PM Modi On Somnath Temple: ગુજરાતના સોમનાથ મંદિર પર થયેલા હુમલાની 1,000 મી વર્ષગાંઠ પર વડા પ્રધાન નરેન્દ્ર મોદીએ એક ઈમોશનલ પોસ્ટ લખી હતી. પોતાની સોશિયલ મીડિયા પોસ્ટમાં તેમણે સોમનાથને ભારતના આત્માનું સ્વરૂપ ગણાવ્યું હતું. PM મોદીએ લખ્યું હતું કે "સોમનાથ" શબ્દ સાંભળીને તેમનું હૃદય અને મન ગર્વથી ભરાઈ જાય છે. તેમણે તેને માત્ર એક મંદિર નહીં, પરંતુ ભારતની સંસ્કૃતિ, સભ્યતા અને અટલ શ્રદ્ધાનું પ્રતીક ગણાવ્યું હતું. તમને જણાવી દઈએ કે PM મોદી 11 જાન્યુઆરીએ સોમનાથ મંદિરની મુલાકાત લેવાના છે.
'હુમલા પછી પણ મંદિર અકબંધ છે'
PM મોદીએ પોતાની પોસ્ટમાં આગળ લખ્યું છે કે સોમનાથ શિવલિંગના દર્શન કરવાથી વ્યક્તિ પાપોથી મુક્ત થાય છે અને તેની બધી ઇચ્છાઓ પૂર્ણ થાય છે. મંદિર પર થયેલા હુમલાનો ઉલ્લેખ કરતા પ્રધાનમંત્રીએ કહ્યું કે 1026 માં વિદેશી આક્રમણખોર મહમૂદ ગઝનવીએ આ પવિત્ર સ્થળ પર હુમલો કર્યો અને તેનો નાશ કરવાનો પ્રયાસ કર્યો. તેમણે આગળ લખ્યું કે સોમનાથની ગાથા વિનાશની નહીં પરંતુ પુનર્નિર્માણ અને હિંમતની છે. સોમનાથ પર અનેક હુમલાઓનો સામનો કરવો પડ્યો, પરંતુ તે અડગ રહ્યો. PM મોદીએ અહિલ્યાબાઈ હોલકર અને સ્વામી વિવેકાનંદ સહિત ઘણા મહાપુરુષોના યોગદાનનો ઉલ્લેખ કર્યો.
નેહરુ પર સાધ્યું નિશાન
પ્રધાનમંત્રી મોદીએ પોસ્ટમાં લખ્યું છે કે 1947 માં સરદાર વલ્લભભાઈ પટેલે સોમનાથની મુલાકાત લીધી હતી અને તેનું પુનઃનિર્માણ કરવાની પ્રતિજ્ઞા લીધી હતી. આ પછી, 11 મે, 1951 ના રોજ, મંદિર ભક્તો માટે ફરી ખુલ્લું મૂકવામાં આવ્યું હતું. PM મોદીએ કહ્યું કે તે સમયે પણ પંડિત જવાહરલાલ નહેરુએ આનો વિરોધ કર્યો હતો, પરંતુ ઇતિહાસે સાબિત કર્યું છે કે આ નિર્ણય એકદમ સાચો હતો. પ્રધાનમંત્રી મોદીએ કેએમ મુનશીનો પણ તેમના યોગદાન બદલ આભાર માન્યો, કારણ કે તેમણે મંદિરના નિર્માણમાં સરદાર પટેલને ખૂબ જ ટેકો આપ્યો હતો. તમને જણાવી દઈએ કે આ વર્ષે, સોમનાથ સ્વાભિમાન પર્વનું આયોજન કરવામાં આવી રહ્યું છે. 8 થી 11 જાન્યુઆરી સુધી, સોમનાથમાં અનેક આધ્યાત્મિક અને સામાજિક કાર્યક્રમો યોજાશે. દેશભરના સંતો, ભક્તો અને સામાજિક સંગઠનો ભાગ લેશે. 11 જાન્યુઆરીએ, પીએમ મોદી પોતે સોમનાથની મુલાકાત લેશે.
