Parliament Uproar Mallikarjun Kharge Poem: સંસદના ચોમાસુ સત્ર દરમિયાન NEET પેપર લીક મુદ્દે રાજકીય ટકરાવ વધુ ઉગ્ર બનતો જઈ રહ્યો છે. કેન્દ્રીય શિક્ષણમંત્રી ધર્મેન્દ્ર પ્રધાનના રાજીનામાની માંગને લઈને વિપક્ષ સતત સરકાર પર દબાણ વધારી રહ્યો છે. ગુરુવારે સત્રના ચોથા દિવસે પણ લોકસભા અને રાજ્યસભામાં ભારે હોબાળો સર્જાતા બંને ગૃહોની કાર્યવાહી અનેક વખત સ્થગિત કરવી પડી અને અંતે દિવસભર માટે મુલતવી રાખવામાં આવી. રાજ્યસભામાં ત્યારે વધુ ગરમાવો જોવા મળ્યો જ્યારે વિપક્ષના નેતા મલ્લિકાર્જુન ખડગેએ વિરોધ નોંધાવવા માટે કવિતાનો સહારો લીધો. તેમની કવિતાની વચ્ચે જ કેન્દ્રીય સંસદીય કાર્યમંત્રી કિરણ રિજિજૂએ વાંધો ઉઠાવતા બંને નેતાઓ વચ્ચે તીખી વાકયુદ્ધ જેવી સ્થિતિ સર્જાઈ. આ ઘટનાએ સંસદમાં ચાલી રહેલા રાજકીય ઘર્ષણને વધુ ચર્ચાનો વિષય બનાવી દીધો.
રાજ્યસભામાં ખડગેએ કવિતા વાંચીને વ્યક્ત કર્યો વિરોધ
બપોરે લગભગ ત્રણ વાગ્યે રાજ્યસભાની કાર્યવાહી ચોથી વખત શરૂ થઈ ત્યારે ઉપસભાપતિ હરિવંશે વિપક્ષના નેતા મલ્લિકાર્જુન ખડગેને બોલવાની મંજૂરી આપી. ખડગે પોતાના હાથમાં લખેલું પાનું લઈને ઊભા થયા અને કવિતાના શબ્દો દ્વારા સરકારની ટીકા શરૂ કરી. કવિતામાં તેમણે કહ્યું કે, સત્યને જીવંત રાખવા માટે દરેક પડકારનો સામનો કરવામાં આવશે અને દેશમાંથી અન્યાય દૂર કરવા માટે અંત સુધી લડત ચાલુ રહેશે. તેમની કવિતાના શબ્દો દરમિયાન વિપક્ષના સભ્યો પણ સરકાર વિરુદ્ધ સૂત્રોચ્ચાર કરતા જોવા મળ્યા.
કિરણ રિજિજૂએ વ્યક્ત કર્યો વાંધો
ખડગે પોતાની વાત આગળ વધારી રહ્યા હતા ત્યારે ઉપસભાપતિએ કેન્દ્રીય મંત્રી કિરણ રિજિજૂને બોલવાની તક આપી. રિજિજૂએ વાંધો ઉઠાવતા કહ્યું કે ચર્ચા માટે ઔપચારિક પ્રક્રિયા ચાલી રહી છે, ત્યારે વિરોધ નોંધાવવાની આ રીત યોગ્ય નથી. તેમણે જણાવ્યું કે, જો દરેક સભ્ય લખેલા નિવેદનો અથવા કવિતાઓ દ્વારા વિરોધ કરશે તો ગૃહની કાર્યવાહી સુચારૂ રીતે ચલાવી શકાશે નહીં. તેમના મતે, નિર્ધારિત પ્રક્રિયા મુજબ જ ચર્ચા આગળ વધવી જોઈએ.
ઉપસભાપતિએ કાર્યવાહી ફરી સ્થગિત કરી
પરિસ્થિતિ વધુ ઉગ્ર બનતાં ઉપસભાપતિ હરિવંશે જણાવ્યું કે તેમણે ગૃહનું કામકાજ આગળ વધે તે હેતુથી જ ચર્ચા માટે તક આપી હતી. પરંતુ સતત હોબાળો અને નારેબાજી વચ્ચે કાર્યવાહી ચલાવવી શક્ય ન હોવાથી રાજ્યસભાની બેઠક બીજા દિવસ સુધી માટે સ્થગિત કરવાની જાહેરાત કરવામાં આવી. આ દરમિયાન વિપક્ષી સભ્યો સતત ધર્મેન્દ્ર પ્રધાનના રાજીનામાની માંગ સાથે સૂત્રોચ્ચાર કરતા રહ્યા.
લોકસભામાં પણ કામકાજ ન ચાલી શક્યું
બીજી તરફ લોકસભામાં પણ સત્ર શરૂ થતાં જ હોબાળો શરૂ થઈ ગયો હતો. લોકસભાના અધ્યક્ષ ઓમ બિરલાએ સ્પષ્ટ જણાવ્યું કે પ્રશ્નકાળ દરમિયાન માત્ર પ્રશ્નકાળ જ ચલાવવામાં આવશે અને સભ્યોએ ગૃહની કાર્યવાહી સુચારૂ રીતે ચાલવા દેવી જોઈએ. પરંતુ વિપક્ષના સભ્યો પોતાની બેઠકો છોડીને વેલમાં આવી ગયા અને સતત સૂત્રોચ્ચાર કરતા રહ્યા. હોબાળો અટક્યો નહીં એટલે પ્રથમ કાર્યવાહી બપોરે 12 વાગ્યા સુધી સ્થગિત કરવામાં આવી.
આ પણ વાંચો: 'PM આવાસ બહારનો વિરોધ પૂરતો ગંભીર નહોતો' : સોનમ વાંગચુકની પત્ની ગીતાંજલિ આંગ્મોનો કોંગ્રેસ પર પ્રહાર
વારંવાર સ્થગિત કરવી પડી કાર્યવાહી
બપોરે કાર્યવાહી ફરી શરૂ થતાં પણ સ્થિતિમાં કોઈ ફેરફાર જોવા મળ્યો નહીં. હોબાળા વચ્ચે ગૃહમાં નિર્ધારિત કેટલાક સરકારી કામકાજ પૂર્ણ કરવામાં આવ્યા, પરંતુ ચર્ચા શક્ય બની નહોતી. ત્યારબાદ કાર્યવાહી ફરી બપોરે બે વાગ્યા સુધી મુલતવી રાખવામાં આવી. બે વાગ્યે ડેપ્યુટી સ્પીકર પેનલના સભ્ય દિલીપ સૈકિયાએ નિયમ 377 હેઠળ ચર્ચા શરૂ કરવાનો પ્રયાસ કર્યો, પરંતુ વિપક્ષના સભ્યો સતત વેલમાં રહીને નારેબાજી કરતા હોવાથી ચર્ચા આગળ વધી શકી નહોતી.
ધર્મેન્દ્ર પ્રધાનના રાજીનામાની માંગ યથાવત
વિપક્ષનું કહેવું છે કે NEET પેપર લીક અને પરીક્ષા વ્યવસ્થામાં થયેલી ગેરરીતિઓની નૈતિક જવાબદારી સ્વીકારીને કેન્દ્રીય શિક્ષણમંત્રી ધર્મેન્દ્ર પ્રધાને રાજીનામું આપવું જોઈએ. આ મુદ્દે સરકાર અને વિપક્ષ વચ્ચે સહમતિ ન બનતાં સંસદના ચોમાસુ સત્રમાં સતત અવરોધ સર્જાઈ રહ્યો છે. બીજી તરફ સરકારનું વલણ છે કે પરીક્ષા ગેરરીતિના કેસોની તપાસ ચાલી રહી છે અને જવાબદાર લોકો સામે કાયદેસરની કાર્યવાહી કરવામાં આવી રહી છે. સરકાર ગૃહમાં ચર્ચા માટે તૈયાર હોવાનું કહે છે, જ્યારે વિપક્ષ રાજીનામાની માંગ પર અડગ રહેતાં સંસદનું કામકાજ સતત પ્રભાવિત થઈ રહ્યું છે. આ પરિસ્થિતિમાં હવે આગામી દિવસોમાં સરકાર અને વિપક્ષ વચ્ચે કોઈ સમાધાન થાય છે કે નહીં અને સંસદની કાર્યવાહી સામાન્ય રીતે શરૂ થઈ શકે છે કે નહીં તેના પર સૌની નજર રહેશે.
