Porbandar News: પોરબંદર જિલ્લામાં ઇન્ડિયન નેવીના અનમેન્ડ એરિયલ વ્હીકલ (UAV) સાથે અકસ્માત સર્જાયો હોવાની માહિતી સામે આવી છે. પોરબંદર એરપોર્ટ પાછળ આવેલા ધરમપુર વિસ્તાર નજીક પેટ્રોલિંગ દરમિયાન ઇન્ડિયન નેવીનું UAV અચાનક ક્રેશ થયું હતું. ઘટનાની જાણ થતાં જ નેવી, સ્થાનિક પોલીસ અને અન્ય સુરક્ષા એજન્સીઓની ટીમો તાત્કાલિક સ્થળ પર પહોંચી ગઈ હતી અને સમગ્ર વિસ્તારને સુરક્ષાના ભાગરૂપે કોર્ડન કરી તપાસ શરૂ કરવામાં આવી હતી. પ્રાથમિક માહિતી અનુસાર, આ UAV નિયમિત પેટ્રોલિંગ અને હવાઈ સર્વેલન્સ મિશન પર હતું. ઉડાન દરમિયાન ટેકનિકલ ખામી અથવા અન્ય કોઈ કારણસર તેનો સંપર્ક તૂટી ગયો હોવાનું માનવામાં આવી રહ્યું છે. જોકે, ક્રેશનું ચોક્કસ કારણ સત્તાવાર તપાસ પૂર્ણ થયા બાદ જ સ્પષ્ટ થશે.
હવાઈ સર્વેલન્સ અને સુરક્ષા માટે થાય છે ઉપયોગ
મળતી માહિતી મુજબ, ઇન્ડિયન નેવી દ્વારા ઉપયોગમાં લેવાતું આ UAV દરિયાકાંઠાની સુરક્ષા, હવાઈ સર્વેલન્સ અને આકાશી દૃશ્યો કૅમેરામાં કેદ કરવા માટે ઉપયોગમાં લેવાતું હતું. આવા ડ્રોનમાં ઉચ્ચ ગુણવત્તાના કેમેરા અને આધુનિક સેન્સર લગાવવામાં આવ્યા હોય છે, જેના દ્વારા દરિયાઈ વિસ્તારમાં શંકાસ્પદ હિલચાલ પર સતત નજર રાખવામાં આવે છે. ભારતનો લાંબો દરિયાકિનારો સુરક્ષિત રાખવા માટે ઇન્ડિયન નેવી અને કોસ્ટ ગાર્ડ દ્વારા આવા અનમેન્ડ એરિયલ વ્હીકલનો નિયમિત ઉપયોગ કરવામાં આવે છે. પેટ્રોલિંગ ઉપરાંત શોધ અને બચાવ કામગીરી તેમજ સંવેદનશીલ વિસ્તારોની દેખરેખમાં પણ આ ટેક્નોલોજી મહત્વની ભૂમિકા ભજવે છે.
તપાસ બાદ જ કારણ આવશે સામે
ઘટના બાદ સુરક્ષા એજન્સીઓએ UAVના અવશેષોને કબજામાં લઈ ટેકનિકલ તપાસ શરૂ કરી છે. અકસ્માત પાછળ ટેકનિકલ ખામી, સંચાર વ્યવસ્થામાં અવરોધ, હવામાનની અસર કે અન્ય કોઈ કારણ જવાબદાર છે કે નહીં તે અંગે નિષ્ણાતો તપાસ કરશે. સત્તાવાર સૂત્રોના જણાવ્યા મુજબ, હાલ ઘટનામાં કોઈ જાનહાનિ અથવા સ્થાનિક નાગરિકને નુકસાન થયાની માહિતી સામે આવી નથી. તેમ છતાં સાવચેતીના ભાગરૂપે ઘટના સ્થળને સુરક્ષિત કરી દેવામાં આવ્યું છે.
આ પણ વાંચો : રાજકોટ મનપામાં ભ્રષ્ટાચારના આક્ષેપ : જંગલેશ્વર મેગા ડેમોલિશનના લાખોના ખર્ચનો નાગરિકે RTIથી માંગ્યો હિસાબ
પોરબંદર વ્યૂહાત્મક રીતે મહત્વનું કેન્દ્ર
પોરબંદર ભારતીય નૌકાદળ માટે વ્યૂહાત્મક રીતે અત્યંત મહત્વનું સ્થળ માનવામાં આવે છે. અરબી સમુદ્રના દરિયાકાંઠે આવેલા આ વિસ્તારમાં નેવી અને કોસ્ટ ગાર્ડની સતત દેખરેખ રહેતી હોય છે. દરિયાઈ સુરક્ષા, સ્મગલિંગ અટકાવવું, ગેરકાયદેસર ઘૂસણખોરી પર નજર રાખવી અને સંવેદનશીલ વિસ્તારોનું મોનિટરિંગ કરવા માટે અદ્યતન UAVનો ઉપયોગ કરવામાં આવે છે.
તાજેતરમાં દરિયાકાંઠાની સુરક્ષા વધુ મજબૂત બનાવવા માટે વિવિધ પ્રકારના સર્વેલન્સ સાધનો અને ડ્રોન ટેક્નોલોજીનો વ્યાપ વધારવામાં આવ્યો છે. આવી સ્થિતિમાં UAV ક્રેશની ઘટનાને ગંભીરતાથી લઈને તેના તમામ પાસાઓની તપાસ કરવામાં આવી રહી છે.
