World Leader PM Modi: વડાપ્રધાન નરેન્દ્ર મોદીની લોકપ્રિયતામાં સતત વધારો થઈ રહ્યો છે અને તેમના નામે વધુ એક ઐતિહાસિક સિદ્ધિ નોંધાઈ છે. પીએમ મોદીએ વીડિયો શેરિંગ પ્લેટફોર્મ YouTube પર 30 મિલિયન (3 કરોડ) સબ્સ્ક્રાઇબર્સનો નોંધપાત્ર માઈલસ્ટોન પાર કર્યો છે. આ સિદ્ધિને કારણે આ પ્લેટફોર્મ પર સૌથી વધુ ફોલોઅર્સ ધરાવતા વિશ્વ નેતા તરીકે તેમનું સ્થાન હવે પહેલા કરતા પણ વધુ મજબૂત બન્યું છે. દુનિયાભરના લોકપ્રિય નેતાઓમાં તેઓ હાલ ટોચનું સ્થાન ધરાવે છે અને ડિજિટલ માધ્યમથી જનતા સાથેના જોડાણમાં તેઓ અન્ય વૈશ્વિક નેતાઓ કરતા ઘણા આગળ છે.
વૈશ્વિક મંચ પર પીએમ મોદીનું એકહથ્થુ શાસન
વૈશ્વિક સ્તરે રેન્કિંગની સરખામણી કરવામાં આવે તો પીએમ મોદી YouTube પર સૌથી વધુ સબ્સ્ક્રાઇબર ધરાવતા નેતા છે. આ શ્રેણીમાં બીજા ક્રમે બ્રાઝિલના ભૂતપૂર્વ રાષ્ટ્રપતિ જેયર બોલ્સોનારો છે, પરંતુ તેમનો સબ્સ્ક્રાઇબર બેઝ પીએમ મોદીના આંકડા કરતા લગભગ ચોથા ભાગ જેટલો જ છે. એટલું જ નહીં, પીએમ મોદી પાસે અમેરિકાના રાષ્ટ્રપતિ ડોનાલ્ડ ટ્રમ્પની સરખામણીમાં સાત ગણાથી વધુ સબ્સ્ક્રાઇબર્સ છે. આ આંકડા વિશ્વભરમાં મોદીની ડિજિટલ પહોંચ અને લોકો સાથેના સીધા સંવાદના સ્કેલને સ્પષ્ટપણે રેખાંકિત કરે છે.
ભારતીય રાજનીતિમાં પણ સબ્સ્ક્રાઇબર મોરચે મોખરે
ભારતીય રાજનીતિના સંદર્ભમાં પણ પીએમ મોદીનું પ્રભુત્વ અને લોકપ્રિયતા સ્પષ્ટપણે દેખાઈ આવે છે. સબ્સ્ક્રાઇબર મોરચે જોતા પીએમ મોદી પાસે કોંગ્રેસ નેતા રાહુલ ગાંધી કરતાં લગભગ ત્રણ ગણા વધુ સબ્સ્ક્રાઇબર્સ છે. આ ઉપરાંત, આમ આદમી પાર્ટી (AAP) અને ભારતીય રાષ્ટ્રીય કોંગ્રેસ (INC) ની સત્તાવાર ચેનલો કરતા પણ પીએમ મોદીની વ્યક્તિગત ચેનલ પાસે ચાર ગણા વધુ સબ્સ્ક્રાઇબર્સ છે. 30 મિલિયનથી વધુ સબ્સ્ક્રાઇબર્સ સાથે તેમની ચેનલ હવે વૈશ્વિક સ્તરે રાજકીય ક્ષેત્રે સૌથી મોટી ચેનલ બની ગઈ છે.
ઈન્સ્ટાગ્રામ પર પણ 100 મિલિયનનો જાદુઈ આંકડો
યુટ્યુબ સિવાય અન્ય સોશિયલ મીડિયા પ્લેટફોર્મ પર પણ વડાપ્રધાનનો દબદબો જોવા મળે છે. તાજેતરમાં જ તેમના ઈન્સ્ટાગ્રામ ફોલોઅર્સનો આંકડો 100 મિલિયનને આંબી ગયો છે. ઈન્સ્ટાગ્રામ પર પીએમ મોદી પછી ડોનાલ્ડ ટ્રમ્પ 43.2 મિલિયન ફોલોઅર્સ સાથે બીજા ક્રમે છે, જ્યારે ઇન્ડોનેશિયાના રાષ્ટ્રપતિ પ્રબોવો સુબિયાન્ટો 15 મિલિયન અને બ્રાઝિલના રાષ્ટ્રપતિ 14.4 મિલિયન ફોલોઅર્સ સાથે અનુક્રમે ત્રીજા અને ચોથા સ્થાને છે. તુર્કીના રાષ્ટ્રપતિ તૈયપ એર્દોગન અને આર્જેન્ટિનાના રાષ્ટ્રપતિ જાવિઅર મેઇલી પણ આ યાદીમાં સામેલ છે, પરંતુ પીએમ મોદીના આંકડાઓ સામે તેઓ હજુ ઘણા પાછળ છે.
