ઉનાળાની ગરમીમાં તમે પણ ધ્યાન આપ્યું હશે કે તમારો સ્માર્ટફોન અચાનક ધીમો થઈ જાય છે, લેગ કરે છે અથવા ગરમ થઈ જાય છે. ઘણા યુઝર્સ માને છે કે ફોનમાં કોઈ ખામી આવી ગઈ છે, પરંતુ હકીકતમાં આ એક સામાન્ય ટેક્નિકલ પ્રોસેસ છે. જો તમે આ પાછળનું સાચું કારણ સમજી લો, તો તમે તમારા ફોનને નુકસાનથી પણ બચાવી શકો છો.
ગરમ થતા ફોન કેમ ધીમો થઈ જાય છે?
ઉનાળાના સમયમાં અથવા ભારે ઉપયોગ દરમિયાન સ્માર્ટફોન ગરમ થવું સામાન્ય બાબત છે. જ્યારે ફોનનો તાપમાન વધે છે, ત્યારે તેની કામગીરી આપમેળે ધીમી થઈ જાય છે. આ પ્રક્રિયાને “થર્મલ થ્રોટલિંગ” કહેવામાં આવે છે. થર્મલ થ્રોટલિંગ એક સેફ્ટી ફીચર છે, જે ફોનને ઓવરહિટિંગથી બચાવવા માટે બનાવવામાં આવ્યું છે. જ્યારે ડિવાઇસનો તાપમાન જોખમી સ્તરે પહોંચે છે, ત્યારે પ્રોસેસર પોતાની સ્પીડ ઘટાડે છે જેથી ઓછું ગરમ થાય. આ કારણે ગેમિંગ દરમિયાન લેગ, વિડિયો રેકોર્ડિંગમાં ફ્રેમ ડ્રોપ અથવા સ્ક્રીનની બ્રાઇટનેસ ઓછું થવા જેવી સમસ્યાઓ જોવા મળે છે.
ઘણા યુઝર્સ આને ફોનની ખામી માને છે, પરંતુ હકીકતમાં આ ડિવાઇસને બચાવવાનો મિકેનિઝમ છે.
ક્યારે વધુ ગરમ થાય છે ફોન?
ફોન ખાસ કરીને ત્યારે વધારે ગરમ થાય છે જ્યારે તેની CPU અને બેટરી પર વધુ દબાણ પડે છે. નીચેની પરિસ્થિતિઓમાં ઓવરહિટિંગ વધુ જોવા મળે છે:
લાંબા સમય સુધી ગેમ રમવી
4K વિડિયો રેકોર્ડિંગ
નેવિગેશન એપ્સનો સતત ઉપયોગ
ફોન વાપરતા વાપરતા ચાર્જ કરવો
ભારે મલ્ટીટાસ્કિંગ
આ ઉપરાંત, સીધી ધૂપમાં ફોન વાપરવો અથવા ગરમ વાતાવરણમાં રાખવો પણ તાપમાન વધારવાનું મુખ્ય કારણ છે. વધુમાં, જાડા ફોન કવર પણ હીટ ડિસિપેશન (ગરમી બહાર જવા)ને અટકાવે છે, જેના કારણે ફોન વધુ ગરમ થઈ શકે છે.
હાર્ડવેર ખરાબ થતું નથી, પરંતુ…
ફોન ગરમ થાય એટલે તરત જ તેનો હાર્ડવેર ખરાબ થઈ જાય એવું નથી. આધુનિક સ્માર્ટફોનમાં ડાયનામિક વોલ્ટેજ એડજસ્ટમેન્ટ જેવી ટેક્નોલોજી હોય છે, જે વીજળીનો ઉપયોગ ઘટાડીને ગરમીને નિયંત્રિત કરે છે.
જ્યારે તાપમાન વધે છે, ત્યારે ફોન નીચે મુજબના પગલાં લે છે:
CPU અને GPUની સ્પીડ ઘટાડે છે
સ્ક્રીનની બ્રાઇટનેસ ઓછી કરે છે
બેકગ્રાઉન્ડ એપ્સ બંધ કરે છે
ચાર્જિંગ સ્પીડ ધીમી કરે છે
કેમેરાની કેટલીક સુવિધાઓ તાત્કાલિક બંધ કરે છે
આ બધું ફોનને સુરક્ષિત રાખવા માટે થાય છે જેથી તે અચાનક બંધ ન થઈ જાય અને કામ ચાલુ રાખી શકે.
થર્મલ થ્રોટલિંગ ક્યારે થાય છે?
થર્મલ થ્રોટલિંગ ત્યારે શરૂ થાય છે જ્યારે ફોનના અંદરના ટેમ્પરેચર સેન્સર ઓળખે છે કે તાપમાન ખતરનાક સ્તરે પહોંચી રહ્યું છે. આ સમયે CPUની ફ્રીક્વન્સી અને GPUની કામગીરી ઘટાડવામાં આવે છે.
તેના પરિણામે:
ગેમ્સ અટકવા લાગે છે
એપ્સ ધીમા ખૂલવા લાગે છે
એનિમેશન સ્મૂથ નથી રહેતા
આ પ્રોસેસ જરૂરી છે કારણ કે તે ફોનને લાંબા ગાળાના નુકસાનથી બચાવે છે.
ઓવરહીટિંગથી કેવી રીતે બચી શકાય?
ફોનની ગરમીને નિયંત્રિત કરવા માટે થોડા સરળ પરંતુ અસરકારક ઉપાયો અપનાવી શકાય છે:
લાંબા સમય સુધી હેવી ગેમિંગ ટાળો
ફોન ચાર્જ થાય ત્યારે તેનો ઉપયોગ ઓછો કરો
સીધી ધૂપમાં ફોન ન વાપરો
જરૂર પડે ત્યારે કવર કાઢી દો
બેકગ્રાઉન્ડમાં ચાલતી અનાવશ્યક એપ્સ બંધ કરો
આ નાનાં ફેરફારો ફોનની કામગીરીને સ્થિર રાખવામાં મદદરૂપ થાય છે.
વધુ ગરમીથી શું નુકસાન થઈ શકે?
જ્યારે ફોન વારંવાર અથવા લાંબા સમય સુધી વધારે ગરમ થાય છે, ત્યારે તે તેના પર ગંભીર અસર કરી શકે છે:
બેટરીની લાઇફ ઘટે છે
ઇન્ટર્નલ પાર્ટ્સ પર અસર પડે છે
પરફોર્મન્સ ધીમે ધીમે ઘટે છે
ખાસ કરીને પાતળા ડિઝાઇનવાળા સ્માર્ટફોનમાં કૂલિંગ માટે જગ્યા ઓછી હોય છે, તેથી તેઓ વધુ ઝડપથી ગરમ થાય છે.
