક ઇન ઇન્ડિયા, ફોર ઇન્ડિયા એન્ડ ધ વર્લ્ડ’ વિઝન હેઠળ તૈયાર કરવામાં આવી છે. તેનો અર્થ એ છે કે, તેને ભારતની રસ્તાની સ્થિતિ અને ગ્રાહકોની જરૂરિયાતોને ધ્યાનમાં રાખીને ડિઝાઇન કરવામાં આવી છે. 2025 માં સ્કોડા ગ્રુપે જે 1,17,000 યુનિટ્સનું રેકોર્ડ વેચાણ કર્યું હતું, તેમાં કુશાકનો ફાળો ઘણો મોટો રહ્યો છે.
