બોલિવૂડની પ્રખ્યાત અભિનેત્રી અને 'કાંટા લગા' ગીતની સ્ટાર શેફાલી જરીવાલાનું 42 વર્ષની ઉંમરે આકસ્મિક નિધન થયું, જેનાથી સમગ્ર એન્ટરટેઈનમેન્ટ ઈન્ડસ્ટ્રી અને ચાહકોમાં શોકનું મોજું ફરી વળ્યું છે. શેફાલીના નિધનના સમાચાર બાદ એક જૂનો વીડિયો સોશિયલ મીડિયા પર ઝડપથી વાયરલ થઈ રહ્યો છે, જેમાં તેમના 'બિગ બોસ 13'ના સહ-સ્પર્ધક પારસ છાબરા તેમની કુંડળી વાંચીને તેમના "અચાનક મૃત્યુ"ની આગાહી કરતા જોવા મળે છે. આ વીડિયો જોઈને ચાહકો સ્તબ્ધ થઈ ગયા છે અને આ આગાહીને લઈને ચર્ચાઓ ગરમાઈ રહી છે.
આ વીડિયો ઓગસ્ટ 2024માં પારસ છાબરાના પોડકાસ્ટ 'આબરા કા ડાબરા શો'નો છે, જેમાં શેફાલી ગેસ્ટ તરીકે હાજર હતી. વીડિયોમાં પારસ કહે છે, "તમારા આઠમા ભાવમાં ચંદ્ર, બુધ અને કેતુ બેઠેલા છે. ચંદ્ર અને કેતુનું સંયોજન સૌથી ખરાબ માનવામાં આવે છે, જે sudden death, ચિંતા અને ન્યુરોલોજીકલ સમસ્યાઓનો સંકેત આપે છે." આ નિવેદન તે સમયે કદાચ નજીવું લાગ્યું હશે, પરંતુ શેફાલીના નિધન બાદ તેનો અર્થ બદલાઈ ગયો છે. શેફાલીએ આ જ પોડકાસ્ટમાં પોતાની એપિલેપ્સીની સમસ્યા વિશે ખુલાસો કર્યો હતો, જણાવ્યું હતું કે તેઓ 15 વર્ષની ઉંમરે આ બીમારીનો શિકાર બન્યા હતા, પરંતુ યોગ્ય સારવાર અને જીવનશૈલીના ફેરફારો દ્વારા તેઓ 20 વર્ષથી એપિલેપ્સી-મુક્ત હતા.
શેફાલી જરીવાલાને 27 જૂન, 2025ની રાત્રે હૃદયરોગનો હુમલો આવ્યો હોવાનું જાણવા મળ્યું છે, જે બાદ તેમના પતિ પરાગ ત્યાગીએ તેમને મુંબઈની બેલેવ્યૂ મલ્ટિસ્પેશિયાલિટી હોસ્પિટલમાં દાખલ કર્યા હતા, પરંતુ ડોક્ટરોએ તેમને મૃત જાહેર કર્યા. શેફાલીના નિધનનું સાચું કારણ જાણવા માટે તેમના શરીરને પોસ્ટમોર્ટમ માટે કૂપર હોસ્પિટલમાં મોકલવામાં આવ્યું છે. આ ઘટનાએ બિગ બોસ 13ના ચાહકોને ખાસ કરીને આઘાત આપ્યો છે, કારણ કે આ સિઝનના અન્ય સ્પર્ધક સિદ્ધાર્થ શુક્લાનું પણ 2021માં હૃદયરોગના કારણે નિધન થયું હતું.
આ ઘટના બાદ શેફાલીના સાથી કલાકારો અને ચાહકો સોશિયલ મીડિયા પર શોક વ્યક્ત કરી રહ્યા છે. પારસ છાબરાએ પણ ઇન્સ્ટાગ્રામ પર શેફાલીને શ્રદ્ધાંજલિ આપતા લખ્યું, "કોની જિંદગી કેટલી લખેલી છે એ કોઈ નથી જાણતું. ઓમ શાંતિ." આ વાયરલ વીડિયોએ એક મોટો સવાલ ઉભો કર્યો છે - શું આ ખરેખર આગાહી હતી, કે માત્ર એક ભયાનક સંયોગ? શેફાલીના ચાહકો હજી પણ આ દુ:ખદ ઘટનામાંથી બહાર આવવાનો પ્રયાસ કરી રહ્યા છે, અને આ વીડિયો તેમના દુ:ખને વધુ ગાઢ બનાવી રહ્યો છે.
શાહરુખ ખાનની ‘King’ માં દીપિકા પાદુકોણની એન્ટ્રી?: કેપટાઉનમાં શૂટિંગના વીડિયોથી ચર્ચા તેજ
