કોંગ્રેસે પોતાની નિષ્ફળતાનું કલંક હિંદુઓ પર લગાવ્યું: NDA બેઠકમાં પીએમ મોદીનો પ્રહાર
વડાપ્રધાન નરેન્દ્ર મોદી ભારતના ઇતિહાસમાં સૌથી લાંબા સમય સુધી સતત સેવા આપનારા ચૂંટાયેલા વડાપ્રધાન બની ગયા છે. તેમણે દેશના પ્રથમ પીએમ જવાહરલાલ નેહરુના સતત શાસનના રેકોર્ડને પાછળ છોડી દીધો છે. વડાપ્રધાન તરીકે ઓફિસમાં સતત 4399 દિવસ પૂરા કરવાના ઐતિહાસિક અવસરે નવી દિલ્હીના ભારત મંડપમ ખાતે નેશનલ ડેમોક્રેટિક એલાયન્સ (NDA) ના નેતાઓની એક ખાસ બેઠક યોજાઈ હતી, જેમાં પીએમ મોદીનું ભવ્ય સન્માન કરવામાં આવ્યું હતું.
આ બેઠક દરમિયાન પશ્ચિમ બંગાળના ભાજપના નેતા શુભેન્દુ અધિકારી અને અન્ય સાથી પક્ષોના નેતાઓએ પીએમ મોદીનું સ્વાગત કર્યું હતું અને તેમણે નેતાઓ સાથે હળવી પળોમાં કોલકાતાની પ્રખ્યાત ‘ઝાલમુરી’ની મજા પણ માણી હતી.
‘હિંદુ ગ્રોથ રેટ’ શબ્દ સામે પીએમ મોદીનો આક્રોશ
એનડીએ ગઠબંધનના નેતાઓને સંબોધિત કરતા પીએમ મોદીએ કોંગ્રેસ પર આકરા પ્રહારો કર્યા હતા. તેમણે ભૂતકાળમાં ભારતના ધીમા આર્થિક વિકાસ દર માટે વપરાતા ‘હિંદુ ગ્રોથ રેટ’ (Hindu Growth Rate) શબ્દનો ઉલ્લેખ કરીને કોંગ્રેસને ઘેરી હતી.
પીએમ મોદીએ જણાવ્યું કે, “છેલ્લા 12 વર્ષમાં દેશે કોંગ્રેસના એ દુષ્ટ ચક્રમાંથી મુક્તિ મેળવી છે. જે ધીમા વિકાસને ખૂબ જ ચતુરાઈથી ‘હિંદુ ગ્રોથ રેટ’ નામ આપવામાં આવ્યું હતું, તે વાસ્તવમાં કોંગ્રેસની નબળી નીતિઓનું પરિણામ હતું. કામ કરવાની પદ્ધતિ કોંગ્રેસની હતી, જવાબદારી અને નિષ્ફળતા પણ કોંગ્રેસની જ હતી, પરંતુ તેનું કલંક દેશની વિશાળ હિંદુ વસ્તી પર લગાવી દેવામાં આવ્યું. આ ખરાબ સંસ્કૃતિનું સાચું નામ ‘કોંગ્રેસ ગ્રોથ રેટ’ હોવું જોઈતું હતું, કારણ કે તે શાસન, નીતિ અને નિર્ણયોના સંપૂર્ણ અભાવથી ઘેરાયેલું હતું.”
દેશ હિત હંમેશા પક્ષથી ઉપર: પીએમ મોદી
પોતાના શાસનના 12 વર્ષના કાર્યકાળની સિદ્ધિઓ ગણાવતા વડાપ્રધાને ઉમેર્યું કે, 2014 પછી દેશની કાયાપલટ થઈ છે અને જનતાએ સ્થિર સરકારની શક્તિ જોઈ છે. તેમણે કહ્યું કે, “અમારા માટે હંમેશા પક્ષ કરતાં દેશ મોટો રહ્યો છે અને અમે ‘નેશન ફર્સ્ટ’ (દેશ પ્રથમ) ના મંત્ર સાથે કામ કરીએ છીએ. અગાઉની સરકારો જે નિર્ણયો લેતા ડરતી હતી, જેમ કે આર્ટિકલ 370 હટાવવો, તે અમે કરી બતાવ્યું છે.”
તેમણે ભારતને આત્મનિર્ભર બનાવવાની નેમ દોહરાવતા કહ્યું કે, સેમિકન્ડક્ટરથી લઈને ડિફેન્સ સેક્ટર સુધી ભારત ઝડપથી આગળ વધી રહ્યું છે. હવે એ દિવસ દૂર નથી જ્યારે ભારતમાં બનેલા ‘મેડ ઇન ઇન્ડિયા’ વિમાનો પણ આકાશમાં ઉડતા જોવા મળશે.
વિકાસની સરખામણી: આંકડાની નજરે
પીએમ મોદીએ તેમના શાસનકાળ દરમિયાન દેશમાં થયેલા માળખાકીય ફેરફારોને આંકડા દ્વારા રજૂ કર્યા હતા:
એરપોર્ટ: વર્ષ 2014માં દેશમાં માત્ર 74 એરપોર્ટ હતા, જે વર્ષ 2026 સુધીમાં વધીને 160થી વધુ થઈ ગયા છે.
એક્સપ્રેસવે: 2014માં દેશમાં 1000 કિલોમીટરના એક્સપ્રેસવે હતા, જે 2026 સુધીમાં વધીને 6700 કિલોમીટર થઈ ચૂક્યા છે.
મેટ્રો સેવા: અગાઉ માત્ર 5 શહેરોમાં મેટ્રો હતી, જે આજે 20થી વધુ શહેરોમાં પહોંચી ગઈ છે.
સંરક્ષણ નિકાસ (Defense Exports): વર્ષ 2014માં ભારત માત્ર 700 કરોડ રૂપિયાની ડિફેન્સ નિકાસ કરતું હતું, જે 2026માં રેકોર્ડબ્રેક 23000 કરોડ રૂપિયા પર પહોંચી ગઈ છે.
બેઠકના અંતે આંધ્રપ્રદેશના મુખ્યમંત્રી એન. ચંદ્રાબાબુ નાયડુ દ્વારા પીએમ મોદીના નેતૃત્વને બિરદાવતો આભાર પ્રસ્તાવ રજૂ કરવામાં આવ્યો હતો, જેને તમામ 35 સાથી પક્ષોના નેતાઓએ સર્વાનુમતે પસાર કર્યો હતો.
