નિરજા ગુપ્તાનો કાર્યકાળ પૂર્ણ થતાં HRDC વિભાગના વડા પ્રો. જગદીશ જોશીની કાર્યકારી કુલપતિ તરીકે નિમણૂક; કાયમી કુલપતિની પસંદગી સુધી સંભાળશે કાર્યભાર
ગુજરાત યુનિવર્સિટીમાં નવા કાર્યકારી કુલપતિની નિમણૂક કરવામાં આવી છે. યુનિવર્સિટીના જ હ્યુમન રિસોર્સ ડેવલપમેન્ટ સેન્ટર (HRDC)ના વડા પ્રો. જગદીશ જોશીને કાર્યકારી કુલપતિ તરીકે જવાબદારી સોંપવામાં આવી છે. તેઓ કાયમી કુલપતિની નિમણૂક ન થાય ત્યાં સુધી આ પદનો કાર્યભાર સંભાળશે.
ગુજરાત યુનિવર્સિટીના કુલપતિ તરીકે કાર્યરત રહેલા નિરજા ગુપ્તાનો કાર્યકાળ આજે પૂર્ણ થતાં નવા કાર્યકારી કુલપતિની નિમણૂકનો નિર્ણય લેવામાં આવ્યો છે. યુનિવર્સિટીના વહીવટી અને શૈક્ષણિક કાર્યોમાં કોઈ વિક્ષેપ ન આવે તે માટે આ વચગાળાની વ્યવસ્થા કરવામાં આવી છે.
કાયમી કુલપતિની પસંદગી પ્રક્રિયા ચાલુ
ગુજરાત યુનિવર્સિટીમાં કાયમી કુલપતિની નિમણૂક માટેની પ્રક્રિયા પહેલેથી જ શરૂ થઈ ચૂકી છે. સર્ચ કમિટીએ આ પદ માટે યોગ્ય ઉમેદવારો પાસેથી અરજીઓ મંગાવી છે. અરજીઓની ચકાસણી અને પસંદગી પ્રક્રિયા પૂર્ણ થયા બાદ રાજ્ય સરકાર અને સંબંધિત સત્તાધિકારીઓના નિયમો મુજબ કાયમી કુલપતિની નિમણૂક કરવામાં આવશે.
ત્યાં સુધી પ્રો. જગદીશ જોશી કાર્યકારી કુલપતિ તરીકે યુનિવર્સિટીના વહીવટી, શૈક્ષણિક અને નીતિગત નિર્ણયોનું સંચાલન કરશે. તેમની પાસે HRDCના વડા તરીકેનો લાંબો શૈક્ષણિક અને વહીવટી અનુભવ હોવાથી યુનિવર્સિટીના દૈનિક કાર્યોને સતત ગતિ મળે તેવી અપેક્ષા વ્યક્ત કરવામાં આવી રહી છે.
યુનિવર્સિટીના આગામી નિર્ણયો પર રહેશે નજર
ગુજરાતની સૌથી મોટી અને અગ્રણી યુનિવર્સિટીઓમાંની એક એવી ગુજરાત યુનિવર્સિટીમાં કાયમી કુલપતિની નિમણૂકને લઈને શૈક્ષણિક વર્તુળોમાં પણ રસ જોવા મળી રહ્યો છે. આગામી સમયમાં સર્ચ કમિટીની ભલામણ બાદ નવા કાયમી કુલપતિની જાહેરાત કરવામાં આવશે. ત્યાં સુધી કાર્યકારી કુલપતિ તરીકે પ્રો. જગદીશ જોશી યુનિવર્સિટીના વહીવટી કામગીરીની જવાબદારી નિભાવશે.
