પ્રધાનમંત્રી નરેન્દ્ર મોદીએ ગુજરાતના અમદાવાદ જિલ્લાના સાનંદ ખાતે તાજેતરમાં શરૂ થયેલી CG Semi Outsourced Semiconductor Assembly and Test (OSAT) સુવિધાના ઉદ્ઘાટન દરમિયાન થયેલી એક ખાસ મુલાકાતને યાદ કરતાં સોશિયલ મીડિયા પ્લેટફોર્મ 'X' પર ભાવનાત્મક સંદેશ શેર કર્યો છે. પોતાના ટ્વિટમાં તેમણે પ્લાન્ટમાં કાર્યરત યુવાનો, ખાસ કરીને મહિલાઓ અને આદિવાસી વિસ્તારોમાંથી આવેલા કર્મચારીઓની પ્રશંસા કરતાં તેમને ભારતની સાચી શક્તિ ગણાવ્યા છે.
પ્રધાનમંત્રી મોદીએ જણાવ્યું કે સાનંદમાં સેમિકન્ડક્ટર એસેમ્બલી અને ટેસ્ટિંગ પ્લાન્ટના ઉદ્ઘાટન દરમિયાનનો સૌથી યાદગાર અનુભવ ત્યાં કામ કરતા યુવાનો સાથેની મુલાકાત રહ્યો હતો. તેમણે લખ્યું કે આ પ્લાન્ટમાં મોટી સંખ્યામાં મહિલાઓ કાર્યરત છે અને તેમાંની ઘણી યુવતીઓ દેશના દૂરદરાજના તેમજ આદિવાસી વિસ્તારોમાંથી આવી છે. તેમ છતાં તેમણે પડકારોને અવસર બનાવી સેમિકન્ડક્ટર ટેક્નોલોજીનું પ્રશિક્ષણ મેળવ્યું અને આજે તેઓ ભારતના ટેક્નોલોજી ક્ષેત્રને નવી દિશા આપી રહ્યા છે.
'યુવાશક્તિ પર ગર્વ છે'
પ્રધાનમંત્રી મોદીએ પોતાના સંદેશમાં લખ્યું કે, "આ યુવાનોની અદભૂત જિજ્ઞાસા, મહેનત અને શીખવાની તૈયારી ભારતની સૌથી મોટી તાકાત છે. તેઓ સેમિકન્ડક્ટર ક્ષેત્રમાં ભારતની યાત્રાને વધુ મજબૂત બનાવી રહ્યા છે. મને આપણા યુવાશક્તિ પર ગર્વ છે." તેમણે ખાસ કરીને મહિલાઓની ભૂમિકાની પ્રશંસા કરી હતી. પ્રધાનમંત્રીના જણાવ્યા મુજબ, જે યુવતીઓ એક સમયે દેશના અંતરિયાળ અને આદિવાસી વિસ્તારોમાં રહેતી હતી, આજે તેઓ અત્યાધુનિક ટેક્નોલોજી આધારિત ઉદ્યોગમાં આત્મવિશ્વાસ સાથે કામગીરી કરી રહી છે. આ પરિવર્તન માત્ર રોજગાર પૂરતું મર્યાદિત નથી, પરંતુ ભારતના સામાજિક અને આર્થિક વિકાસનું પણ પ્રતિક છે.
સેમિકન્ડક્ટર ક્ષેત્રમાં આત્મનિર્ભર ભારત તરફ મોટું પગલું
સાનંદમાં શરૂ થયેલી CG Semi OSAT સુવિધાને ભારતના સેમિકન્ડક્ટર ઇકોસિસ્ટમ માટે મહત્વપૂર્ણ ગણવામાં આવી રહી છે. સેમિકન્ડક્ટર ચિપ્સ આજના સમયમાં મોબાઇલ ફોન, કમ્પ્યુટર, ઇલેક્ટ્રિક વાહનો, મેડિકલ સાધનો, ટેલિકોમ અને સંરક્ષણ સહિત અનેક ક્ષેત્રોમાં અનિવાર્ય બની ગઈ છે. વૈશ્વિક સપ્લાય ચેઇનમાં ભારતની ભાગીદારી વધારવા અને દેશમાં જ ચિપ ઉત્પાદનનું મજબૂત માળખું ઊભું કરવા માટે કેન્દ્ર સરકાર છેલ્લા કેટલાક વર્ષોથી સેમિકન્ડક્ટર મિશન પર વિશેષ ભાર મૂકી રહી છે. OSAT સુવિધા મુખ્યત્વે સેમિકન્ડક્ટર ચિપ્સના એસેમ્બલી, ટેસ્ટિંગ અને પેકેજિંગનું કાર્ય કરે છે. આ પ્રકારની સુવિધાઓ દેશના ઇલેક્ટ્રોનિક્સ ઉત્પાદન ક્ષેત્રને નવી ગતિ આપવાની સાથે હજારો યુવાનો માટે રોજગારીની નવી તકો પણ ઊભી કરે છે.
આ પણ વાંચો: ગુજરાતના પૂર્વ વનમંત્રી મોહનસિંહ રાઠવાનું 82 વર્ષની વયે નિધન : 10 વખત ધારાસભ્ય બનવાનો બનાવ્યો હતો રેકોર્ડ
મહિલાઓ અને આદિવાસી યુવાનોને મળ્યું નવું પ્લેટફોર્મ
પ્રધાનમંત્રી મોદીના ટ્વિટમાં સૌથી વધુ ભાર મહિલાઓ અને આદિવાસી પૃષ્ઠભૂમિ ધરાવતા યુવાનો પર મૂકવામાં આવ્યો છે. તેમણે જણાવ્યું કે આ કર્મચારીઓએ સેમિકન્ડક્ટર જેવી અત્યંત ટેક્નિકલ અને આધુનિક ટેક્નોલોજી માટે વિશેષ તાલીમ મેળવી છે અને આજે તેઓ દેશના મહત્વના ઉદ્યોગમાં સફળતાપૂર્વક યોગદાન આપી રહ્યા છે. આ પ્રકારની પહેલથી માત્ર રોજગારી જ નહીં, પરંતુ કૌશલ્ય વિકાસ, મહિલા સશક્તિકરણ અને આર્થિક સ્વાવલંબનને પણ પ્રોત્સાહન મળી રહ્યું છે. સરકારના 'સ્કિલ ઇન્ડિયા' અને 'મેક ઇન ઇન્ડિયા' જેવા અભિયાનોને પણ આવી યોજનાઓથી વધુ વેગ મળવાની અપેક્ષા છે.
આ પણ વાંચો: વડોદરાના ડભોઇમાં કાળ બનીને ત્રાટક્યો મગર! : ઓરસંગ નદી કિનારે માછીમારી કરી રહેલા વૃદ્ધને ફાડી ખાતા કરુણ મોત
ગુજરાત બન્યું સેમિકન્ડક્ટર હબ
છેલ્લા કેટલાક વર્ષોમાં ગુજરાત સેમિકન્ડક્ટર અને ઇલેક્ટ્રોનિક્સ મેન્યુફેક્ચરિંગ ક્ષેત્રમાં દેશનું અગ્રણી કેન્દ્ર બની રહ્યું છે. સાનંદ સહિત ધોલેરા જેવા વિસ્તારોમાં મોટા રોકાણો થઈ રહ્યા છે. રાજ્યમાં આધુનિક ઔદ્યોગિક માળખું, શ્રેષ્ઠ કનેક્ટિવિટી અને સરકારની ઉદ્યોગમૈત્રી નીતિઓને કારણે દેશ-વિદેશની અનેક કંપનીઓ ગુજરાતમાં રોકાણ કરી રહી છે. પ્રધાનમંત્રી મોદીનું આ ટ્વિટ માત્ર એક મુલાકાતનો ઉલ્લેખ નથી, પરંતુ ભારતના યુવાનો, મહિલાઓ અને આદિવાસી સમાજની પ્રતિભા, પરિશ્રમ અને આત્મવિશ્વાસને મળેલી જાહેર માન્યતા તરીકે પણ જોવામાં આવી રહ્યું છે. ટેક્નોલોજીના યુગમાં દેશની નવી ઓળખ ઘડવામાં યુવાશક્તિની ભૂમિકાને તેમણે ફરી એકવાર ઉજાગર કરી છે.
