ગુજરાતના પ્રવાસે આવેલા વડાપ્રધાન નરેન્દ્ર મોદીના સોમનાથ પ્રવાસનો આજે બીજો દિવસ છે. સોમનાથની પવિત્ર ધરા પર આયોજિત ઐતિહાસિક 'સોમનાથ સ્વાભિમાન પર્વ 2026'માં વડાપ્રધાનની ઉપસ્થિતિએ એક નવો ઉત્સાહ જગાડ્યો છે. પ્રથમ જ્યોતિર્લિંગના સાનિધ્યમાં આજે સવારથી જ આધ્યાત્મિકતા અને રાષ્ટ્રપ્રેમનો માહોલ જોવા મળ્યો હતો. પીએમ મોદીએ આજે પરંપરાગત શૌર્યયાત્રામાં ભાગ લઈને ભારતીય સંસ્કૃતિ અને ઈતિહાસના ગૌરવવંતા પાસાઓને ઉજાગર કર્યા હતા.
ઐતિહાસિક શૌર્યયાત્રા અને વીરોનું સન્માન
સોમનાથના ઈતિહાસમાં સોનેરી અક્ષરે લખાય તેવી 1 કિલોમીટર લાંબી ભવ્ય શૌર્યયાત્રાનું આયોજન કરવામાં આવ્યું હતું. વડાપ્રધાન નરેન્દ્ર મોદી સ્વયં આ પદયાત્રામાં જોડાયા હતા. આ યાત્રા દરમિયાન વાતાવરણ શિવમય અને દેશભક્તિના નારાઓથી ગુંજી ઉઠ્યું હતું. શૌર્યયાત્રા પૂર્ણ થયા બાદ વડાપ્રધાને સોમનાથ મંદિરની રક્ષા કાજે પોતાના પ્રાણોની આહુતિ આપનારા વીર સપૂતોની પ્રતિમાઓ પર પુષ્પાંજલિ અર્પણ કરી હતી. આ પ્રસંગે તેમણે દેશના સાંસ્કૃતિક વારસાને સુરક્ષિત રાખનારા બલિદાનીઓને યાદ કરીને ભાવવંદના કરી હતી.
મહાદેવના ચરણે પૂજા અર્ચના
વીર શહીદોને નમન કર્યા બાદ પીએમ મોદી સોમનાથ મંદિરના મુખ્ય ગર્ભગૃહમાં પહોંચ્યા હતા. ત્યાં તેમણે શાસ્ત્રોક્ત વિધિ મુજબ ભોળાનાથની વિશેષ પૂજા અને અભિષેક કર્યો હતો. દેશની સમૃદ્ધિ અને જનકલ્યાણની કામના સાથે વડાપ્રધાને સોમનાથ મહાદેવના ચરણે શીશ ઝુકાવ્યું હતું. ઉલ્લેખનીય છે કે ગઈકાલે પ્રથમ દિવસે વડાપ્રધાને સોમનાથ ટ્રસ્ટની બેઠકમાં મહત્વના નિર્ણયો લીધા હતા અને ત્યારબાદ આધુનિક Drone Show નિહાળ્યો હતો જે પ્રવાસીઓ માટે આકર્ષણનું કેન્દ્ર બન્યો હતો.
વિકાસ અને આસ્થાનો સુમેળ
વડાપ્રધાનના આ પ્રવાસથી સોમનાથમાં પ્રવાસન અને ધાર્મિક મહત્વમાં મોટો ઉછાળો જોવા મળી રહ્યો છે. 'સોમનાથ સ્વાભિમાન પર્વ 2026' અંતર્ગત યોજાઈ રહેલા વિવિધ કાર્યક્રમો દ્વારા વિશ્વભરમાં સોમનાથની અસ્મિતાનો સંદેશ પહોંચાડવામાં આવી રહ્યો છે. પીએમ મોદીના હસ્તે થઈ રહેલી આ પૂજા અને જાહેર કાર્યક્રમોમાં મોટી સંખ્યામાં શ્રદ્ધાળુઓ અને મહાનુભાવો ઉપસ્થિત રહ્યા હતા. આગામી સમયમાં સોમનાથ મંદિરના ડેવલપમેન્ટ માટે પણ અનેક પ્રોજેક્ટ્સ પર ગતિશીલ રીતે કાર્ય કરવામાં આવશે તેવી આશા વ્યક્ત કરવામાં આવી છે.
