વડાપ્રધાન નરેન્દ્ર મોદીએ આજે સોમનાથની પવિત્ર ધરતી પરથી ભારતના ઇતિહાસલેખન અને જૂની માનસિકતા પર આકરા પ્રહારો કર્યા હતા. 'સોમનાથ સ્વાભિમાન પર્વ 2026'માં સંબોધન કરતા પીએમ મોદીએ જણાવ્યું કે આઝાદી પછી પણ દુર્ભાગ્યવશ ગુલામીની માનસિકતા ધરાવતા લોકોએ આપણા ગૌરવશાળી ભૂતકાળને મિટાવવાનો પૂરેપૂરો પ્રયાસ કર્યો હતો. તેમણે ઇતિહાસના પાનાઓમાંથી સત્યને ભૂંસી નાખવા માટે તમામ હથકંડા અપનાવ્યા હતા.
ઇતિહાસકારો અને રાજકારણીઓ પર પ્રહાર
પીએમ મોદીએ ગંભીર આરોપ લગાવતા કહ્યું કે જેમણે સોમનાથ મંદિરના પુનઃનિર્માણ અને તેની રક્ષા માટે સંઘર્ષ કર્યો, તેમને ક્યારેય યોગ્ય સન્માન કે ઓળખ આપવામાં આવી નથી. ઉલટું, કેટલાક ઇતિહાસકારો અને રાજકારણીઓએ આક્રમણખોરોના કાળા ઇતિહાસને છુપાવવા અથવા તેને 'વ્હાઈટવોશ' કરવાનું કામ કર્યું છે. પીએમ મોદીએ સ્પષ્ટ કર્યું કે સોમનાથ પર થયેલા ધાર્મિક આક્રમણોને માત્ર એક સામાન્ય 'લૂંટ' તરીકે રજૂ કરીને સત્યને દબાવવાનો પ્રયાસ થયો હતો.
પાઠ્યપુસ્તકોના જૂઠાણાનો પર્દાફાશ
વડાપ્રધાને વધુમાં ઉમેર્યું કે આપણને પાઠ્યપુસ્તકોમાં એવું ભણાવવામાં આવ્યું છે કે સોમનાથ મંદિર પર આક્રમણ માત્ર તેની સંપત્તિ અને ખજાનાની લૂંટ કરવા માટે થયું હતું. પરંતુ વાસ્તવિકતા એ છે કે તે અત્યાચાર, નફરત અને આતંકનો ક્રૂર ઇતિહાસ હતો, જે વર્ષો સુધી આપણાથી છુપાવવામાં આવ્યો હતો. ભારતની સભ્યતાને નષ્ટ કરવાના આક્રમણખોરોના ઈરાદાઓને લૂંટનું મઠારું મારીને હળવા બતાવવામાં આવ્યા હતા.
ગૌરવશાળી વારસાનું પુનઃસ્થાપન
પીએમ મોદીએ જણાવ્યું કે હવે સમય બદલાયો છે અને ભારત પોતાની સંસ્કૃતિ તેમજ ગૌરવના પુનઃસ્થાપન માટે મક્કમ છે. સોમનાથનો ઇતિહાસ એ માત્ર એક મંદિરનો ઇતિહાસ નથી, પરંતુ તે ભારતીય અસ્મિતાના વિજયની ગાથા છે. તેમણે દેશના યુવાનોને આહ્વાન કર્યું કે તેઓ સાચા ઇતિહાસને જાણે અને ગુલામીની માનસિકતાને ફગાવીને વિકસિત ભારતના નિર્માણમાં જોડાય. આ સંબોધન દરમિયાન વડાપ્રધાનના ચહેરા પર ભારતના વારસા પ્રત્યેનું ગૌરવ સ્પષ્ટપણે દેખાઈ આવતું હતું.
